నమో తస్స భగవతో అరహతో సమ్మాసమ్బుద్ధస్స

ఖుద్దకనికాయే

పటిసమ్భిదామగ్గపాళి

౧. మహావగ్గో

మాతికా

౧. సోతావధానే పఞ్ఞా సుతమయే ఞాణం.

౨. సుత్వాన సంవరే పఞ్ఞా సీలమయే ఞాణం.

౩. సంవరిత్వా సమాదహనే పఞ్ఞా సమాధిభావనామయే ఞాణం.

౪. పచ్చయపరిగ్గహే పఞ్ఞా ధమ్మట్ఠితిఞాణం.

౫. అతీతానాగతపచ్చుప్పన్నానం ధమ్మానం సఙ్ఖిపిత్వా వవత్థానే పఞ్ఞా సమ్మసనే ఞాణం.

౬. పచ్చుప్పన్నానం ధమ్మానం విపరిణామానుపస్సనే పఞ్ఞా ఉదయబ్బయానుపస్సనే ఞాణం.

౭. ఆరమ్మణం పటిసఙ్ఖా భఙ్గానుపస్సనే పఞ్ఞా విపస్సనే ఞాణం.

౮. భయతుపట్ఠానే పఞ్ఞా ఆదీనవే ఞాణం.

౯. ముఞ్చితుకమ్యతాపటిసఙ్ఖాసన్తిట్ఠనా పఞ్ఞా సఙ్ఖారుపేక్ఖాసు ఞాణం.

౧౦. బహిద్ధా వుట్ఠానవివట్టనే పఞ్ఞా గోత్రభుఞాణం.

౧౧. దుభతో వుట్ఠానవివట్టనే పఞ్ఞా మగ్గే ఞాణం.

౧౨. పయోగప్పటిప్పస్సద్ధి పఞ్ఞా ఫలే ఞాణం.

౧౩. ఛిన్నవటుమానుపస్సనే [ఛిన్నమనుపస్సనే (స్యా.), ఛిన్నవట్టమనుపస్సనే (సీ. అట్ఠ.)] పఞ్ఞా విముత్తిఞాణం.

౧౪. తదా సముదాగతే [సముపాగతే (స్యా.)] ధమ్మే పస్సనే పఞ్ఞా పచ్చవేక్ఖణే ఞాణం.

౧౫. అజ్ఝత్తవవత్థానే పఞ్ఞా వత్థునానత్తే ఞాణం.

౧౬. బహిద్ధావవత్థానే పఞ్ఞా గోచరనానత్తే ఞాణం.

౧౭. చరియావవత్థానే పఞ్ఞా చరియానానత్తే ఞాణం.

౧౮. చతుధమ్మవవత్థానే పఞ్ఞా భూమినానత్తే ఞాణం.

౧౯. నవధమ్మవవత్థానే పఞ్ఞా ధమ్మనానత్తే ఞాణం.

౨౦. అభిఞ్ఞాపఞ్ఞా ఞాతట్ఠే ఞాణం.

౨౧. పరిఞ్ఞాపఞ్ఞా తీరణట్ఠే ఞాణం.

౨౨. పహానే పఞ్ఞా పరిచ్చాగట్ఠే ఞాణం.

౨౩. భావనాపఞ్ఞా ఏకరసట్ఠే ఞాణం.

౨౪. సచ్ఛికిరియాపఞ్ఞా ఫస్సనట్ఠే [ఫుసనట్ఠే (క.)] ఞాణం.

౨౫. అత్థనానత్తే పఞ్ఞా అత్థపటిసమ్భిదే ఞాణం.

౨౬. ధమ్మనానత్తే పఞ్ఞా ధమ్మపటిసమ్భిదే ఞాణం.

౨౭. నిరుత్తినానత్తే పఞ్ఞా నిరుత్తిపటిసమ్భిదే ఞాణం.

౨౮. పటిభాననానత్తే పఞ్ఞా [పటిభాణనానత్తే (స్యా.)] పటిభానపటిసమ్భిదే ఞాణం.

౨౯. విహారనానత్తే పఞ్ఞా విహారట్ఠే ఞాణం.

౩౦. సమాపత్తినానత్తే పఞ్ఞా సమాపత్తట్ఠే ఞాణం.

౩౧. విహారసమాపత్తినానత్తే పఞ్ఞా విహారసమాపత్తట్ఠే ఞాణం.

౩౨. అవిక్ఖేపపరిసుద్ధత్తా ఆసవసముచ్ఛేదే పఞ్ఞా ఆనన్తరికసమాధిమ్హి ఞాణం.

౩౩. దస్సనాధిపతేయ్యం సన్తో చ విహారాధిగమో పణీతాధిముత్తతా పఞ్ఞా అరణవిహారే ఞాణం.

౩౪. ద్వీహి బలేహి సమన్నాగతత్తా తయో చ సఙ్ఖారానం పటిప్పస్సద్ధియా సోళసహి ఞాణచరియాహి నవహి సమాధిచరియాహి వసిభావతా పఞ్ఞా నిరోధసమాపత్తియా ఞాణం.

౩౫. సమ్పజానస్స పవత్తపరియాదానే పఞ్ఞా పరినిబ్బానే ఞాణం.

౩౬. సబ్బధమ్మానం సమ్మా సముచ్ఛేదే నిరోధే చ అనుపట్ఠానతా పఞ్ఞా సమసీసట్ఠే ఞాణం.

౩౭. పుథునానత్తతేజపరియాదానే పఞ్ఞా సల్లేఖట్ఠే ఞాణం.

౩౮. అసల్లీనత్తపహితత్తపగ్గహట్ఠే పఞ్ఞా వీరియారమ్భే ఞాణం.

౩౯. నానాధమ్మప్పకాసనతా పఞ్ఞా అత్థసన్దస్సనే ఞాణం.

౪౦. సబ్బధమ్మానం ఏకసఙ్గహతానానత్తేకత్తపటివేధే పఞ్ఞా దస్సనవిసుద్ధిఞాణం.

౪౧. విదితత్తా పఞ్ఞా ఖన్తిఞాణం.

౪౨. ఫుట్ఠత్తా పఞ్ఞా పరియోగాహణే [పరియోగాహనే (స్యా.)] ఞాణం.

౪౩. సమోదహనే పఞ్ఞా పదేసవిహారే ఞాణం.

౪౪. అధిపతత్తా పఞ్ఞా సఞ్ఞావివట్టే ఞాణం.

౪౫. నానత్తే పఞ్ఞా చేతోవివట్టే ఞాణం.

౪౬. అధిట్ఠానే పఞ్ఞా చిత్తవివట్టే ఞాణం.

౪౭. సుఞ్ఞతే పఞ్ఞా ఞాణవివట్టే ఞాణం.

౪౮. వోసగ్గే [వోస్సగ్గే (బహూసు)] పఞ్ఞా విమోక్ఖవివట్టే ఞాణం.

౪౯. తథట్ఠే పఞ్ఞా సచ్చవివట్టే ఞాణం.

౫౦. కాయమ్పి చిత్తమ్పి ఏకవవత్థానతా సుఖసఞ్ఞఞ్చ లహుసఞ్ఞఞ్చ అధిట్ఠానవసేన ఇజ్ఝనట్ఠే పఞ్ఞా ఇద్ధివిధే ఞాణం.

౫౧. వితక్కవిప్ఫారవసేన నానత్తేకత్తసద్దనిమిత్తానం పరియోగాహణే పఞ్ఞా సోతధాతువిసుద్ధిఞాణం.

౫౨. తిణ్ణన్నం చిత్తానం విప్ఫారత్తా ఇన్ద్రియానం పసాదవసేన నానత్తేకత్తవిఞ్ఞాణచరియా పరియోగాహణే పఞ్ఞా చేతోపరియఞాణం.

౫౩. పచ్చయప్పవత్తానం ధమ్మానం నానత్తేకత్తకమ్మవిప్ఫారవసేన పరియోగాహణే పఞ్ఞా పుబ్బేనివాసానుస్సతిఞాణం.

౫౪. ఓభాసవసేన నానత్తేకత్తరూపనిమిత్తానం దస్సనట్ఠే పఞ్ఞా దిబ్బచక్ఖుఞాణం.

౫౫. చతుసట్ఠియా ఆకారేహి తిణ్ణన్నం ఇన్ద్రియానం వసీభావతా పఞ్ఞా ఆసవానం ఖయే ఞాణం.

౫౬. పరిఞ్ఞట్ఠే పఞ్ఞా దుక్ఖే ఞాణం.

౫౭. పహానట్ఠే పఞ్ఞా సముదయే ఞాణం.

౫౮. సచ్ఛికిరియట్ఠే పఞ్ఞా నిరోధే ఞాణం.

౫౯. భావనట్ఠే పఞ్ఞా మగ్గే ఞాణం.

౬౦. దుక్ఖే ఞాణం.

౬౧. దుక్ఖసముదయే ఞాణం.

౬౨. దుక్ఖనిరోధే ఞాణం.

౬౩. దుక్ఖనిరోధగామినియా పటిపదాయ ఞాణం.

౬౪. అత్థపటిసమ్భిదే ఞాణం.

౬౫. ధమ్మపటిసమ్భిదే ఞాణం.

౬౬. నిరుత్తిపటిసమ్భిదే ఞాణం.

౬౭. పటిభానపటిసమ్భిదే ఞాణం.

౬౮. ఇన్ద్రియపరోపరియత్తే ఞాణం.

౬౯. సత్తానం ఆసయానుసయే ఞాణం.

౭౦. యమకపాటిహీరే ఞాణం.

౭౧. మహాకరుణాసమాపత్తియా ఞాణం.

౭౨. సబ్బఞ్ఞుతఞాణం.

౭౩. అనావరణఞాణం.

ఇమాని తేసత్తతి ఞాణాని. ఇమేసం తేసత్తతియా ఞాణానం సత్తసట్ఠి ఞాణాని సావకసాధారణాని; ఛ ఞాణాని అసాధారణాని సావకేహి.

మాతికా నిట్ఠితా.

౧. ఞాణకథా

౧. సుతమయఞాణనిద్దేసో

౧. కథం సోతావధానే పఞ్ఞా సుతమయే ఞాణం?

‘‘ఇమే ధమ్మా అభిఞ్ఞేయ్యా’’తి సోతావధానం, తంపజాననా పఞ్ఞా సుతమయే ఞాణం.

