౧౦. ఖల్లాటియపేతివత్థు

౫౮. ‘‘కా ను అన్తోవిమానస్మిం, తిట్ఠన్తీ నూపనిక్ఖమి;

ఉపనిక్ఖమస్సు భద్దే, పస్సామ తం బహిట్ఠిత’’న్తి.

౫౯. ‘‘అట్టీయామి హరాయామి, నగ్గా నిక్ఖమితుం బహి;

కేసేహమ్హి పటిచ్ఛన్నా, పుఞ్ఞం మే అప్పకం కత’’న్తి.

౬౦. ‘‘హన్దుత్తరీయం దదామి తే, ఇదం దుస్సం నివాసయ;

ఇదం దుస్సం నివాసేత్వా, ఏహి నిక్ఖమ సోభనే;

ఉపనిక్ఖమస్సు భద్దే, పస్సామ తం బహిట్ఠిత’’న్తి.

౬౧. ‘‘హత్థేన హత్థే తే దిన్నం, న మయ్హం ఉపకప్పతి;

ఏసేత్థుపాసకో సద్ధో, సమ్మాసమ్బుద్ధసావకో.

౬౨. ‘‘ఏతం అచ్ఛాదయిత్వాన, మమ దక్ఖిణమాదిస;

తథాహం [అథాహం (సీ.)] సుఖితా హేస్సం, సబ్బకామసమిద్ధినీ’’తి.

౬౩. తఞ్చ తే న్హాపయిత్వాన, విలిమ్పేత్వాన వాణిజా;

వత్థేహచ్ఛాదయిత్వాన, తస్సా దక్ఖిణమాదిసుం.

౬౪. సమనన్తరానుద్దిట్ఠే [సమనన్తరా అనుద్దిట్ఠే (స్యా. క.)], విపాకో ఉదపజ్జథ [ఉపపజ్జథ (సీ. స్యా.)];

భోజనచ్ఛాదనపానీయం [భోజనచ్ఛాదనం పానీయం (స్యా. క.)], దక్ఖిణాయ ఇదం ఫలం.

౬౫. తతో సుద్ధా సుచివసనా, కాసికుత్తమధారినీ;

హసన్తీ విమానా నిక్ఖమి, ‘దక్ఖిణాయ ఇదం ఫల’’’న్తి.

౬౬. ‘‘సుచిత్తరూపం రుచిరం, విమానం తే పభాసతి;

దేవతే పుచ్ఛితాచిక్ఖ, కిస్స కమ్మస్సిదం ఫల’’న్తి.

౬౭. ‘‘భిక్ఖునో చరమానస్స, దోణినిమ్మజ్జనిం అహం;

అదాసిం ఉజుభూతస్స, విప్పసన్నేన చేతసా.

౬౮. ‘‘తస్స కమ్మస్స కుసలస్స, విపాకం దీఘమన్తరం;

అనుభోమి విమానస్మిం, తఞ్చ దాని పరిత్తకం.

౬౯. ‘‘ఉద్ధం చతూహి మాసేహి, కాలంకిరియా [కాలంకిరియా (క.)] భవిస్సతి;

ఏకన్తకటుకం ఘోరం, నిరయం పపతిస్సహం.

౭౦. [మ. ని. ౩.౨౫౦, ౨౬౭; అ. ని. ౩.౩౬; పే. వ. ౨౪౦, ౬౯౩] ‘‘చతుక్కణ్ణం చతుద్వారం, విభత్తం భాగసో మితం;

అయోపాకారపరియన్తం, అయసా పటికుజ్జితం.

౭౧. ‘‘తస్స అయోమయా భూమి, జలితా తేజసా యుతా;

సమన్తా యోజనసతం, ఫరిత్వా తిట్ఠతి సబ్బదా.

౭౨. ‘‘తత్థాహం దీఘమద్ధానం, దుక్ఖం వేదిస్స వేదనం;

ఫలఞ్చ పాపకమ్మస్స, తస్మా సోచామహం భుస’’న్తి.

ఖల్లాటియపేతివత్థు దసమం.