౪. మేత్తాకథా

౨౨. సావత్థినిదానం. ‘‘మేత్తాయ, భిక్ఖవే, చేతోవిముత్తియా ఆసేవితాయ భావితాయ బహులీకతాయ యానీకతాయ వత్థుకతాయ అనుట్ఠితాయ పరిచితాయ సుసమారద్ధాయ ఏకాదసానిసంసా పాటికఙ్ఖా. కతమే ఏకాదస? సుఖం సుపతి, సుఖం పటిబుజ్ఝతి, న పాపకం సుపినం పస్సతి, మనుస్సానం పియో హోతి, అమనుస్సానం పియో హోతి, దేవతా రక్ఖన్తి, నాస్స అగ్గి వా విసం వా సత్థం వా కమతి, తువటం చిత్తం సమాధియతి, ముఖవణ్ణో విప్పసీదతి, అసమ్మూళ్హో కాలఙ్కరోతి, ఉత్తరి [ఉత్తరిం (స్యా. పీ.) అ. ని. ౧౧.౧౫ పస్సితబ్బా] అప్పటివిజ్ఝన్తో బ్రహ్మలోకూపగో హోతి. మేత్తాయ, భిక్ఖవే, చేతోవిముత్తియా ఆసేవితాయ భావితాయ బహులీకతాయ యానీకతాయ వత్థుకతాయ అనుట్ఠితాయ పరిచితాయ సుసమారద్ధాయ – ఇమే ఏకాదసానిసంసా పాటికఙ్ఖా’’.

అత్థి అనోధిసో ఫరణా మేత్తాచేతోవిముత్తి, అత్థి ఓధిసో ఫరణా మేత్తాచేతోవిముత్తి, అత్థి దిసాఫరణా మేత్తాచేతోవిముత్తి. కతిహాకారేహి అనోధిసో ఫరణా మేత్తాచేతోవిముత్తి, కతిహాకారేహి ఓధిసో ఫరణా మేత్తాచేతోవిముత్తి, కతిహాకారేహి దిసాఫరణా మేత్తాచేతోవిముత్తి? పఞ్చహాకారేహి అనోధిసో ఫరణా మేత్తాచేతోవిముత్తి, సత్తహాకారేహి ఓధిసో ఫరణా మేత్తాచేతోవిముత్తి, దసహాకారేహి దిసాఫరణా మేత్తాచేతోవిముత్తి.

కతమేహి పఞ్చహాకారేహి అనోధిసో ఫరణా మేత్తాచేతోవిముత్తి? సబ్బే సత్తా అవేరా అబ్యాపజ్జా [అబ్యాపజ్ఝా (స్యా.)] అనీఘా సుఖీ అత్తానం పరిహరన్తు. సబ్బే పాణా…పే… సబ్బే భూతా…పే… సబ్బే పుగ్గలా…పే… సబ్బే అత్తభావపరియాపన్నా అవేరా అబ్యాపజ్జా అనీఘా సుఖీ అత్తానం పరిహరన్తూతి. ఇమేహి పఞ్చహాకారేహి అనోధిసో ఫరణా మేత్తాచేతోవిముత్తి.

కతమేహి సత్తహాకారేహి ఓధిసో ఫరణా మేత్తాచేతోవిముత్తి? సబ్బా ఇత్థియో అవేరా అబ్యాపజ్జా అనీఘా సుఖీ అత్తానం పరిహరన్తు. సబ్బే పురిసా…పే… సబ్బే అరియా…పే… సబ్బే అనరియా…పే… సబ్బే దేవా…పే… సబ్బే మనుస్సా…పే… సబ్బే వినిపాతికా అవేరా అబ్యాపజ్జా అనీఘా సుఖీ అత్తానం పరిహరన్తూతి. ఇమేహి సత్తహాకారేహి ఓధిసో ఫరణా మేత్తాచేతోవిముత్తి.