‘‘ఇమే ధమ్మా పరిఞ్ఞేయ్యా’’తి సోతావధానం, తంపజాననా పఞ్ఞా సుతమయే ఞాణం.

‘‘ఇమే ధమ్మా పహాతబ్బా’’తి సోతావధానం, తంపజాననా పఞ్ఞా సుతమయే ఞాణం.

‘‘ఇమే ధమ్మా భావేతబ్బా’’తి సోతావధానం, తంపజాననా పఞ్ఞా సుతమయే ఞాణం.

‘‘ఇమే ధమ్మా సచ్ఛికాతబ్బా’’తి సోతావధానం, తంపజాననా పఞ్ఞా సుతమయే ఞాణం.

‘‘ఇమే ధమ్మా హానభాగియా’’తి సోతావధానం, తంపజాననా పఞ్ఞా సుతమయే ఞాణం.

‘‘ఇమే ధమ్మా ఠితిభాగియా’’తి సోతావధానం, తంపజాననా పఞ్ఞా సుతమయే ఞాణం.

‘‘ఇమే ధమ్మా విసేసభాగియా’’తి సోతావధానం, తంపజాననా పఞ్ఞా సుతమయే ఞాణం.

‘‘ఇమే ధమ్మా నిబ్బేధభాగియా’’తి సోతావధానం, తంపజాననా పఞ్ఞా సుతమయే ఞాణం.

‘‘సబ్బే సఙ్ఖారా అనిచ్చా’’తి సోతావధానం, తంపజాననా పఞ్ఞా సుతమయే ఞాణం.

‘‘సబ్బే సఙ్ఖారా దుక్ఖా’’తి సోతావధానం, తంపజాననా పఞ్ఞా సుతమయే ఞాణం.

‘‘సబ్బే ధమ్మా అనత్తా’’తి సోతావధానం, తంపజాననా పఞ్ఞా సుతమయే ఞాణం.

‘‘ఇదం దుక్ఖం అరియసచ్చ’’న్తి సోతావధానం, తంపజాననా పఞ్ఞా సుతమయే ఞాణం.

‘‘ఇదం దుక్ఖసముదయం [దుక్ఖసముదయో (స్యా.)] అరియసచ్చ’’న్తి సోతావధానం, తంపజాననా పఞ్ఞా సుతమయే ఞాణం.

‘‘ఇదం దుక్ఖనిరోధం [దుక్ఖనిరోధో (స్యా.) అట్ఠకథా ఓలోకేతబ్బా] అరియసచ్చ’’న్తి సోతావధానం, తంపజాననా పఞ్ఞా సుతమయే ఞాణం.

‘‘ఇదం దుక్ఖనిరోధగామినీ పటిపదా అరియసచ్చ’’న్తి సోతావధానం, తంపజాననా పఞ్ఞా సుతమయే ఞాణం.

౨. కథం ‘‘ఇమే ధమ్మా అభిఞ్ఞేయ్యా’’తి సోతావధానం, తంపజాననా పఞ్ఞా సుతమయే ఞాణం?

ఏకో ధమ్మో అభిఞ్ఞేయ్యో – సబ్బే సత్తా ఆహారట్ఠితికా. ద్వే ధమ్మా అభిఞ్ఞేయ్యా – ద్వే ధాతుయో. తయో ధమ్మా అభిఞ్ఞేయ్యా – తిస్సో ధాతుయో. చత్తారో ధమ్మా అభిఞ్ఞేయ్యా – చత్తారి అరియసచ్చాని. పఞ్చ ధమ్మా అభిఞ్ఞేయ్యా – పఞ్చ విముత్తాయతనాని. ఛ ధమ్మా అభిఞ్ఞేయ్యా – ఛ అనుత్తరియాని. సత్త ధమ్మా అభిఞ్ఞేయ్యా – సత్త నిద్దసవత్థూని. అట్ఠ ధమ్మా అభిఞ్ఞేయ్యా – అట్ఠ అభిభాయతనాని. నవ ధమ్మా అభిఞ్ఞేయ్యా – నవ అనుపుబ్బవిహారా. దస ధమ్మా అభిఞ్ఞేయ్యా – దస నిజ్జరవత్థూని.

౩. ‘‘సబ్బం, భిక్ఖవే, అభిఞ్ఞేయ్యం. కిఞ్చ, భిక్ఖవే, సబ్బం అభిఞ్ఞేయ్యం? చక్ఖు [చక్ఖుం (స్యా. క.)], భిక్ఖవే, అభిఞ్ఞేయ్యం; రూపా అభిఞ్ఞేయ్యా; చక్ఖువిఞ్ఞాణం అభిఞ్ఞేయ్యం; చక్ఖుసమ్ఫస్సో అభిఞ్ఞేయ్యో; యమ్పిదం [యమిదం (క.) సం. ని. ౪.౫౨ పస్సితబ్బో] చక్ఖుసమ్ఫస్సపచ్చయా ఉప్పజ్జతి వేదయితం సుఖం వా దుక్ఖం వా అదుక్ఖమసుఖం వా, తమ్పి అభిఞ్ఞేయ్యం. సోతం అభిఞ్ఞేయ్యం; సద్దా అభిఞ్ఞేయ్యా…పే… ఘానం అభిఞ్ఞేయ్యం; గన్ధా అభిఞ్ఞేయ్యా… జివ్హా అభిఞ్ఞేయ్యా; రసా అభిఞ్ఞేయ్యా… కాయో అభిఞ్ఞేయ్యో; ఫోట్ఠబ్బా అభిఞ్ఞేయ్యా… మనో అభిఞ్ఞేయ్యో; ధమ్మా అభిఞ్ఞేయ్యా; మనోవిఞ్ఞాణం అభిఞ్ఞేయ్యం, మనోసమ్ఫస్సో అభిఞ్ఞేయ్యో; యమ్పిదం మనోసమ్ఫస్సపచ్చయా ఉప్పజ్జతి వేదయితం సుఖం వా దుక్ఖం వా అదుక్ఖమసుఖం వా, తమ్పి అభిఞ్ఞేయ్యం.’’

రూపం అభిఞ్ఞేయ్యం; వేదనా అభిఞ్ఞేయ్యా; సఞ్ఞా అభిఞ్ఞేయ్యా; సఙ్ఖారా అభిఞ్ఞేయ్యా; విఞ్ఞాణం అభిఞ్ఞేయ్యం.

చక్ఖు అభిఞ్ఞేయ్యం; సోతం అభిఞ్ఞేయ్యం; ఘానం అభిఞ్ఞేయ్యం; జివ్హా అభిఞ్ఞేయ్యా; కాయో అభిఞ్ఞేయ్యో; మనో అభిఞ్ఞేయ్యో. రూపా అభిఞ్ఞేయ్యా; సద్దా అభిఞ్ఞేయ్యా; గన్ధా అభిఞ్ఞేయ్యా; రసా అభిఞ్ఞేయ్యా; ఫోట్ఠబ్బా అభిఞ్ఞేయ్యా; ధమ్మా అభిఞ్ఞేయ్యా. చక్ఖువిఞ్ఞాణం అభిఞ్ఞేయ్యం; సోతవిఞ్ఞాణం అభిఞ్ఞేయ్యం; ఘానవిఞ్ఞాణం అభిఞ్ఞేయ్యం; జివ్హావిఞ్ఞాణం అభిఞ్ఞేయ్యం; కాయవిఞ్ఞాణం అభిఞ్ఞేయ్యం; మనోవిఞ్ఞాణం అభిఞ్ఞేయ్యం. చక్ఖుసమ్ఫస్సో అభిఞ్ఞేయ్యో; సోతసమ్ఫస్సో అభిఞ్ఞేయ్యో; ఘానసమ్ఫస్సో అభిఞ్ఞేయ్యో; జివ్హాసమ్ఫస్సో అభిఞ్ఞేయ్యో; కాయసమ్ఫస్సో అభిఞ్ఞేయ్యో; మనోసమ్ఫస్సో అభిఞ్ఞేయ్యో; చక్ఖుసమ్ఫస్సజా వేదనా అభిఞ్ఞేయ్యా; సోతసమ్ఫస్సజా వేదనా అభిఞ్ఞేయ్యా; ఘానసమ్ఫస్సజా వేదనా అభిఞ్ఞేయ్యా; జివ్హాసమ్ఫస్సజా వేదనా అభిఞ్ఞేయ్యా; కాయసమ్ఫస్సజా వేదనా అభిఞ్ఞేయ్యా; మనోసమ్ఫస్సజా వేదనా అభిఞ్ఞేయ్యా. రూపసఞ్ఞా అభిఞ్ఞేయ్యా; సద్దసఞ్ఞా అభిఞ్ఞేయ్యా; గన్ధసఞ్ఞా అభిఞ్ఞేయ్యా; రససఞ్ఞా అభిఞ్ఞేయ్యా; ఫోట్ఠబ్బసఞ్ఞా అభిఞ్ఞేయ్యా; ధమ్మసఞ్ఞా అభిఞ్ఞేయ్యా. రూపసఞ్చేతనా అభిఞ్ఞేయ్యా; సద్దసఞ్చేతనా అభిఞ్ఞేయ్యా; గన్ధసఞ్చేతనా అభిఞ్ఞేయ్యా; రససఞ్చేతనా అభిఞ్ఞేయ్యా; ఫోట్ఠబ్బసఞ్చేతనా అభిఞ్ఞేయ్యా; ధమ్మసఞ్చేతనా అభిఞ్ఞేయ్యా. రూపతణ్హా అభిఞ్ఞేయ్యా; సద్దతణ్హా అభిఞ్ఞేయ్యా; గన్ధతణ్హా అభిఞ్ఞేయ్యా; రసతణ్హా అభిఞ్ఞేయ్యా; ఫోట్ఠబ్బతణ్హా అభిఞ్ఞేయ్యా; ధమ్మతణ్హా అభిఞ్ఞేయ్యా. రూపవితక్కో అభిఞ్ఞేయ్యో; సద్దవితక్కో అభిఞ్ఞేయ్యో; గన్ధవితక్కో అభిఞ్ఞేయ్యో; రసవితక్కో అభిఞ్ఞేయ్యో; ఫోట్ఠబ్బవితక్కో అభిఞ్ఞేయ్యో; ధమ్మవితక్కో అభిఞ్ఞేయ్యో. రూపవిచారో అభిఞ్ఞేయ్యో; సద్దవిచారో అభిఞ్ఞేయ్యో; గన్ధవిచారో అభిఞ్ఞేయ్యో; రసవిచారో అభిఞ్ఞేయ్యో; ఫోట్ఠబ్బవిచారో అభిఞ్ఞేయ్యో; ధమ్మవిచారో అభిఞ్ఞేయ్యో.

