౨. పుగ్గలవిసేసనిద్దేసో

౮. ద్వే పుగ్గలా పటిసమ్భిదప్పత్తా – ఏకో పుబ్బయోగసమ్పన్నో, ఏకో న పుబ్బయోగసమ్పన్నో. యో పుబ్బయోగసమ్పన్నో సో తేన అతిరేకో హోతి, అధికో హోతి, విసేసో హోతి. తస్స ఞాణం పభిజ్జతి.

ద్వే పుగ్గలా పటిసమ్భిదప్పత్తా, ద్వేపి పుబ్బయోగసమ్పన్నా – ఏకో బహుస్సుతో, ఏకో న బహుస్సుతో. యో బహుస్సుతో, సో తేన అతిరేకో హోతి, అధికో హోతి, విసేసో హోతి. తస్స ఞాణం పభిజ్జతి.

ద్వే పుగ్గలా పటిసమ్భిదప్పత్తా, ద్వేపి పుబ్బయోగసమ్పన్నా, ద్వేపి బహుస్సుతా – ఏకో దేసనాబహులో, ఏకో న దేసనాబహులో. యో దేసనాబహులో, సో తేన అతిరేకో హోతి, అధికో హోతి, విసేసో హోతి. తస్స ఞాణం పభిజ్జతి.

ద్వే పుగ్గలా పటిసమ్భిదప్పత్తా, ద్వేపి పుబ్బయోగసమ్పన్నా, ద్వేపి బహుస్సుతా, ద్వేపి దేసనాబహులా – ఏకో గరూపనిస్సితో, ఏకో న గరూపనిస్సితో. యో గరూపనిస్సితో, సో తేన అతిరేకో హోతి, అధికో హోతి, విసేసో హోతి. తస్స ఞాణం పభిజ్జతి.

ద్వే పుగ్గలా పటిసమ్భిదప్పత్తా, ద్వేపి పుబ్బయోగసమ్పన్నా, ద్వేపి బహుస్సుతా, ద్వేపి దేసనాబహులా, ద్వేపి గరూపనిస్సితా – ఏకో విహారబహులో, ఏకో న విహారబహులో. యో విహారబహులో, సో తేన అతిరేకో హోతి, అధికో హోతి, విసేసో హోతి. తస్స ఞాణం పభిజ్జతి.

ద్వే పుగ్గలా పటిసమ్భిదప్పత్తా, ద్వేపి పుబ్బయోగసమ్పన్నా, ద్వేపి బహుస్సుతా, ద్వేపి దేసనాబహులా, ద్వేపి గరూపనిస్సితా, ద్వేపి విహారబహులా – ఏకో పచ్చవేక్ఖణాబహులో, ఏకో న పచ్చవేక్ఖణాబహులో. యో పచ్చవేక్ఖణాబహులో, సో తేన అతిరేకో హోతి, అధికో హోతి, విసేసో హోతి. తస్స ఞాణం పభిజ్జతి.

ద్వే పుగ్గలా పటిసమ్భిదప్పత్తా, ద్వేపి పుబ్బయోగసమ్పన్నా, ద్వేపి బహుస్సుతా, ద్వేపి దేసనాబహులా, ద్వేపి గరూపనిస్సితా, ద్వేపి విహారబహులా, ద్వేపి పచ్చవేక్ఖణాబహులా – ఏకో సేఖపటిసమ్భిదప్పత్తో, ఏకో అసేఖపటిసమ్భిదప్పత్తో. యో అసేఖపటిసమ్భిదప్పత్తో, సో తేన అతిరేకో హోతి, అధికో హోతి, విసేసో హోతి. తస్స ఞాణం పభిజ్జతి.

ద్వే పుగ్గలా పటిసమ్భిదప్పత్తా, ద్వేపి పుబ్బయోగసమ్పన్నా, ద్వేపి బహుస్సుతా, ద్వేపి దేసనాబహులా, ద్వేపి గరూపనిస్సితా, ద్వేపి విహారబహులా, ద్వేపి పచ్చవేక్ఖణాబహులా, ద్వేపి అసేఖపటిసమ్భిదప్పత్తా – ఏకో సావకపారమిప్పత్తో, ఏకో న సావకపారమిప్పత్తో. యో సావకపారమిప్పత్తో, సో తేన అతిరేకో హోతి, అధికో హోతి, విసేసో హోతి. తస్స ఞాణం పభిజ్జతి.

ద్వే పుగ్గలా పటిసమ్భిదప్పత్తా, ద్వేపి పుబ్బయోగసమ్పన్నా, ద్వేపి బహుస్సుతా, ద్వేపి దేసనాబహులా, ద్వేపి గరూపనిస్సితా, ద్వేపి విహారబహులా, ద్వేపి పచ్చవేక్ఖణాబహులా, ద్వేపి అసేఖపటిసమ్భిదప్పత్తా – ఏకో సావకపారమిప్పత్తో, ఏకో పచ్చేకసమ్బుద్ధో. యో పచ్చేకసమ్బుద్ధో, సో తేన అతిరేకో హోతి, అధికో హోతి, విసేసో హోతి. తస్స ఞాణం పభిజ్జతి.

పచ్చేకబుద్ధఞ్చ సదేవకఞ్చ లోకం ఉపాదాయ తథాగతో అరహం సమ్మాసమ్బుద్ధో అగ్గో పటిసమ్భిదప్పత్తో పఞ్ఞాపభేదకుసలో పభిన్నఞాణో అధిగతపటిసమ్భిదో చతువేసారజ్జప్పత్తో దసబలధారీ పురిసాసభో పురిససీహో…పే… యేపి తే ఖత్తియపణ్డితా బ్రాహ్మణపణ్డితా గహపతిపణ్డితా సమణపణ్డితా నిపుణా కతపరప్పవాదా వాలవేధిరూపా వోభిన్దన్తా మఞ్ఞే చరన్తి పఞ్ఞాగతేన దిట్ఠిగతాని, తే పఞ్హం అభిసఙ్ఖరిత్వా అభిసఙ్ఖరిత్వా తథాగతం ఉపసఙ్కమిత్వా పుచ్ఛన్తి గూళ్హాని చ పటిచ్ఛన్నాని చ. కథితా విసజ్జితా చ తే పఞ్హా భగవతా హోన్తి నిద్దిట్ఠకారణా, ఉపక్ఖిత్తకా చ తే భగవతో సమ్పజ్జన్తి. అథ ఖో భగవా తత్థ అతిరోచతి, యదిదం పఞ్ఞాయాతి అగ్గో పటిసమ్భిదప్పత్తోతి.

మహాపఞ్ఞాకథా నిట్ఠితా.