కతమేహి దసహాకారేహి దిసాఫరణా మేత్తాచేతోవిముత్తి? సబ్బే పురత్థిమాయ దిసాయ సత్తా అవేరా అబ్యాపజ్జా అనీఘా సుఖీ అత్తానం పరిహరన్తు. సబ్బే పచ్ఛిమాయ దిసాయ సత్తా…పే… సబ్బే ఉత్తరాయ దిసాయ సత్తా…పే… సబ్బే దక్ఖిణాయ దిసాయ సత్తా…పే… సబ్బే పురత్థిమాయ అనుదిసాయ సత్తా…పే… సబ్బే పచ్ఛిమాయ అనుదిసాయ సత్తా…పే… సబ్బే ఉత్తరాయ అనుదిసాయ సత్తా…పే… సబ్బే దక్ఖిణాయ అనుదిసాయ సత్తా…పే… సబ్బే హేట్ఠిమాయ దిసాయ సత్తా…పే… సబ్బే ఉపరిమాయ దిసాయ సత్తా అవేరా అబ్యాపజ్జా అనీఘా సుఖీ అత్తానం పరిహరన్తు. సబ్బే పురత్థిమాయ దిసాయ పాణా…పే… భూతా… పుగ్గలా… అత్తభావపరియాపన్నా… సబ్బా ఇత్థియో… సబ్బే పురిసా… సబ్బే అరియా… సబ్బే అనరియా… సబ్బే దేవా… సబ్బే మనుస్సా… సబ్బే వినిపాతికా అవేరా అబ్యాపజ్జా అనీఘా సుఖీ అత్తానం పరిహరన్తు. సబ్బే పచ్ఛిమాయ దిసాయ వినిపాతికా…పే… సబ్బే ఉత్తరాయ దిసాయ వినిపాతికా… సబ్బే దక్ఖిణాయ దిసాయ వినిపాతికా… సబ్బే పురత్థిమాయ అనుదిసాయ వినిపాతికా… సబ్బే పచ్ఛిమాయ అనుదిసాయ వినిపాతికా… సబ్బే ఉత్తరాయ అనుదిసాయ వినిపాతికా… సబ్బే దక్ఖిణాయ అనుదిసాయ వినిపాతికా… సబ్బే హేట్ఠిమాయ దిసాయ వినిపాతికా… సబ్బే ఉపరిమాయ దిసాయ వినిపాతికా అవేరా అబ్యాపజ్జా అనీఘా సుఖీ అత్తానం పరిహరన్తూతి. ఇమేహి దసహాకారేహి దిసాఫరణా మేత్తాచేతోవిముత్తి.

౧. ఇన్ద్రియవారో

౨౩. సబ్బేసం సత్తానం పీళనం వజ్జేత్వా అపీళనాయ, ఉపఘాతం వజ్జేత్వా అనుపఘాతేన, సన్తాపం వజ్జేత్వా అసన్తాపేన, పరియాదానం వజ్జేత్వా అపరియాదానేన, విహేసం వజ్జేత్వా అవిహేసాయ, సబ్బే సత్తా అవేరినో హోన్తు మా వేరినో, సుఖినో హోన్తు మా దుక్ఖినో, సుఖితత్తా హోన్తు మా దుక్ఖితత్తాతి – ఇమేహి అట్ఠహాకారేహి సబ్బే సత్తే మేత్తాయతీతి – మేత్తా. తం ధమ్మం చేతయతీతి – చేతో. సబ్బబ్యాపాదపరియుట్ఠానేహి విముచ్చతీతి – విముత్తి. మేత్తా చ చేతో చ విముత్తి చాతి – మేత్తాచేతోవిముత్తి.

సబ్బే సత్తా అవేరినో హోన్తు, ఖేమినో హోన్తు, సుఖినో హోన్తూతి – సద్ధాయ అధిముచ్చతి. సద్ధిన్ద్రియపరిభావితా హోతి మేత్తాచేతోవిముత్తి.

సబ్బే సత్తా అవేరినో హోన్తు, ఖేమినో హోన్తు, సుఖినో హోన్తూతి – వీరియం పగ్గణ్హాతి. వీరియిన్ద్రియపరిభావితా హోతి మేత్తాచేతోవిముత్తి.

సబ్బే సత్తా అవేరినో హోన్తు, ఖేమినో హోన్తు, సుఖినో హోన్తూతి – సతిం ఉపట్ఠాపేతి. సతిన్ద్రియపరిభావితా హోతి మేత్తాచేతోవిముత్తి.

సబ్బే సత్తా అవేరినో హోన్తు, ఖేమినో హోన్తు, సుఖినో హోన్తూతి – చిత్తం సమాదహతి. సమాధిన్ద్రియపరిభావితా హోతి మేత్తాచేతోవిముత్తి.