౪. పథవీధాతు అభిఞ్ఞేయ్యా; ఆపోధాతు అభిఞ్ఞేయ్యా; తేజోధాతు అభిఞ్ఞేయ్యా; వాయోధాతు అభిఞ్ఞేయ్యా; ఆకాసధాతు అభిఞ్ఞేయ్యా; విఞ్ఞాణధాతు అభిఞ్ఞేయ్యా.

పథవీకసిణం అభిఞ్ఞేయ్యం; ఆపోకసిణం అభిఞ్ఞేయ్యం; తేజోకసిణం అభిఞ్ఞేయ్యం; వాయోకసిణం అభిఞ్ఞేయ్యం; నీలకసిణం అభిఞ్ఞేయ్యం; పీతకసిణం అభిఞ్ఞేయ్యం; లోహితకసిణం అభిఞ్ఞేయ్యం; ఓదాతకసిణం అభిఞ్ఞేయ్యం; ఆకాసకసిణం అభిఞ్ఞేయ్యం; విఞ్ఞాణకసిణం అభిఞ్ఞేయ్యం.

కేసా అభిఞ్ఞేయ్యా; లోమా అభిఞ్ఞేయ్యా; నఖా అభిఞ్ఞేయ్యా; దన్తా అభిఞ్ఞేయ్యా; తచో అభిఞ్ఞేయ్యో, మంసం అభిఞ్ఞేయ్యం; న్హారూ [నహారూ (స్యా.)] అభిఞ్ఞేయ్యా; అట్ఠీ అభిఞ్ఞేయ్యా; అట్ఠిమిఞ్జా అభిఞ్ఞేయ్యా [అట్ఠిమఞ్జం అభిఞ్ఞేయ్యం (స్యా. క.)]; వక్కం అభిఞ్ఞేయ్యం; హదయం అభిఞ్ఞేయ్యం; యకనం అభిఞ్ఞేయ్యం; కిలోమకం అభిఞ్ఞేయ్యం; పిహకం అభిఞ్ఞేయ్యం; పప్ఫాసం అభిఞ్ఞేయ్యం; అన్తం అభిఞ్ఞేయ్యం అన్తగుణం అభిఞ్ఞేయ్యం; ఉదరియం అభిఞ్ఞేయ్యం; కరీసం అభిఞ్ఞేయ్యం; పిత్తం అభిఞ్ఞేయ్యం; సేమ్హం అభిఞ్ఞేయ్యం; పుబ్బో అభిఞ్ఞేయ్యో; లోహితం అభిఞ్ఞేయ్యం; సేదో అభిఞ్ఞేయ్యో; మేదో అభిఞ్ఞేయ్యో; అస్సు అభిఞ్ఞేయ్యం; వసా అభిఞ్ఞేయ్యా; ఖేళో అభిఞ్ఞేయ్యో; సిఙ్ఘాణికా అభిఞ్ఞేయ్యా; లసికా అభిఞ్ఞేయ్యా; ముత్తం అభిఞ్ఞేయ్యం; మత్థలుఙ్గం అభిఞ్ఞేయ్యం.

చక్ఖాయతనం అభిఞ్ఞేయ్యం; రూపాయతనం అభిఞ్ఞేయ్యం. సోతాయతనం అభిఞ్ఞేయ్యం; సద్దాయతనం అభిఞ్ఞేయ్యం. ఘానాయతనం అభిఞ్ఞేయ్యం; గన్ధాయతనం అభిఞ్ఞేయ్యం. జివ్హాయతనం అభిఞ్ఞేయ్యం; రసాయతనం అభిఞ్ఞేయ్యం. కాయాయతనం అభిఞ్ఞేయ్యం; ఫోట్ఠబ్బాయతనం అభిఞ్ఞేయ్యం. మనాయతనం అభిఞ్ఞేయ్యం; ధమ్మాయతనం అభిఞ్ఞేయ్యం.

చక్ఖుధాతు అభిఞ్ఞేయ్యా; రూపధాతు అభిఞ్ఞేయ్యా; చక్ఖువిఞ్ఞాణధాతు అభిఞ్ఞేయ్యా. సోతధాతు అభిఞ్ఞేయ్యా; సద్దధాతు అభిఞ్ఞేయ్యా; సోతవిఞ్ఞాణధాతు అభిఞ్ఞేయ్యా. ఘానధాతు అభిఞ్ఞేయ్యా; గన్ధధాతు అభిఞ్ఞేయ్యా; ఘానవిఞ్ఞాణధాతు అభిఞ్ఞేయ్యా. జివ్హాధాతు అభిఞ్ఞేయ్యా; రసధాతు అభిఞ్ఞేయ్యా; జివ్హావిఞ్ఞాణధాతు అభిఞ్ఞేయ్యా. కాయధాతు అభిఞ్ఞేయ్యా; ఫోట్ఠబ్బధాతు అభిఞ్ఞేయ్యా; కాయవిఞ్ఞాణధాతు అభిఞ్ఞేయ్యా. మనోధాతు అభిఞ్ఞేయ్యా; ధమ్మధాతు అభిఞ్ఞేయ్యా; మనోవిఞ్ఞాణధాతు అభిఞ్ఞేయ్యా.

చక్ఖున్ద్రియం అభిఞ్ఞేయ్యం; సోతిన్ద్రియం అభిఞ్ఞేయ్యం; ఘానిన్ద్రియం అభిఞ్ఞేయ్యం; జివ్హిన్ద్రియం అభిఞ్ఞేయ్యం; కాయిన్ద్రియం అభిఞ్ఞేయ్యం; మనిన్ద్రియం అభిఞ్ఞేయ్యం; జీవితిన్ద్రియం అభిఞ్ఞేయ్యం; ఇత్థిన్ద్రియం అభిఞ్ఞేయ్యం; పురిసిన్ద్రియం అభిఞ్ఞేయ్యం; సుఖిన్ద్రియం అభిఞ్ఞేయ్యం; దుక్ఖిన్ద్రియం అభిఞ్ఞేయ్యం; సోమనస్సిన్ద్రియం అభిఞ్ఞేయ్యం; దోమనస్సిన్ద్రియం అభిఞ్ఞేయ్యం; ఉపేక్ఖిన్ద్రియం అభిఞ్ఞేయ్యం; సద్ధిన్ద్రియం అభిఞ్ఞేయ్యం; వీరియిన్ద్రియం [విరియిన్ద్రియం (స్యా.)] అభిఞ్ఞేయ్యం; సతిన్ద్రియం అభిఞ్ఞేయ్యం; సమాధిన్ద్రియం అభిఞ్ఞేయ్యం; పఞ్ఞిన్ద్రియం అభిఞ్ఞేయ్యం; అనఞ్ఞాతఞ్ఞస్సామీతిన్ద్రియం అభిఞ్ఞేయ్యం; అఞ్ఞిన్ద్రియం అభిఞ్ఞేయ్యం; అఞ్ఞాతావిన్ద్రియం అభిఞ్ఞేయ్యం.

౫. కామధాతు అభిఞ్ఞేయ్యా; రూపధాతు అభిఞ్ఞేయ్యా; అరూపధాతు అభిఞ్ఞేయ్యా. కామభవో అభిఞ్ఞేయ్యో; రూపభవో అభిఞ్ఞేయ్యో; అరూపభవో అభిఞ్ఞేయ్యో. సఞ్ఞాభవో అభిఞ్ఞేయ్యో; అసఞ్ఞాభవో అభిఞ్ఞేయ్యో; నేవసఞ్ఞానాసఞ్ఞాభవో అభిఞ్ఞేయ్యో. ఏకవోకారభవో అభిఞ్ఞేయ్యో; చతువోకారభవో అభిఞ్ఞేయ్యో; పఞ్చవోకారభవో అభిఞ్ఞేయ్యో.

౬. పఠమం ఝానం [పఠమజ్ఝానం (స్యా.) ఏవమీదిసేసు ఠానేసు] అభిఞ్ఞేయ్యం; దుతియం ఝానం అభిఞ్ఞేయ్యం; తతియం ఝానం అభిఞ్ఞేయ్యం; చతుత్థం ఝానం అభిఞ్ఞేయ్యం. మేత్తాచేతోవిముత్తి అభిఞ్ఞేయ్యా; కరుణాచేతోవిముత్తి అభిఞ్ఞేయ్యా; ముదితాచేతోవిముత్తి అభిఞ్ఞేయ్యా; ఉపేక్ఖాచేతోవిముత్తి అభిఞ్ఞేయ్యా. ఆకాసానఞ్చాయతనసమాపత్తి అభిఞ్ఞేయ్యా; విఞ్ఞాణఞ్చాయతనసమాపత్తి అభిఞ్ఞేయ్యా; ఆకిఞ్చఞ్ఞాయతనసమాపత్తి అభిఞ్ఞేయ్యా; నేవసఞ్ఞానాసఞ్ఞాయతనసమాపత్తి అభిఞ్ఞేయ్యా.

అవిజ్జా అభిఞ్ఞేయ్యా; సఙ్ఖారా అభిఞ్ఞేయ్యా; విఞ్ఞాణం అభిఞ్ఞేయ్యం; నామరూపం అభిఞ్ఞేయ్యం; సళాయతనం అభిఞ్ఞేయ్యం; ఫస్సో అభిఞ్ఞేయ్యో; వేదనా అభిఞ్ఞేయ్యా; తణ్హా అభిఞ్ఞేయ్యా; ఉపాదానం అభిఞ్ఞేయ్యం; భవో అభిఞ్ఞేయ్యో; జాతి అభిఞ్ఞేయ్యా; జరామరణం అభిఞ్ఞేయ్యం.

