౮. లోకుత్తరకథా

౪౩. కతమే ధమ్మా లోకుత్తరా? చత్తారో సతిపట్ఠానా, చత్తారో సమ్మప్పధానా, చత్తారో ఇద్ధిపాదా, పఞ్చిన్ద్రియాని, పఞ్చ బలాని, సత్త బోజ్ఝఙ్గా, అరియో అట్ఠఙ్గికో మగ్గో, చత్తారో అరియమగ్గా, చత్తారి చ సామఞ్ఞఫలాని, నిబ్బానఞ్చ – ఇమే ధమ్మా లోకుత్తరా.

లోకుత్తరాతి కేనట్ఠేన లోకుత్తరా? లోకం తరన్తీతి – లోకుత్తరా. లోకా ఉత్తరన్తీతి – లోకుత్తరా. లోకతో ఉత్తరన్తీతి – లోకుత్తరా. లోకమ్హా ఉత్తరన్తీతి – లోకుత్తరా. లోకం అతిక్కమన్తీతి – లోకుత్తరా. లోకం సమతిక్కమన్తీతి – లోకుత్తరా. లోకం సమతిక్కన్తాతి – లోకుత్తరా. లోకేన అతిరేకాతి – లోకుత్తరా. లోకన్తం తరన్తీతి – లోకుత్తరా. లోకా నిస్సరన్తీతి – లోకుత్తరా. లోకతో నిస్సరన్తీతి – లోకుత్తరా. లోకమ్హా నిస్సరన్తీతి – లోకుత్తరా. లోకా నిస్సటాతి – లోకుత్తరా. లోకేన నిస్సటాతి – లోకుత్తరా. లోకమ్హా నిస్సటాతి – లోకుత్తరా. లోకే న తిట్ఠన్తీతి – లోకుత్తరా. లోకస్మిం న తిట్ఠన్తీతి – లోకుత్తరా. లోకే న లిమ్పన్తీతి – లోకుత్తరా. లోకేన న లిమ్పన్తీతి – లోకుత్తరా. లోకే అసంలిత్తాతి – లోకుత్తరా. లోకేన అసంలిత్తాతి – లోకుత్తరా. లోకే అనుపలిత్తాతి – లోకుత్తరా. లోకేన అనుపలిత్తాతి – లోకుత్తరా. లోకే విప్పముత్తాతి – లోకుత్తరా. లోకేన విప్పముత్తాతి – లోకుత్తరా. లోకా విప్పముత్తాతి – లోకుత్తరా. లోకతో విప్పముత్తాతి – లోకుత్తరా. లోకమ్హా విప్పముత్తాతి – లోకుత్తరా. లోకే విసఞ్ఞుత్తాతి – లోకుత్తరా. లోకేన విసఞ్ఞుత్తాతి – లోకుత్తరా. లోకా విసఞ్ఞుత్తాతి – లోకుత్తరా. లోకస్మిం విసఞ్ఞుత్తాతి – లోకుత్తరా. లోకతో విసఞ్ఞుత్తాతి – లోకుత్తరా. లోకమ్హా విసఞ్ఞుత్తాతి – లోకుత్తరా. లోకా సుజ్ఝన్తీతి – లోకుత్తరా. లోకతో సుజ్ఝన్తీతి – లోకుత్తరా. లోకమ్హా సుజ్ఝన్తీతి – లోకుత్తరా. లోకా విసుజ్ఝన్తీతి – లోకుత్తరా. లోకతో విసుజ్ఝన్తీతి – లోకుత్తరా. లోకమ్హా విసుజ్ఝన్తీతి – లోకుత్తరా. లోకా వుట్ఠహన్తీతి [ఉద్ధరన్తీతి (క.), ఉట్ఠహన్తీతి (సీ. అట్ఠ.)] – లోకుత్తరా. లోకతో వుట్ఠహన్తీతి – లోకుత్తరా. లోకమ్హా వుట్ఠహన్తీతి – లోకుత్తరా. లోకా వివట్టన్తీతి – లోకుత్తరా. లోకతో వివట్టన్తీతి – లోకుత్తరా. లోకమ్హా వివట్టన్తీతి – లోకుత్తరా. లోకే న సజ్జన్తీతి – లోకుత్తరా. లోకే న గయ్హన్తీతి – లోకుత్తరా. లోకే న బజ్ఝన్తీతి – లోకుత్తరా. లోకం సముచ్ఛిన్దన్తీతి – లోకుత్తరా. లోకం సముచ్ఛిన్నత్తాతి – లోకుత్తరా. లోకం పటిప్పస్సమ్భేన్తీతి – లోకుత్తరా. లోకం పటిప్పస్సమ్భితత్తాతి – లోకుత్తరా. లోకస్స అపథాతి – లోకుత్తరా. లోకస్స అగతీతి – లోకుత్తరా. లోకస్స అవిసయాతి – లోకుత్తరా. లోకస్స అసాధారణాతి – లోకుత్తరా. లోకం వమన్తీతి – లోకుత్తరా. లోకం న పచ్చావమన్తీతి – లోకుత్తరా. లోకం పజహన్తీతి – లోకుత్తరా. లోకం న ఉపాదియన్తీతి – లోకుత్తరా. లోకం విసినేన్తీతి – లోకుత్తరా. లోకం న ఉస్సినేన్తీతి – లోకుత్తరా. లోకం విధూపేన్తీతి – లోకుత్తరా. లోకం న సంధూపేన్తీతి – లోకుత్తరా. లోకం సమతిక్కమ్మ అభిభుయ్య తిట్ఠన్తీతి – లోకుత్తరా.

లోకుత్తరకథా నిట్ఠితా.