సబ్బే సత్తా అవేరినో హోన్తు, ఖేమినో హోన్తు, సుఖినో హోన్తూతి – పఞ్ఞాయ పజానాతి. పఞ్ఞిన్ద్రియపరిభావితా హోతి మేత్తాచేతోవిముత్తి.

ఇమాని పఞ్చిన్ద్రియాని మేత్తాయ చేతోవిముత్తియా ఆసేవనా హోన్తి. ఇమేహి పఞ్చహి ఇన్ద్రియేహి మేత్తాచేతోవిముత్తి ఆసేవీయతి. ఇమాని పఞ్చిన్ద్రియాని మేత్తాయ చేతోవిముత్తియా భావనా హోన్తి. ఇమేహి పఞ్చహి ఇన్ద్రియేహి మేత్తాచేతోవిముత్తి భావీయతి. ఇమాని పఞ్చిన్ద్రియాని మేత్తాయ చేతోవిముత్తియా బహులీకతా హోన్తి. ఇమేహి పఞ్చహి ఇన్ద్రియేహి మేత్తాచేతోవిముత్తి బహులీకరీయతి. ఇమాని పఞ్చిన్ద్రియాని మేత్తాయ చేతోవిముత్తియా అలఙ్కారా హోన్తి. ఇమేహి పఞ్చహి ఇన్ద్రియేహి మేత్తాచేతోవిముత్తి స్వాలఙ్కతా హోతి. ఇమాని పఞ్చిన్ద్రియాని మేత్తాయ చేతోవిముత్తియా పరిక్ఖారా హోన్తి. ఇమేహి పఞ్చహి ఇన్ద్రియేహి మేత్తాచేతోవిముత్తి సుపరిక్ఖతా హోతి. ఇమాని పఞ్చిన్ద్రియాని మేత్తాయ చేతోవిముత్తియా పరివారా హోన్తి. ఇమేహి పఞ్చహి ఇన్ద్రియేహి మేత్తాచేతోవిముత్తి సుపరివుతా హోతి. ఇమాని పఞ్చిన్ద్రియాని మేత్తాయ చేతోవిముత్తియా ఆసేవనా హోన్తి, భావనా హోన్తి, బహులీకతా హోన్తి, అలఙ్కారా హోన్తి, పరిక్ఖారా హోన్తి, పరివారా హోన్తి, పారిపూరీ హోన్తి, సహగతా హోన్తి, సహజాతా హోన్తి, సంసట్ఠా హోన్తి, సమ్పయుత్తా హోన్తి, పక్ఖన్దనా హోన్తి, పసీదనా [సంసీదనా (క. సీ. అట్ఠ.)] హోన్తి, సన్తిట్ఠనా హోన్తి, విముచ్చనా హోన్తి, ‘‘ఏతం సన్త’’న్తి ఫస్సనా హోన్తి, యానీకతా హోన్తి, వత్థుకతా హోన్తి, అనుట్ఠితా హోన్తి, పరిచితా హోన్తి, సుసమారద్ధా హోన్తి, సుభావితా హోన్తి, స్వాధిట్ఠితా హోన్తి, సుసముగ్గతా హోన్తి, సువిముత్తా హోన్తి, నిబ్బత్తేన్తి జోతేన్తి పతాపేన్తి.

౨. బలవారో

౨౪. సబ్బే సత్తా అవేరినో హోన్తు, ఖేమినో హోన్తు, సుఖినో హోన్తూతి – అస్సద్ధియే న కమ్పతి. సద్ధాబలపరిభావితా హోతి మేత్తాచేతోవిముత్తి.

సబ్బే సత్తా అవేరినో హోన్తు, ఖేమినో హోన్తు, సుఖినో హోన్తూతి – కోసజ్జే న కమ్పతి. వీరియబలపరిభావితా హోతి మేత్తాచేతోవిముత్తి.

సబ్బే సత్తా అవేరినో హోన్తు, ఖేమినో హోన్తు, సుఖినో హోన్తూతి – పమాదే న కమ్పతి. సతిబలపరిభావితా హోతి మేత్తాచేతోవిముత్తి.