౭. దుక్ఖం అభిఞ్ఞేయ్యం; దుక్ఖసముదయో అభిఞ్ఞేయ్యో; దుక్ఖనిరోధో అభిఞ్ఞేయ్యో; దుక్ఖనిరోధగామినీ పటిపదా అభిఞ్ఞేయ్యా. రూపం అభిఞ్ఞేయ్యం; రూపసముదయో అభిఞ్ఞేయ్యో; రూపనిరోధో అభిఞ్ఞేయ్యో; రూపనిరోధగామినీ పటిపదా అభిఞ్ఞేయ్యా. వేదనా అభిఞ్ఞేయ్యా…పే… సఞ్ఞా అభిఞ్ఞేయ్యా…పే… సఙ్ఖారా అభిఞ్ఞేయ్యా…పే… విఞ్ఞాణం అభిఞ్ఞేయ్యం. చక్ఖు అభిఞ్ఞేయ్యం…పే… జరామరణం అభిఞ్ఞేయ్యం; జరామరణసముదయో అభిఞ్ఞేయ్యో; జరామరణనిరోధో అభిఞ్ఞేయ్యో; జరామరణనిరోధగామినీ పటిపదా అభిఞ్ఞేయ్యా.

దుక్ఖస్స పరిఞ్ఞట్ఠో అభిఞ్ఞేయ్యో; దుక్ఖసముదయస్స పహానట్ఠో అభిఞ్ఞేయ్యో; దుక్ఖనిరోధస్స సచ్ఛికిరియట్ఠో అభిఞ్ఞేయ్యో; దుక్ఖనిరోధగామినియా పటిపదాయ భావనట్ఠో అభిఞ్ఞేయ్యో. రూపస్స పరిఞ్ఞట్ఠో అభిఞ్ఞేయ్యో; రూపసముదయస్స పహానట్ఠో అభిఞ్ఞేయ్యో; రూపనిరోధస్స సచ్ఛికిరియట్ఠో అభిఞ్ఞేయ్యో; రూపనిరోధగామినియా పటిపదాయ భావనట్ఠో అభిఞ్ఞేయ్యో. వేదనాయ…పే… సఞ్ఞాయ… సఙ్ఖారానం… విఞ్ఞాణస్స… చక్ఖుస్స…పే… జరామరణస్స పరిఞ్ఞట్ఠో అభిఞ్ఞేయ్యో; జరామరణసముదయస్స పహానట్ఠో అభిఞ్ఞేయ్యో; జరామరణనిరోధస్స సచ్ఛికిరియట్ఠో అభిఞ్ఞేయ్యో; జరామరణనిరోధగామినియా పటిపదాయ భావనట్ఠో అభిఞ్ఞేయ్యో.

దుక్ఖస్స పరిఞ్ఞాపటివేధట్ఠో అభిఞ్ఞేయ్యో; దుక్ఖసముదయస్స పహానపటివేధట్ఠో అభిఞ్ఞేయ్యో; దుక్ఖనిరోధస్స సచ్ఛికిరియాపటివేధట్ఠో అభిఞ్ఞేయ్యో; దుక్ఖనిరోధగామినియా పటిపదాయ భావనాపటివేధట్ఠో అభిఞ్ఞేయ్యో. రూపస్స పరిఞ్ఞాపటివేధట్ఠో అభిఞ్ఞేయ్యో; రూపసముదయస్స పహానపటివేధట్ఠో అభిఞ్ఞేయ్యో; రూపనిరోధస్స సచ్ఛికిరియాపటివేధట్ఠో అభిఞ్ఞేయ్యో; రూపనిరోధగామినియా పటిపదాయ భావనాపటివేధట్ఠో అభిఞ్ఞేయ్యో. వేదనాయ…పే… సఞ్ఞాయ… సఙ్ఖారానం… విఞ్ఞాణస్స… చక్ఖుస్స…పే… జరామరణస్స పరిఞ్ఞాపటివేధట్ఠో అభిఞ్ఞేయ్యో; జరామరణసముదయస్స పహానపటివేధట్ఠో అభిఞ్ఞేయ్యో; జరామరణనిరోధస్స సచ్ఛికిరియాపటివేధట్ఠో అభిఞ్ఞేయ్యో; జరామరణనిరోధగామినియా పటిపదాయ భావనాపటివేధట్ఠో అభిఞ్ఞేయ్యో.

౮. దుక్ఖం అభిఞ్ఞేయ్యం; దుక్ఖసముదయో అభిఞ్ఞేయ్యో; దుక్ఖనిరోధో అభిఞ్ఞేయ్యో; దుక్ఖస్స సముదయనిరోధో అభిఞ్ఞేయ్యో; దుక్ఖస్స ఛన్దరాగనిరోధో అభిఞ్ఞేయ్యో; దుక్ఖస్స అస్సాదో అభిఞ్ఞేయ్యో; దుక్ఖస్స ఆదీనవో అభిఞ్ఞేయ్యో; దుక్ఖస్స నిస్సరణం అభిఞ్ఞేయ్యం. రూపం అభిఞ్ఞేయ్యం; రూపసముదయో అభిఞ్ఞేయ్యో; రూపనిరోధో అభిఞ్ఞేయ్యో; రూపస్స సముదయనిరోధో అభిఞ్ఞేయ్యో; రూపస్స ఛన్దరాగనిరోధో అభిఞ్ఞేయ్యో; రూపస్స అస్సాదో అభిఞ్ఞేయ్యో; రూపస్స ఆదీనవో అభిఞ్ఞేయ్యో; రూపస్స నిస్సరణం అభిఞ్ఞేయ్యం. వేదనా అభిఞ్ఞేయ్యా…పే… సఞ్ఞా అభిఞ్ఞేయ్యా… సఙ్ఖారా అభిఞ్ఞేయ్యా… విఞ్ఞాణం అభిఞ్ఞేయ్యం… చక్ఖు అభిఞ్ఞేయ్యం…పే… జరామరణం అభిఞ్ఞేయ్యం; జరామరణసముదయో అభిఞ్ఞేయ్యో; జరామరణనిరోధో అభిఞ్ఞేయ్యో; జరామరణస్స సముదయనిరోధో అభిఞ్ఞేయ్యో; జరామరణస్స ఛన్దరాగనిరోధో అభిఞ్ఞేయ్యో; జరామరణస్స అస్సాదో అభిఞ్ఞేయ్యో; జరామరణస్స ఆదీనవో అభిఞ్ఞేయ్యో; జరామరణస్స నిస్సరణం అభిఞ్ఞేయ్యం.

దుక్ఖం అభిఞ్ఞేయ్యం; దుక్ఖసముదయో అభిఞ్ఞేయ్యో; దుక్ఖనిరోధో అభిఞ్ఞేయ్యో; దుక్ఖనిరోధగామినీ పటిపదా అభిఞ్ఞేయ్యా; దుక్ఖస్స అస్సాదో అభిఞ్ఞేయ్యో; దుక్ఖస్స ఆదీనవో అభిఞ్ఞేయ్యో; దుక్ఖస్స నిస్సరణం అభిఞ్ఞేయ్యం. రూపం అభిఞ్ఞేయ్యం; రూపసముదయో అభిఞ్ఞేయ్యో; రూపనిరోధో అభిఞ్ఞేయ్యో; రూపనిరోధగామినీ పటిపదా అభిఞ్ఞేయ్యా; రూపస్స అస్సాదో అభిఞ్ఞేయ్యో; రూపస్స ఆదీనవో అభిఞ్ఞేయ్యో; రూపస్స నిస్సరణం అభిఞ్ఞేయ్యం. వేదనా అభిఞ్ఞేయ్యా…పే… సఞ్ఞా అభిఞ్ఞేయ్యా… సఙ్ఖారా అభిఞ్ఞేయ్యా… విఞ్ఞాణం అభిఞ్ఞేయ్యం… చక్ఖు అభిఞ్ఞేయ్యం…పే… జరామరణం అభిఞ్ఞేయ్యం; జరామరణసముదయో అభిఞ్ఞేయ్యో; జరామరణనిరోధో అభిఞ్ఞేయ్యో; జరామరణనిరోధగామినీ పటిపదా అభిఞ్ఞేయ్యా; జరామరణస్స అస్సాదో అభిఞ్ఞేయ్యో; జరామరణస్స ఆదీనవో అభిఞ్ఞేయ్యో; జరామరణస్స నిస్సరణం అభిఞ్ఞేయ్యం.

౯. అనిచ్చానుపస్సనా అభిఞ్ఞేయ్యా; దుక్ఖానుపస్సనా అభిఞ్ఞేయ్యా; అనత్తానుపస్సనా అభిఞ్ఞేయ్యా; నిబ్బిదానుపస్సనా అభిఞ్ఞేయ్యా; విరాగానుపస్సనా అభిఞ్ఞేయ్యా; నిరోధానుపస్సనా అభిఞ్ఞేయ్యా; పటినిస్సగ్గానుపస్సనా అభిఞ్ఞేయ్యా. రూపే అనిచ్చానుపస్సనా అభిఞ్ఞేయ్యా; రూపే దుక్ఖానుపస్సనా అభిఞ్ఞేయ్యా; రూపే అనత్తానుపస్సనా అభిఞ్ఞేయ్యా; రూపే నిబ్బిదానుపస్సనా అభిఞ్ఞేయ్యా; రూపే విరాగానుపస్సనా అభిఞ్ఞేయ్యా; రూపే నిరోధానుపస్సనా అభిఞ్ఞేయ్యా; రూపే పటినిస్సగ్గానుపస్సనా అభిఞ్ఞేయ్యా. వేదనాయ…పే… సఞ్ఞాయ… సఙ్ఖారేసు… విఞ్ఞాణే… చక్ఖుస్మిం…పే… జరామరణే అనిచ్చానుపస్సనా అభిఞ్ఞేయ్యా; జరామరణే దుక్ఖానుపస్సనా అభిఞ్ఞేయ్యా; జరామరణే అనత్తానుపస్సనా అభిఞ్ఞేయ్యా; జరామరణే నిబ్బిదానుపస్సనా అభిఞ్ఞేయ్యా; జరామరణే విరాగానుపస్సనా అభిఞ్ఞేయ్యా; జరామరణే నిరోధానుపస్సనా అభిఞ్ఞేయ్యా; జరామరణే పటినిస్సగ్గానుపస్సనా అభిఞ్ఞేయ్యా.