సబ్బే సత్తా అవేరినో హోన్తు, ఖేమినో హోన్తు, సుఖినో హోన్తూతి – ఉద్ధచ్చే న కమ్పతి. సమాధిబలపరిభావితా హోతి మేత్తాచేతోవిముత్తి.

సబ్బే సత్తా అవేరినో హోన్తు, ఖేమినో హోన్తు, సుఖినో హోన్తూతి – అవిజ్జాయ న కమ్పతి. పఞ్ఞాబలపరిభావితా హోతి మేత్తాచేతోవిముత్తి.

ఇమాని పఞ్చ బలాని మేత్తాయ చేతోవిముత్తియా ఆసేవనా హోన్తి. ఇమేహి పఞ్చహి బలేహి మేత్తాచేతోవిముత్తి ఆసేవీయతి. ఇమాని పఞ్చ బలాని మేత్తాయ చేతోవిముత్తియా భావనా హోన్తి. ఇమేహి పఞ్చహి బలేహి మేత్తాచేతోవిముత్తి భావీయతి. ఇమాని పఞ్చ బలాని మేత్తాయ చేతోవిముత్తియా బహులీకతా హోన్తి. ఇమేహి పఞ్చహి బలేహి మేత్తాచేతోవిముత్తి బహులీకరీయతి. ఇమాని పఞ్చ బలాని మేత్తాయ చేతోవిముత్తియా అలఙ్కారా హోన్తి. ఇమేహి పఞ్చహి బలేహి మేత్తాచేతోవిముత్తి స్వాలఙ్కతా హోతి. ఇమాని పఞ్చ బలాని మేత్తాయ చేతోవిముత్తియా పరిక్ఖారా హోన్తి. ఇమేహి పఞ్చహి బలేహి మేత్తాచేతోవిముత్తి సుపరిక్ఖతా హోతి. ఇమాని పఞ్చ బలాని మేత్తాయ చేతోవిముత్తియా పరివారా హోన్తి. ఇమేహి పఞ్చహి బలేహి మేత్తాచేతోవిముత్తి సుపరివుతా హోతి. ఇమాని పఞ్చ బలాని మేత్తాయ చేతోవిముత్తియా ఆసేవనా హోన్తి, భావనా హోన్తి, బహులీకతా హోన్తి, అలఙ్కారా హోన్తి, పరిక్ఖారా హోన్తి, పరివారా హోన్తి, పారిపూరీ హోన్తి, సహగతా హోన్తి, సహజాతా హోన్తి, సంసట్ఠా హోన్తి, సమ్పయుత్తా హోన్తి, పక్ఖన్దనా హోన్తి, పసీదనా హోన్తి, సన్తిట్ఠనా హోన్తి, విముచ్చనా హోన్తి, ‘‘ఏతం సన్త’’న్తి ఫస్సనా హోన్తి, యానీకతా హోన్తి, వత్థుకతా హోన్తి, అనుట్ఠితా హోన్తి, పరిచితా హోన్తి, సుసమారద్ధా హోన్తి, సుభావితా హోన్తి, స్వాధిట్ఠితా హోన్తి, సుసముగ్గతా హోన్తి, సువిముత్తా హోన్తి నిబ్బత్తేన్తి జోతేన్తి పతాపేన్తి.

౩. బోజ్ఝఙ్గవారో

౨౫. సబ్బే సత్తా అవేరినో హోన్తు, ఖేమినో హోన్తు, సుఖినో హోన్తూతి – సతిం ఉపట్ఠాపేతి. సతిసమ్బోజ్ఝఙ్గపరిభావితా హోతి మేత్తాచేతోవిముత్తి.

సబ్బే సత్తా అవేరినో హోన్తు, ఖేమినో హోన్తు, సుఖినో హోన్తూతి – పఞ్ఞాయ పవిచినాతి. ధమ్మవిచయసమ్బోజ్ఝఙ్గపరిభావితా హోతి మేత్తాచేతోవిముత్తి.

సబ్బే సత్తా అవేరినో హోన్తు, ఖేమినో హోన్తు, సుఖినో హోన్తూతి – వీరియం పగ్గణ్హాతి. వీరియసమ్బోజ్ఝఙ్గపరిభావితా హోతి మేత్తాచేతోవిముత్తి.

సబ్బే సత్తా అవేరినో హోన్తు, ఖేమినో హోన్తు, సుఖినో హోన్తూతి – పరిళాహం పటిప్పస్సమ్భేతి. పీతిసమ్బోజ్ఝఙ్గపరిభావితా హోతి మేత్తాచేతోవిముత్తి.

సబ్బే సత్తా అవేరినో హోన్తు, ఖేమినో హోన్తు, సుఖినో హోన్తూతి – దుట్ఠుల్లం పటిప్పస్సమ్భేతి. పస్సద్ధిసమ్బోజ్ఝఙ్గపరిభావితా హోతి మేత్తాచేతోవిముత్తి.

సబ్బే సత్తా అవేరినో హోన్తు, ఖేమినో హోన్తు, సుఖినో హోన్తూతి – చిత్తం సమాదహతి. సమాధిసమ్బోజ్ఝఙ్గపరిభావితా హోతి మేత్తాచేతోవిముత్తి.

సబ్బే సత్తా అవేరినో హోన్తు, ఖేమినో హోన్తు, సుఖినో హోన్తూతి – ఞాణేన కిలేసే పటిసఙ్ఖాతి. ఉపేక్ఖాసమ్బోజ్ఝఙ్గపరిభావితా హోతి మేత్తాచేతోవిముత్తి.

ఇమే సత్త బోజ్ఝఙ్గా మేత్తాయ చేతోవిముత్తియా ఆసేవనా హోన్తి. ఇమేహి సత్తహి బోజ్ఝఙ్గేహి మేత్తాచేతోవిముత్తి ఆసేవీయతి. ఇమే సత్త బోజ్ఝఙ్గా మేత్తాయ చేతోవిముత్తియా భావనా హోన్తి. ఇమేహి సత్తహి బోజ్ఝఙ్గేహి మేత్తాచేతోవిముత్తి భావీయతి. ఇమే సత్త బోజ్ఝఙ్గా మేత్తాయ చేతోవిముత్తియా బహులీకతా హోన్తి. ఇమేహి సత్తహి బోజ్ఝఙ్గేహి మేత్తాచేతోవిముత్తి బహులీకరీయతి. ఇమే సత్త బోజ్ఝఙ్గా మేత్తాయ చేతోవిముత్తియా అలఙ్కారా హోన్తి. ఇమేహి సత్తహి బోజ్ఝఙ్గేహి మేత్తాచేతోవిముత్తి స్వాలఙ్కతా హోతి. ఇమే సత్త బోజ్ఝఙ్గా మేత్తాయ చేతోవిముత్తియా పరిక్ఖారా హోన్తి. ఇమేహి సత్తహి బోజ్ఝఙ్గేహి మేత్తాచేతోవిముత్తి సుపరిక్ఖతా హోతి. ఇమే సత్త బోజ్ఝఙ్గా మేత్తాయ చేతోవిముత్తియా పరివారా హోన్తి. ఇమేహి సత్తహి బోజ్ఝఙ్గేహి మేత్తాచేతోవిముత్తి సుపరివుతా హోతి. ఇమే సత్త బోజ్ఝఙ్గా మేత్తాయ చేతోవిముత్తియా ఆసేవనా హోన్తి, భావనా హోన్తి, బహులీకతా హోన్తి, అలఙ్కారా హోన్తి, పరిక్ఖారా హోన్తి, పరివారా హోన్తి, పారిపూరీ హోన్తి, సహగతా హోన్తి, సహజాతా హోన్తి, సంసట్ఠా హోన్తి, సమ్పయుత్తా హోన్తి, పక్ఖన్దనా హోన్తి, పసీదనా హోన్తి, సన్తిట్ఠనా హోన్తి, విముచ్చనా హోన్తి, ‘‘ఏతం సన్త’’న్తి ఫస్సనా హోన్తి, యానీకతా హోన్తి, వత్థుకతా హోన్తి, అనుట్ఠితా హోన్తి, పరిచితా హోన్తి, సుసమారద్ధా హోన్తి, సుభావితా హోన్తి, స్వాధిట్ఠితా హోన్తి, సుసముగ్గతా హోన్తి, సువిముత్తా హోన్తి, నిబ్బత్తేన్తి జోతేన్తి పతాపేన్తి.

౪. మగ్గఙ్గవారో

౨౬. సబ్బే సత్తా అవేరినో హోన్తు, ఖేమినో హోన్తు, సుఖినో హోన్తూతి – సమ్మా పస్సతి. సమ్మాదిట్ఠిపరిభావితా హోతి మేత్తాచేతోవిముత్తి.