౧౦. ఉప్పాదో అభిఞ్ఞేయ్యో; పవత్తం అభిఞ్ఞేయ్యం; నిమిత్తం అభిఞ్ఞేయ్యం; ఆయూహనా [ఆయుహనా (స్యా.) ఏవముపరిపి] అభిఞ్ఞేయ్యా; పటిసన్ధి అభిఞ్ఞేయ్యా; గతి అభిఞ్ఞేయ్యా; నిబ్బత్తి అభిఞ్ఞేయ్యా; ఉపపత్తి అభిఞ్ఞేయ్యా; జాతి అభిఞ్ఞేయ్యా; జరా అభిఞ్ఞేయ్యా; బ్యాధి అభిఞ్ఞేయ్యో, మరణం అభిఞ్ఞేయ్యం; సోకో అభిఞ్ఞేయ్యో; పరిదేవో అభిఞ్ఞేయ్యో; ఉపాయాసో అభిఞ్ఞేయ్యో.

అనుప్పాదో అభిఞ్ఞేయ్యో; అప్పవత్తం అభిఞ్ఞేయ్యం; అనిమిత్తం అభిఞ్ఞేయ్యం; అనాయూహనా [అనాయుహనా (స్యా.) ఏవముపరిపి] అభిఞ్ఞేయ్యా; అప్పటిసన్ధి అభిఞ్ఞేయ్యా; అగతి అభిఞ్ఞేయ్యా; అనిబ్బత్తి అభిఞ్ఞేయ్యా; అనుపపత్తి అభిఞ్ఞేయ్యా; అజాతి అభిఞ్ఞేయ్యా; అజరా అభిఞ్ఞేయ్యా; అబ్యాధి అభిఞ్ఞేయ్యో; అమతం అభిఞ్ఞేయ్యం; అసోకో అభిఞ్ఞేయ్యో; అపరిదేవో అభిఞ్ఞేయ్యో; అనుపాయాసో అభిఞ్ఞేయ్యో.

ఉప్పాదో అభిఞ్ఞేయ్యో; అనుప్పాదో అభిఞ్ఞేయ్యో; పవత్తం అభిఞ్ఞేయ్యం; అప్పవత్తం అభిఞ్ఞేయ్యం. నిమిత్తం అభిఞ్ఞేయ్యం; అనిమిత్తం అభిఞ్ఞేయ్యం. ఆయూహనా అభిఞ్ఞేయ్యా; అనాయూహనా అభిఞ్ఞేయ్యా. పటిసన్ధి అభిఞ్ఞేయ్యా; అప్పటిసన్ధి అభిఞ్ఞేయ్యా. గతి అభిఞ్ఞేయ్యా; అగతి అభిఞ్ఞేయ్యా. నిబ్బత్తి అభిఞ్ఞేయ్యా; అనిబ్బత్తి అభిఞ్ఞేయ్యా. ఉపపత్తి అభిఞ్ఞేయ్యా; అనుపపత్తి అభిఞ్ఞేయ్యా. జాతి అభిఞ్ఞేయ్యా; అజాతి అభిఞ్ఞేయ్యా. జరా అభిఞ్ఞేయ్యా; అజరా అభిఞ్ఞేయ్యా. బ్యాధి అభిఞ్ఞేయ్యో; అబ్యాధి అభిఞ్ఞేయ్యో. మరణం అభిఞ్ఞేయ్యం; అమతం అభిఞ్ఞేయ్యం. సోకో అభిఞ్ఞేయ్యో; అసోకో అభిఞ్ఞేయ్యో. పరిదేవో అభిఞ్ఞేయ్యో; అపరిదేవో అభిఞ్ఞేయ్యో. ఉపాయాసో అభిఞ్ఞేయ్యో; అనుపాయాసో అభిఞ్ఞేయ్యో.

ఉప్పాదో దుక్ఖన్తి అభిఞ్ఞేయ్యం. పవత్తం దుక్ఖన్తి అభిఞ్ఞేయ్యం. నిమిత్తం దుక్ఖన్తి అభిఞ్ఞేయ్యం. ఆయూహనా దుక్ఖన్తి అభిఞ్ఞేయ్యం. పటిసన్ధి దుక్ఖన్తి అభిఞ్ఞేయ్యం. గతి దుక్ఖన్తి అభిఞ్ఞేయ్యం. నిబ్బత్తి దుక్ఖన్తి అభిఞ్ఞేయ్యం. ఉపపత్తి దుక్ఖన్తి అభిఞ్ఞేయ్యం. జాతి దుక్ఖన్తి అభిఞ్ఞేయ్యం. జరా దుక్ఖన్తి అభిఞ్ఞేయ్యం. బ్యాధి దుక్ఖన్తి అభిఞ్ఞేయ్యం. మరణం దుక్ఖన్తి అభిఞ్ఞేయ్యం. సోకో దుక్ఖన్తి అభిఞ్ఞేయ్యం. పరిదేవో దుక్ఖన్తి అభిఞ్ఞేయ్యం. ఉపాయాసో దుక్ఖన్తి అభిఞ్ఞేయ్యం.

అనుప్పాదో సుఖన్తి అభిఞ్ఞేయ్యం. అప్పవత్తం సుఖన్తి అభిఞ్ఞేయ్యం. అనిమిత్తం సుఖన్తి అభిఞ్ఞేయ్యం. అనాయూహనా సుఖన్తి అభిఞ్ఞేయ్యం. అప్పటిసన్ధి సుఖన్తి అభిఞ్ఞేయ్యం. అగతి సుఖన్తి అభిఞ్ఞేయ్యం. అనిబ్బత్తి సుఖన్తి అభిఞ్ఞేయ్యం. అనుపపత్తి సుఖన్తి అభిఞ్ఞేయ్యం. అజాతి సుఖన్తి అభిఞ్ఞేయ్యం. అజరా సుఖన్తి అభిఞ్ఞేయ్యం. అబ్యాధి సుఖన్తి అభిఞ్ఞేయ్యం. అమతం సుఖన్తి అభిఞ్ఞేయ్యం. అసోకో సుఖన్తి అభిఞ్ఞేయ్యం. అపరిదేవో సుఖన్తి అభిఞ్ఞేయ్యం. అనుపాయాసో సుఖన్తి అభిఞ్ఞేయ్యం.

ఉప్పాదో దుక్ఖం, అనుప్పాదో సుఖన్తి అభిఞ్ఞేయ్యం. పవత్తం దుక్ఖం, అప్పవత్తం సుఖన్తి అభిఞ్ఞేయ్యం. నిమిత్తం దుక్ఖం, అనిమిత్తం సుఖన్తి అభిఞ్ఞేయ్యం. ఆయూహనా దుక్ఖం, అనాయూహనా సుఖన్తి అభిఞ్ఞేయ్యం. పటిసన్ధి దుక్ఖం, అప్పటిసన్ధి సుఖన్తి అభిఞ్ఞేయ్యం. గతి దుక్ఖం, అగతి సుఖన్తి అభిఞ్ఞేయ్యం. నిబ్బత్తి దుక్ఖం, అనిబ్బత్తి సుఖన్తి అభిఞ్ఞేయ్యం. ఉపపత్తి దుక్ఖం, అనుపపత్తి సుఖన్తి అభిఞ్ఞేయ్యం. జాతి దుక్ఖం, అజాతి సుఖన్తి అభిఞ్ఞేయ్యం. జరా దుక్ఖం, అజరా సుఖన్తి అభిఞ్ఞేయ్యం. బ్యాధి దుక్ఖం, అబ్యాధి సుఖన్తి అభిఞ్ఞేయ్యం. మరణం దుక్ఖం, అమతం సుఖన్తి అభిఞ్ఞేయ్యం. సోకో దుక్ఖం, అసోకో సుఖన్తి అభిఞ్ఞేయ్యం. పరిదేవో దుక్ఖం, అపరిదేవో సుఖన్తి అభిఞ్ఞేయ్యం. ఉపాయాసో దుక్ఖం, అనుపాయాసో సుఖన్తి అభిఞ్ఞేయ్యం.

ఉప్పాదో భయన్తి అభిఞ్ఞేయ్యం. పవత్తం భయన్తి అభిఞ్ఞేయ్యం. నిమిత్తం భయన్తి అభిఞ్ఞేయ్యం. ఆయూహనా భయన్తి అభిఞ్ఞేయ్యం. పటిసన్ధి భయన్తి అభిఞ్ఞేయ్యం. గతి భయన్తి అభిఞ్ఞేయ్యం. నిబ్బత్తి భయన్తి అభిఞ్ఞేయ్యం. ఉపపత్తి భయన్తి అభిఞ్ఞేయ్యం. జాతి భయన్తి అభిఞ్ఞేయ్యం. జరా భయన్తి అభిఞ్ఞేయ్యం. బ్యాధి భయన్తి అభిఞ్ఞేయ్యం. మరణం భయన్తి అభిఞ్ఞేయ్యం. సోకో భయన్తి అభిఞ్ఞేయ్యం. పరిదేవో భయన్తి అభిఞ్ఞేయ్యం. ఉపాయాసో భయన్తి అభిఞ్ఞేయ్యం.

అనుప్పాదో ఖేమన్తి అభిఞ్ఞేయ్యం. అప్పవత్తం ఖేమన్తి అభిఞ్ఞేయ్యం. అనిమిత్తం ఖేమన్తి అభిఞ్ఞేయ్యం. అనాయూహనా ఖేమన్తి అభిఞ్ఞేయ్యం. అప్పటిసన్ధి ఖేమన్తి అభిఞ్ఞేయ్యం. అగతి ఖేమన్తి అభిఞ్ఞేయ్యం. అనిబ్బత్తి ఖేమన్తి అభిఞ్ఞేయ్యం. అనుపపత్తి ఖేమన్తి అభిఞ్ఞేయ్యం. అజాతి ఖేమన్తి అభిఞ్ఞేయ్యం. అజరా ఖేమన్తి అభిఞ్ఞేయ్యం. అబ్యాధి ఖేమన్తి అభిఞ్ఞేయ్యం. అమతం ఖేమన్తి అభిఞ్ఞేయ్యం. అసోకో ఖేమన్తి అభిఞ్ఞేయ్యం. అపరిదేవో ఖేమన్తి అభిఞ్ఞేయ్యం. అనుపాయాసో ఖేమన్తి అభిఞ్ఞేయ్యం.