సబ్బే సత్తా అవేరినో హోన్తు, ఖేమినో హోన్తు, సుఖినో హోన్తూతి – సమ్మా అభినిరోపేతి. సమ్మాసఙ్కప్పపరిభావితా హోతి మేత్తాచేతోవిముత్తి.

సబ్బే సత్తా అవేరినో హోన్తు, ఖేమినో హోన్తు, సుఖినో హోన్తూతి – సమ్మా పరిగ్గణ్హాతి. సమ్మావాచాపరిభావితా హోతి మేత్తాచేతోవిముత్తి.

సబ్బే సత్తా అవేరినో హోన్తు, ఖేమినో హోన్తు, సుఖినో హోన్తూతి – సమ్మా సముట్ఠాపేతి. సమ్మాకమ్మన్తపరిభావితా హోతి మేత్తాచేతోవిముత్తి.

సబ్బే సత్తా అవేరినో హోన్తు, ఖేమినో హోన్తు, సుఖినో హోన్తూతి – సమ్మా వోదాపేతి. సమ్మాఆజీవపరిభావితా హోతి మేత్తాచేతోవిముత్తి.

సబ్బే సత్తా అవేరినో హోన్తు, ఖేమినో హోన్తు, సుఖినో హోన్తూతి – సమ్మా పగ్గణ్హాతి. సమ్మావాయామపరిభావితా హోతి మేత్తాచేతోవిముత్తి.

సబ్బే సత్తా అవేరినో హోన్తు, ఖేమినో హోన్తు, సుఖినో హోన్తూతి – సమ్మా ఉపట్ఠాపేతి. సమ్మాసతిపరిభావితా హోతి మేత్తాచేతోవిముత్తి.

సబ్బే సత్తా అవేరినో హోన్తు, ఖేమినో హోన్తు, సుఖినో హోన్తూతి – సమ్మా సమాదహతి. సమ్మాసమాధిపరిభావితా హోతి మేత్తాచేతోవిముత్తి.

ఇమే అట్ఠ మగ్గఙ్గా మేత్తాయ చేతోవిముత్తియా ఆసేవనా హోన్తి. ఇమేహి అట్ఠహి మగ్గఙ్గేహి మేత్తాచేతోవిముత్తి ఆసేవీయతి. ఇమే అట్ఠ మగ్గఙ్గా మేత్తాయ చేతోవిముత్తియా భావనా హోన్తి. ఇమేహి అట్ఠహి మగ్గఙ్గేహి మేత్తాచేతోవిముత్తి భావీయతి. ఇమే అట్ఠ మగ్గఙ్గా మేత్తాయ చేతోవిముత్తియా బహులీకతా హోన్తి. ఇమేహి అట్ఠహి మగ్గఙ్గేహి మేత్తాచేతోవిముత్తి బహులీకరీయతి. ఇమే అట్ఠ మగ్గఙ్గా మేత్తాయ చేతోవిముత్తియా అలఙ్కారా హోన్తి. ఇమేహి అట్ఠహి మగ్గఙ్గేహి మేత్తాచేతోవిముత్తి స్వాలఙ్కతా హోన్తి. ఇమే అట్ఠ మగ్గఙ్గా మేత్తాయ చేతోవిముత్తియా పరిక్ఖారా హోన్తి. ఇమేహి అట్ఠహి మగ్గఙ్గేహి మేత్తాచేతోవిముత్తి సుపరిక్ఖతా హోతి. ఇమే అట్ఠ మగ్గఙ్గా మేత్తాయ చేతోవిముత్తియా పరివారా హోన్తి. ఇమేహి అట్ఠహి మగ్గఙ్గేహి మేత్తాచేతోవిముత్తి సుపరివుతా హోతి. ఇమే అట్ఠ మగ్గఙ్గా మేత్తాయ చేతోవిముత్తియా ఆసేవనా హోన్తి, భావనా హోన్తి, బహులీకతా హోన్తి, అలఙ్కారా హోన్తి, పరిక్ఖారా హోన్తి, పరివారా హోన్తి, పారిపూరీ హోన్తి, సహగతా హోన్తి, సహజాతా హోన్తి, సంసట్ఠా హోన్తి, సమ్పయుత్తా హోన్తి, పక్ఖన్దనా హోన్తి, పసీదనా హోన్తి, సన్తిట్ఠనా హోన్తి, విముచ్చనా హోన్తి, ‘‘ఏతం సన్త’’న్తి ఫస్సనా హోన్తి, యానీకతా హోన్తి, వత్థుకతా హోన్తి, అనుట్ఠితా హోన్తి, పరిచితా హోన్తి, సుసమారద్ధా హోన్తి, సుభావితా హోన్తి, స్వాధిట్ఠితా హోన్తి, సుసముగ్గతా హోన్తి, సువిముత్తా హోన్తి నిబ్బత్తేన్తి జోతేన్తి పతాపేన్తి.

౨౭. సబ్బేసం పాణానం…పే… సబ్బేసం భూతానం… సబ్బేసం పుగ్గలానం… సబ్బేసం అత్తభావపరియాపన్నానం… సబ్బాసం ఇత్థీనం… సబ్బేసం పురిసానం… సబ్బేసం అరియానం… సబ్బేసం అనరియానం… సబ్బేసం దేవానం… సబ్బేసం మనుస్సానం… సబ్బేసం వినిపాతికానం పీళనం వజ్జేత్వా అపీళనాయ, ఉపఘాతం వజ్జేత్వా అనుపఘాతేన, సన్తాపం వజ్జేత్వా అసన్తాపేన, పరియాదానం వజ్జేత్వా అపరియాదానేన, విహేసం వజ్జేత్వా అవిహేసాయ, సబ్బే వినిపాతికా అవేరినో హోన్తు మా వేరినో, సుఖినో హోన్తు మా దుక్ఖినో, సుఖితత్తా హోన్తు మా దుక్ఖితత్తాతి – ఇమేహి అట్ఠహాకారేహి సబ్బే వినిపాతికే మేత్తాయతీతి – మేత్తా. తం ధమ్మం చేతయతీతి – చేతో. సబ్బబ్యాపాదపరియుట్ఠానేహి విముచ్చతీతి – విముత్తి. మేత్తా చ చేతో చ విముత్తి చాతి – మేత్తాచేతోవిముత్తి.

సబ్బే వినిపాతికా అవేరినో హోన్తు, ఖేమినో హోన్తు, సుఖినో హోన్తూతి – సద్ధాయ అధిముచ్చతి. సద్ధిన్ద్రియపరిభావితా హోతి మేత్తాచేతోవిముత్తి…పే… నిబ్బత్తేన్తి జోతేన్తి పతాపేన్తి.

సబ్బేసం పురత్థిమాయ దిసాయ సత్తానం…పే… సబ్బేసం పచ్ఛిమాయ దిసాయ సత్తానం… సబ్బేసం ఉత్తరాయ దిసాయ సత్తానం… సబ్బేసం దక్ఖిణాయ దిసాయ సత్తానం… సబ్బేసం పురత్థిమాయ అనుదిసాయ సత్తానం… సబ్బేసం పచ్ఛిమాయ అనుదిసాయ సత్తానం… సబ్బేసం ఉత్తరాయ అనుదిసాయ సత్తానం… సబ్బేసం దక్ఖిణాయ అనుదిసాయ సత్తానం… సబ్బేసం హేట్ఠిమాయ దిసాయ సత్తానం… సబ్బేసం ఉపరిమాయ దిసాయ సత్తానం పీళనం వజ్జేత్వా అపీళనాయ, ఉపఘాతం వజ్జేత్వా అనుపఘాతేన, సన్తాపం వజ్జేత్వా అసన్తాపేన, పరియాదానం వజ్జేత్వా అపరియాదానేన, విహేసం వజ్జేత్వా అవిహేసాయ, సబ్బే ఉపరిమాయ దిసాయ సత్తా అవేరినో హోన్తు మా వేరినో, సుఖినో హోన్తు మా దుక్ఖినో, సుఖితత్తా హోన్తు మా దుక్ఖితత్తాతి – ఇమేహి అట్ఠహాకారేహి సబ్బే ఉపరిమాయ దిసాయ సత్తే మేత్తాయతీతి – మేత్తా. తం ధమ్మం చేతయతీతి – చేతో. సబ్బబ్యాపాదపరియుట్ఠానేహి విముచ్చతీతి – విముత్తి. మేత్తా చ చేతో చ విముత్తి చాతి – మేత్తాచేతోవిముత్తి.