ఉప్పాదో భయం, అనుప్పాదో ఖేమన్తి అభిఞ్ఞేయ్యం. పవత్తం భయం, అప్పవత్తం ఖేమన్తి అభిఞ్ఞేయ్యం. నిమిత్తం భయం, అనిమిత్తం ఖేమన్తి అభిఞ్ఞేయ్యం. ఆయూహనా భయం, అనాయూహనా ఖేమన్తి అభిఞ్ఞేయ్యం. పటిసన్ధి భయం, అప్పటిసన్ధి ఖేమన్తి అభిఞ్ఞేయ్యం. గతి భయం, అగతి ఖేమన్తి అభిఞ్ఞేయ్యం. నిబ్బత్తి భయం, అనిబ్బత్తి ఖేమన్తి అభిఞ్ఞేయ్యం. ఉపపత్తి భయం, అనుపపత్తి ఖేమన్తి అభిఞ్ఞేయ్యం. జాతి భయం, అజాతి ఖేమన్తి అభిఞ్ఞేయ్యం. జరా భయం, అజరా ఖేమన్తి అభిఞ్ఞేయ్యం. బ్యాధి భయం, అబ్యాధి ఖేమన్తి అభిఞ్ఞేయ్యం. మరణం భయం, అమతం ఖేమన్తి అభిఞ్ఞేయ్యం. సోకో భయం, అసోకో ఖేమన్తి అభిఞ్ఞేయ్యం. పరిదేవో భయం, అపరిదేవో ఖేమన్తి అభిఞ్ఞేయ్యం. ఉపాయాసో భయం, అనుపాయాసో ఖేమన్తి అభిఞ్ఞేయ్యం.

ఉప్పాదో సామిసన్తి అభిఞ్ఞేయ్యం. పవత్తం సామిసన్తి అభిఞ్ఞేయ్యం. నిమిత్తం సామిసన్తి అభిఞ్ఞేయ్యం. ఆయూహనా సామిసన్తి అభిఞ్ఞేయ్యం. పటిసన్ధి సామిసన్తి అభిఞ్ఞేయ్యం. గతి సామిసన్తి అభిఞ్ఞేయ్యం. నిబ్బత్తి సామిసన్తి అభిఞ్ఞేయ్యం. ఉపపత్తి సామిసన్తి అభిఞ్ఞేయ్యం. జాతి సామిసన్తి అభిఞ్ఞేయ్యం. జరా సామిసన్తి అభిఞ్ఞేయ్యం. బ్యాధి సామిసన్తి అభిఞ్ఞేయ్యం. మరణం సామిసన్తి అభిఞ్ఞేయ్యం. సోకో సామిసన్తి అభిఞ్ఞేయ్యం. పరిదేవో సామిసన్తి అభిఞ్ఞేయ్యం. ఉపాయాసో సామిసన్తి అభిఞ్ఞేయ్యం.

అనుప్పాదో నిరామిసన్తి అభిఞ్ఞేయ్యం. అప్పవత్తం నిరామిసన్తి అభిఞ్ఞేయ్యం. అనిమిత్తం నిరామిసన్తి అభిఞ్ఞేయ్యం. అనాయూహనా నిరామిసన్తి అభిఞ్ఞేయ్యం. అప్పటిసన్ధి నిరామిసన్తి అభిఞ్ఞేయ్యం. అగతి నిరామిసన్తి అభిఞ్ఞేయ్యం. అనిబ్బత్తి నిరామిసన్తి అభిఞ్ఞేయ్యం. అనుపపత్తి నిరామిసన్తి అభిఞ్ఞేయ్యం. అజాతి నిరామిసన్తి అభిఞ్ఞేయ్యం. అజరా నిరామిసన్తి అభిఞ్ఞేయ్యం. అబ్యాధి నిరామిసన్తి అభిఞ్ఞేయ్యం. అమతం నిరామిసన్తి అభిఞ్ఞేయ్యం. అసోకో నిరామిసన్తి అభిఞ్ఞేయ్యం. అపరిదేవో నిరామిసన్తి అభిఞ్ఞేయ్యం. అనుపాయాసో నిరామిసన్తి అభిఞ్ఞేయ్యం.

ఉప్పాదో సామిసం, అనుప్పాదో నిరామిసన్తి అభిఞ్ఞేయ్యం. పవత్తం సామిసం, అప్పవత్తం నిరామిసన్తి అభిఞ్ఞేయ్యం. నిమిత్తం సామిసం, అనిమిత్తం నిరామిసన్తి అభిఞ్ఞేయ్యం. ఆయూహనా సామిసం, అనాయూహనా నిరామిసన్తి అభిఞ్ఞేయ్యం. పటిసన్ధి సామిసం, అప్పటిసన్ధి నిరామిసన్తి అభిఞ్ఞేయ్యం. గతి సామిసం, అగతి నిరామిసన్తి అభిఞ్ఞేయ్యం. నిబ్బత్తి సామిసం, అనిబ్బత్తి నిరామిసన్తి అభిఞ్ఞేయ్యం. ఉపపత్తి సామిసం, అనుపపత్తి నిరామిసన్తి అభిఞ్ఞేయ్యం. జాతి సామిసం, అజాతి నిరామిసన్తి అభిఞ్ఞేయ్యం. జరా సామిసం, అజరా నిరామిసన్తి అభిఞ్ఞేయ్యం. బ్యాధి సామిసం, అబ్యాధి నిరామిసన్తి అభిఞ్ఞేయ్యం. మరణం సామిసం, అమతం నిరామిసన్తి అభిఞ్ఞేయ్యం. సోకో సామిసం, అసోకో నిరామిసన్తి అభిఞ్ఞేయ్యం. పరిదేవో సామిసం, అపరిదేవో నిరామిసన్తి అభిఞ్ఞేయ్యం. ఉపాయాసో సామిసం, అనుపాయాసో నిరామిసన్తి అభిఞ్ఞేయ్యం.

ఉప్పాదో సఙ్ఖారాతి అభిఞ్ఞేయ్యం. పవత్తం సఙ్ఖారాతి అభిఞ్ఞేయ్యం. నిమిత్తం సఙ్ఖారాతి అభిఞ్ఞేయ్యం. ఆయూహనా సఙ్ఖారాతి అభిఞ్ఞేయ్యం. పటిసన్ధి సఙ్ఖారాతి అభిఞ్ఞేయ్యం. గతి సఙ్ఖారాతి అభిఞ్ఞేయ్యం. నిబ్బత్తి సఙ్ఖారాతి అభిఞ్ఞేయ్యం. ఉపపత్తి సఙ్ఖారాతి అభిఞ్ఞేయ్యం. జాతి సఙ్ఖారాతి అభిఞ్ఞేయ్యం. జరా సఙ్ఖారాతి అభిఞ్ఞేయ్యం. బ్యాధి సఙ్ఖారాతి అభిఞ్ఞేయ్యం. మరణం సఙ్ఖారాతి అభిఞ్ఞేయ్యం. సోకో సఙ్ఖారాతి అభిఞ్ఞేయ్యం. పరిదేవో సఙ్ఖారాతి అభిఞ్ఞేయ్యం. ఉపాయాసో సఙ్ఖారాతి అభిఞ్ఞేయ్యం.

అనుప్పాదో నిబ్బానన్తి అభిఞ్ఞేయ్యం. అప్పవత్తం నిబ్బానన్తి అభిఞ్ఞేయ్యం. అనిమిత్తం నిబ్బానన్తి అభిఞ్ఞేయ్యం. అనాయూహనా నిబ్బానన్తి అభిఞ్ఞేయ్యం. అప్పటిసన్ధి నిబ్బానన్తి అభిఞ్ఞేయ్యం. అగతి నిబ్బానన్తి అభిఞ్ఞేయ్యం. అనిబ్బత్తి నిబ్బానన్తి అభిఞ్ఞేయ్యం. అనుపపత్తి నిబ్బానన్తి అభిఞ్ఞేయ్యం. అజాతి నిబ్బానన్తి అభిఞ్ఞేయ్యం. అజరం నిబ్బానన్తి అభిఞ్ఞేయ్యం. అబ్యాధి నిబ్బానన్తి అభిఞ్ఞేయ్యం. అమతం నిబ్బానన్తి అభిఞ్ఞేయ్యం. అసోకో నిబ్బానన్తి అభిఞ్ఞేయ్యం. అపరిదేవో నిబ్బానన్తి అభిఞ్ఞేయ్యం. అనుపాయాసో నిబ్బానన్తి అభిఞ్ఞేయ్యం.

ఉప్పాదో సఙ్ఖారా, అనుప్పాదో నిబ్బానన్తి అభిఞ్ఞేయ్యం. పవత్తం సఙ్ఖారా, అప్పవత్తం నిబ్బానన్తి అభిఞ్ఞేయ్యం. నిమిత్తం సఙ్ఖారా, అనిమిత్తం నిబ్బానన్తి అభిఞ్ఞేయ్యం. ఆయూహనా సఙ్ఖారా, అనాయూహనా నిబ్బానన్తి అభిఞ్ఞేయ్యం. పటిసన్ధి సఙ్ఖారా, అప్పటిసన్ధి నిబ్బానన్తి అభిఞ్ఞేయ్యం. గతి సఙ్ఖారా, అగతి నిబ్బానన్తి అభిఞ్ఞేయ్యం. నిబ్బత్తి సఙ్ఖారా, అనిబ్బత్తి నిబ్బానన్తి అభిఞ్ఞేయ్యం. ఉపపత్తి సఙ్ఖారా, అనుపపత్తి నిబ్బానన్తి అభిఞ్ఞేయ్యం. జాతి సఙ్ఖారా, అజాతి నిబ్బానన్తి అభిఞ్ఞేయ్యం. జరా సఙ్ఖారా, అజరా నిబ్బానన్తి అభిఞ్ఞేయ్యం. బ్యాధి సఙ్ఖారా, అబ్యాధి నిబ్బాన’’న్తి అభిఞ్ఞేయ్యం. మరణం సఙ్ఖారా, అమతం నిబ్బానన్తి అభిఞ్ఞేయ్యం. సోకో సఙ్ఖారా, అసోకో నిబ్బానన్తి అభిఞ్ఞేయ్యం. పరిదేవో సఙ్ఖారా, అపరిదేవో నిబ్బానన్తి అభిఞ్ఞేయ్యం. ఉపాయాసో సఙ్ఖారా, అనుపాయాసో నిబ్బానన్తి అభిఞ్ఞేయ్యం.

పఠమభాణవారో.

౧౧. పరిగ్గహట్ఠో అభిఞ్ఞేయ్యో; పరివారట్ఠో అభిఞ్ఞేయ్యో; పరిపూరట్ఠో [పరిపూరణట్ఠో (క.), పరిపూరిట్ఠో (సీ. అట్ఠ.)] అభిఞ్ఞేయ్యో; ఏకగ్గట్ఠో అభిఞ్ఞేయ్యో; అవిక్ఖేపట్ఠో అభిఞ్ఞేయ్యో; పగ్గహట్ఠో అభిఞ్ఞేయ్యో; అవిసారట్ఠో అభిఞ్ఞేయ్యో; అనావిలట్ఠో అభిఞ్ఞేయ్యో; అనిఞ్జనట్ఠో అభిఞ్ఞేయ్యో; ఏకత్తుపట్ఠానవసేన చిత్తస్స ఠితట్ఠో అభిఞ్ఞేయ్యో; ఆరమ్మణట్ఠో అభిఞ్ఞేయ్యో; గోచరట్ఠో అభిఞ్ఞేయ్యో; పహానట్ఠో అభిఞ్ఞేయ్యో; పరిచ్చాగట్ఠో అభిఞ్ఞేయ్యో; వుట్ఠానట్ఠో అభిఞ్ఞేయ్యో; వివట్టనట్ఠో [నివత్తనట్ఠో (క.)] అభిఞ్ఞేయ్యో; సన్తట్ఠో అభిఞ్ఞేయ్యో; పణీతట్ఠో అభిఞ్ఞేయ్యో; విముత్తట్ఠో అభిఞ్ఞేయ్యో; అనాసవట్ఠో అభిఞ్ఞేయ్యో; తరణట్ఠో అభిఞ్ఞేయ్యో; అనిమిత్తట్ఠో అభిఞ్ఞేయ్యో; అప్పణిహితట్ఠో అభిఞ్ఞేయ్యో; సుఞ్ఞతట్ఠో అభిఞ్ఞేయ్యో; ఏకరసట్ఠో అభిఞ్ఞేయ్యో; అనతివత్తనట్ఠో అభిఞ్ఞేయ్యో; యుగనద్ధట్ఠో [యుగనన్ధనట్ఠో (క.)] అభిఞ్ఞేయ్యో; నియ్యానట్ఠో అభిఞ్ఞేయ్యో; హేతుట్ఠో [హేతట్ఠో (స్యా.)] అభిఞ్ఞేయ్యో; దస్సనట్ఠో అభిఞ్ఞేయ్యో; ఆధిపతేయ్యట్ఠో అభిఞ్ఞేయ్యో.

౧౨. సమథస్స అవిక్ఖేపట్ఠో అభిఞ్ఞేయ్యో; విపస్సనాయ అనుపస్సనట్ఠో అభిఞ్ఞేయ్యో; సమథవిపస్సనానం ఏకరసట్ఠో అభిఞ్ఞేయ్యో; యుగనద్ధస్స అనతివత్తనట్ఠో అభిఞ్ఞేయ్యో; సిక్ఖాయ సమాదానట్ఠో అభిఞ్ఞేయ్యో; ఆరమ్మణస్స గోచరట్ఠో అభిఞ్ఞేయ్యో; లీనస్స చిత్తస్స పగ్గహట్ఠో అభిఞ్ఞేయ్యో; ఉద్ధతస్స చిత్తస్స నిగ్గహట్ఠో అభిఞ్ఞేయ్యో; ఉభోవిసుద్ధానం అజ్ఝుపేక్ఖనట్ఠో అభిఞ్ఞేయ్యో; విసేసాధిగమట్ఠో అభిఞ్ఞేయ్యో; ఉత్తరి పటివేధట్ఠో అభిఞ్ఞేయ్యో; సచ్చాభిసమయట్ఠో అభిఞ్ఞేయ్యో; నిరోధే పతిట్ఠాపకట్ఠో అభిఞ్ఞేయ్యో.

సద్ధిన్ద్రియస్స అధిమోక్ఖట్ఠో అభిఞ్ఞేయ్యో; వీరియిన్ద్రియస్స పగ్గహట్ఠో అభిఞ్ఞేయ్యో; సతిన్ద్రియస్స ఉపట్ఠానట్ఠో అభిఞ్ఞేయ్యో; సమాధిన్ద్రియస్స అవిక్ఖేపట్ఠో అభిఞ్ఞేయ్యో; పఞ్ఞిన్ద్రియస్స దస్సనట్ఠో అభిఞ్ఞేయ్యో.

సద్ధాబలస్స అస్సద్ధియే అకమ్పియట్ఠో అభిఞ్ఞేయ్యో; వీరియబలస్స కోసజ్జే అకమ్పియట్ఠో అభిఞ్ఞేయ్యో; సతిబలస్స పమాదే అకమ్పియట్ఠో అభిఞ్ఞేయ్యో; సమాధిబలస్స ఉద్ధచ్చే అకమ్పియట్ఠో అభిఞ్ఞేయ్యో; పఞ్ఞాబలస్స అవిజ్జాయ అకమ్పియట్ఠో అభిఞ్ఞేయ్యో.

సతిసమ్బోజ్ఝఙ్గస్స ఉపట్ఠానట్ఠో అభిఞ్ఞేయ్యో; ధమ్మవిచయసమ్బోజ్ఝఙ్గస్స పవిచయట్ఠో అభిఞ్ఞేయ్యో; వీరియసమ్బోజ్ఝఙ్గస్స పగ్గహట్ఠో అభిఞ్ఞేయ్యో; పీతిసమ్బోజ్ఝఙ్గస్స ఫరణట్ఠో అభిఞ్ఞేయ్యో; పస్సద్ధిసమ్బోజ్ఝఙ్గస్స ఉపసమట్ఠో అభిఞ్ఞేయ్యో; సమాధిసమ్బోజ్ఝఙ్గస్స అవిక్ఖేపట్ఠో అభిఞ్ఞేయ్యో; ఉపేక్ఖాసమ్బోజ్ఝఙ్గస్స పటిసఙ్ఖానట్ఠో అభిఞ్ఞేయ్యో.

సమ్మాదిట్ఠియా దస్సనట్ఠో అభిఞ్ఞేయ్యో; సమ్మాసఙ్కప్పస్స అభినిరోపనట్ఠో అభిఞ్ఞేయ్యో; సమ్మావాచాయ పరిగ్గహట్ఠో అభిఞ్ఞేయ్యో; సమ్మాకమ్మన్తస్స సముట్ఠానట్ఠో అభిఞ్ఞేయ్యో; సమ్మాఆజీవస్స వోదానట్ఠో అభిఞ్ఞేయ్యో; సమ్మావాయామస్స పగ్గహట్ఠో అభిఞ్ఞేయ్యో; సమ్మాసతియా ఉపట్ఠానట్ఠో అభిఞ్ఞేయ్యో; సమ్మాసమాధిస్స అవిక్ఖేపట్ఠో అభిఞ్ఞేయ్యో.

౧౩. ఇన్ద్రియానం ఆధిపతేయ్యట్ఠో అభిఞ్ఞేయ్యో; బలానం అకమ్పియట్ఠో అభిఞ్ఞేయ్యో; బోజ్ఝఙ్గానం నియ్యానట్ఠో అభిఞ్ఞేయ్యో; మగ్గస్స హేతుట్ఠో అభిఞ్ఞేయ్యో; సతిపట్ఠానానం ఉపట్ఠానట్ఠో అభిఞ్ఞేయ్యో; సమ్మప్పధానానం పదహనట్ఠో అభిఞ్ఞేయ్యో; ఇద్ధిపాదానం ఇజ్ఝనట్ఠో అభిఞ్ఞేయ్యో; సచ్చానం తథట్ఠో అభిఞ్ఞేయ్యో; పయోగానం [మగ్గానం (సబ్బత్థ) అట్ఠకథా పస్సితబ్బా] పటిప్పస్సద్ధట్ఠో అభిఞ్ఞేయ్యో; ఫలానం సచ్ఛికిరియట్ఠో అభిఞ్ఞేయ్యో.

వితక్కస్స అభినిరోపనట్ఠో అభిఞ్ఞేయ్యో; విచారస్స ఉపవిచారట్ఠో అభిఞ్ఞేయ్యో; పీతియా ఫరణట్ఠో అభిఞ్ఞేయ్యో; సుఖస్స అభిసన్దనట్ఠో అభిఞ్ఞేయ్యో. చిత్తస్స ఏకగ్గట్ఠో అభిఞ్ఞేయ్యో. ఆవజ్జనట్ఠో అభిఞ్ఞేయ్యో; విజాననట్ఠో అభిఞ్ఞేయ్యో; పజాననట్ఠో అభిఞ్ఞేయ్యో; సఞ్జాననట్ఠో అభిఞ్ఞేయ్యో; ఏకోదట్ఠో అభిఞ్ఞేయ్యో. అభిఞ్ఞాయ ఞాతట్ఠో అభిఞ్ఞేయ్యో; పరిఞ్ఞాయ తీరణట్ఠో అభిఞ్ఞేయ్యో; పహానస్స పరిచ్చాగట్ఠో అభిఞ్ఞేయ్యో; భావనాయ ఏకరసట్ఠో అభిఞ్ఞేయ్యో; సచ్ఛికిరియాయ ఫస్సనట్ఠో అభిఞ్ఞేయ్యో; ఖన్ధానం ఖన్ధట్ఠో అభిఞ్ఞేయ్యో; ధాతూనం ధాతుట్ఠో [ధాతట్ఠో (స్యా.)] అభిఞ్ఞేయ్యో; ఆయతనానం ఆయతనట్ఠో అభిఞ్ఞేయ్యో; సఙ్ఖతానం సఙ్ఖతట్ఠో అభిఞ్ఞేయ్యో; అసఙ్ఖతస్స అసఙ్ఖతట్ఠో అభిఞ్ఞేయ్యో.

౧౪. చిత్తట్ఠో అభిఞ్ఞేయ్యో; చిత్తానన్తరియట్ఠో అభిఞ్ఞేయ్యో; చిత్తస్స వుట్ఠానట్ఠో అభిఞ్ఞేయ్యో; చిత్తస్స వివట్టనట్ఠో అభిఞ్ఞేయ్యో; చిత్తస్స హేతుట్ఠో అభిఞ్ఞేయ్యో; చిత్తస్స పచ్చయట్ఠో అభిఞ్ఞేయ్యో; చిత్తస్స వత్థుట్ఠో [వత్థట్ఠో (స్యా.)] అభిఞ్ఞేయ్యో; చిత్తస్స భూమట్ఠో [భుమ్మట్ఠో (స్యా. సీ. అట్ఠ.) (ఏకత్తే ఉపనిబన్ధనట్ఠో అభిఞ్ఞేయ్యో) (క.) అట్ఠకథా పస్సితబ్బా] అభిఞ్ఞేయ్యో; చిత్తస్స ఆరమ్మణట్ఠో అభిఞ్ఞేయ్యో; చిత్తస్స గోచరట్ఠో అభిఞ్ఞేయ్యో; చిత్తస్స చరియట్ఠో అభిఞ్ఞేయ్యో; చిత్తస్స గతట్ఠో అభిఞ్ఞేయ్యో; చిత్తస్స అభినీహారట్ఠో అభిఞ్ఞేయ్యో; చిత్తస్స నియ్యానట్ఠో అభిఞ్ఞేయ్యో; చిత్తస్స నిస్సరణట్ఠో అభిఞ్ఞేయ్యో.

౧౫. ఏకత్తే ఆవజ్జనట్ఠో అభిఞ్ఞేయ్యో; ఏకత్తే విజాననట్ఠో అభిఞ్ఞేయ్యో; ఏకత్తే పజాననట్ఠో అభిఞ్ఞేయ్యో; ఏకత్తే సఞ్జాననట్ఠో అభిఞ్ఞేయ్యో; ఏకత్తే ఏకదట్ఠో అభిఞ్ఞేయ్యో; ఏకత్తే ఉపనిబన్ధట్ఠో అభిఞ్ఞేయ్యో; ఏకత్తే పక్ఖన్దనట్ఠో అభిఞ్ఞేయ్యో; ఏకత్తే పసీదనట్ఠో అభిఞ్ఞేయ్యో; ఏకత్తే సన్తిట్ఠనట్ఠో అభిఞ్ఞేయ్యో; ఏకత్తే విముచ్చనట్ఠో అభిఞ్ఞేయ్యో; ఏకత్తే ‘‘ఏతం సన్త’’న్తి పస్సనట్ఠో అభిఞ్ఞేయ్యో; ఏకత్తే యానీకతట్ఠో అభిఞ్ఞేయ్యో; ఏకత్తే వత్థుకతట్ఠో అభిఞ్ఞేయ్యో; ఏకత్తే అనుట్ఠితట్ఠో అభిఞ్ఞేయ్యో; ఏకత్తే పరిచితట్ఠో అభిఞ్ఞేయ్యో; ఏకత్తే సుసమారద్ధట్ఠో అభిఞ్ఞేయ్యో; ఏకత్తే పరిగ్గహట్ఠో అభిఞ్ఞేయ్యో; ఏకత్తే పరివారట్ఠో అభిఞ్ఞేయ్యో; ఏకత్తే పరిపూరట్ఠో అభిఞ్ఞేయ్యో; ఏకత్తే సమోధానట్ఠో అభిఞ్ఞేయ్యో; ఏకత్తే అధిట్ఠానట్ఠో అభిఞ్ఞేయ్యో; ఏకత్తే ఆసేవనట్ఠో అభిఞ్ఞేయ్యో; ఏకత్తే భావనట్ఠో అభిఞ్ఞేయ్యో; ఏకత్తే బహులీకమ్మట్ఠో అభిఞ్ఞేయ్యో; ఏకత్తే సుసముగ్గతట్ఠో అభిఞ్ఞేయ్యో; ఏకత్తే సువిముత్తట్ఠో అభిఞ్ఞేయ్యో; ఏకత్తే బుజ్ఝనట్ఠో అభిఞ్ఞేయ్యో; ఏకత్తే అనుబుజ్ఝనట్ఠో అభిఞ్ఞేయ్యో; ఏకత్తే పటిబుజ్ఝనట్ఠో అభిఞ్ఞేయ్యో; ఏకత్తే సమ్బుజ్ఝనట్ఠో అభిఞ్ఞేయ్యో; ఏకత్తే బోధనట్ఠో అభిఞ్ఞేయ్యో; ఏకత్తే అనుబోధనట్ఠో అభిఞ్ఞేయ్యో; ఏకత్తే పటిబోధనట్ఠో అభిఞ్ఞేయ్యో; ఏకత్తే సమ్బోధనట్ఠో అభిఞ్ఞేయ్యో; ఏకత్తే బోధిపక్ఖియట్ఠో అభిఞ్ఞేయ్యో; ఏకత్తే అనుబోధిపక్ఖియట్ఠో అభిఞ్ఞేయ్యో; ఏకత్తే పటిబోధిపక్ఖియట్ఠో అభిఞ్ఞేయ్యో; ఏకత్తే సమ్బోధిపక్ఖియట్ఠో అభిఞ్ఞేయ్యో; ఏకత్తే జోతనట్ఠో అభిఞ్ఞేయ్యో; ఏకత్తే ఉజ్జోతనట్ఠో అభిఞ్ఞేయ్యో; ఏకత్తే అనుజోతనట్ఠో అభిఞ్ఞేయ్యో; ఏకత్తే పటిజోతనట్ఠో అభిఞ్ఞేయ్యో; ఏకత్తే సఞ్జోతనట్ఠో అభిఞ్ఞేయ్యో.

౧౬. పతాపనట్ఠో [పకాసనట్ఠో (క.)] అభిఞ్ఞేయ్యో; విరోచనట్ఠో అభిఞ్ఞేయ్యో; కిలేసానం సన్తాపనట్ఠో అభిఞ్ఞేయ్యో; అమలట్ఠో అభిఞ్ఞేయ్యో; విమలట్ఠో అభిఞ్ఞేయ్యో; నిమ్మలట్ఠో అభిఞ్ఞేయ్యో; సమట్ఠో అభిఞ్ఞేయ్యో; సమయట్ఠో అభిఞ్ఞేయ్యో; వివేకట్ఠో అభిఞ్ఞేయ్యో; వివేకచరియట్ఠో అభిఞ్ఞేయ్యో; విరాగట్ఠో అభిఞ్ఞేయ్యో; విరాగచరియట్ఠో అభిఞ్ఞేయ్యో; నిరోధట్ఠో అభిఞ్ఞేయ్యో; నిరోధచరియట్ఠో అభిఞ్ఞేయ్యో; వోసగ్గట్ఠో [వోస్సగ్గట్ఠో (స్యా. క.)] అభిఞ్ఞేయ్యో; వోసగ్గచరియట్ఠో అభిఞ్ఞేయ్యో; విముత్తట్ఠో అభిఞ్ఞేయ్యో; విముత్తిచరియట్ఠో అభిఞ్ఞేయ్యో.

ఛన్దట్ఠో అభిఞ్ఞేయ్యో; ఛన్దస్స మూలట్ఠో అభిఞ్ఞేయ్యో; ఛన్దస్స పాదట్ఠో అభిఞ్ఞేయ్యో; ఛన్దస్స పధానట్ఠో అభిఞ్ఞేయ్యో; ఛన్దస్స ఇజ్ఝనట్ఠో అభిఞ్ఞేయ్యో; ఛన్దస్స అధిమోక్ఖట్ఠో అభిఞ్ఞేయ్యో; ఛన్దస్స పగ్గహట్ఠో అభిఞ్ఞేయ్యో; ఛన్దస్స ఉపట్ఠానట్ఠో అభిఞ్ఞేయ్యో; ఛన్దస్స అవిక్ఖేపట్ఠో అభిఞ్ఞేయ్యో; ఛన్దస్స దస్సనట్ఠో అభిఞ్ఞేయ్యో.

వీరియట్ఠో అభిఞ్ఞేయ్యో; వీరియస్స మూలట్ఠో అభిఞ్ఞేయ్యో; వీరియస్స పాదట్ఠో అభిఞ్ఞేయ్యో; వీరియస్స పధానట్ఠో అభిఞ్ఞేయ్యో; వీరియస్స ఇజ్ఝనట్ఠో అభిఞ్ఞేయ్యో; వీరియస్స అధిమోక్ఖట్ఠో అభిఞ్ఞేయ్యో; వీరియస్స పగ్గహట్ఠో అభిఞ్ఞేయ్యో; వీరియస్స ఉపట్ఠానట్ఠో అభిఞ్ఞేయ్యో; వీరియస్స అవిక్ఖేపట్ఠో అభిఞ్ఞేయ్యో; వీరియస్స దస్సనట్ఠో అభిఞ్ఞేయ్యో.

చిత్తట్ఠో అభిఞ్ఞేయ్యో; చిత్తస్స మూలట్ఠో అభిఞ్ఞేయ్యో; చిత్తస్స పాదట్ఠో అభిఞ్ఞేయ్యో; చిత్తస్స పధానట్ఠో అభిఞ్ఞేయ్యో; చిత్తస్స ఇజ్ఝనట్ఠో అభిఞ్ఞేయ్యో; చిత్తస్స అధిమోక్ఖట్ఠో అభిఞ్ఞేయ్యో; చిత్తస్స పగ్గహట్ఠో అభిఞ్ఞేయ్యో; చిత్తస్స ఉపట్ఠానట్ఠో అభిఞ్ఞేయ్యో; చిత్తస్స అవిక్ఖేపట్ఠో అభిఞ్ఞేయ్యో; చిత్తస్స దస్సనట్ఠో అభిఞ్ఞేయ్యో.

వీమంసట్ఠో అభిఞ్ఞేయ్యో; వీమంసాయ మూలట్ఠో అభిఞ్ఞేయ్యో; వీమంసాయ పాదట్ఠో అభిఞ్ఞేయ్యో; వీమంసాయ పధానట్ఠో అభిఞ్ఞేయ్యో; వీమంసాయ ఇజ్ఝనట్ఠో అభిఞ్ఞేయ్యో; వీమంసాయ అధిమోక్ఖట్ఠో అభిఞ్ఞేయ్యో; వీమంసాయ పగ్గహట్ఠో అభిఞ్ఞేయ్యో; వీమంసాయ ఉపట్ఠానట్ఠో అభిఞ్ఞేయ్యో; వీమంసాయ అవిక్ఖేపట్ఠో అభిఞ్ఞేయ్యో; వీమంసాయ దస్సనట్ఠో అభిఞ్ఞేయ్యో.