సబ్బే ఉపరిమాయ దిసాయ సత్తా అవేరినో హోన్తు, ఖేమినో హోన్తు, సుఖినో హోన్తూతి – సద్ధాయ అధిముచ్చతి. సద్ధిన్ద్రియపరిభావితా హోతి మేత్తాచేతోవిముత్తి…పే… నిబ్బత్తేన్తి జోతేన్తి పతాపేన్తి.

సబ్బేసం పురత్థిమాయ దిసాయ పాణానం…పే… భూతానం… పుగ్గలానం అత్తభావపరియాపన్నానం… సబ్బాసం ఇత్థీనం… సబ్బేసం పురిసానం… సబ్బేసం అరియానం… సబ్బేసం అనరియానం… సబ్బేసం దేవానం… సబ్బేసం మనుస్సానం… సబ్బేసం వినిపాతికానం… సబ్బేసం పచ్ఛిమాయ దిసాయ వినిపాతికానం… సబ్బేసం ఉత్తరాయ దిసాయ వినిపాతికానం… సబ్బేసం దక్ఖిణాయ దిసాయ వినిపాతికానం… సబ్బేసం పురత్థిమాయ అనుదిసాయ వినిపాతికానం… సబ్బేసం పచ్ఛిమాయ అనుదిసాయ వినిపాతికానం… సబ్బేసం ఉత్తరాయ అనుదిసాయ వినిపాతికానం… సబ్బేసం దక్ఖిణాయ అనుదిసాయ వినిపాతికానం… సబ్బేసం హేట్ఠిమాయ దిసాయ వినిపాతికానం… సబ్బేసం ఉపరిమాయ దిసాయ వినిపాతికానం పీళనం వజ్జేత్వా అపీళనాయ, ఉపఘాతం వజ్జేత్వా అనుపఘాతేన, సన్తాపం వజ్జేత్వా అసన్తాపేన, పరియాదానం వజ్జేత్వా అపరియాదానేన, విహేసం వజ్జేత్వా అవిహేసాయ, సబ్బే ఉపరిమాయ దిసాయ వినిపాతికా అవేరినో హోన్తు మా వేరినో, సుఖినో హోన్తు మా దుక్ఖినో, సుఖితత్తా హోన్తు మా దుక్ఖితత్తాతి – ఇమేహి అట్ఠహాకారేహి సబ్బే ఉపరిమాయ దిసాయ వినిపాతికే మేత్తాయతీతి – మేత్తా. తం ధమ్మం చేతయతీతి – చేతో. సబ్బబ్యాపాదపరియుట్ఠానేహి విముచ్చతీతి – విముత్తి. మేత్తా చ చేతో చ విముత్తి చాతి – మేత్తాచేతోవిముత్తి.

సబ్బే ఉపరిమాయ దిసాయ వినిపాతికా అవేరినో హోన్తు, ఖేమినో హోన్తు, సుఖినో హోన్తూతి – సద్ధాయ అధిముచ్చతి. సద్ధిన్ద్రియపరిభావితా హోతి మేత్తాచేతోవిముత్తి.

సబ్బే ఉపరిమాయ దిసాయ వినిపాతికా అవేరినో హోన్తు, ఖేమినో హోన్తు, సుఖినో హోన్తూతి – వీరియం పగ్గణ్హాతి. వీరియిన్ద్రియపరిభావితా హోతి మేత్తాచేతోవిముత్తి.

సతిం ఉపట్ఠాపేతి. సతిన్ద్రియపరిభావితా హోతి మేత్తాచేతోవిముత్తి. చిత్తం సమాదహతి. సమాధిన్ద్రియపరిభావితా హోతి మేత్తాచేతోవిముత్తి. పఞ్ఞాయ పజానాతి. పఞ్ఞిన్ద్రియపరిభావితా హోతి మేత్తాచేతోవిముత్తి.

ఇమాని పఞ్చిన్ద్రియాని మేత్తాయ చేతోవిముత్తియా ఆసేవనా హోన్తి. ఇమేహి పఞ్చహి ఇన్ద్రియేహి మేత్తాచేతోవిముత్తి ఆసేవీయతి…పే… నిబ్బత్తేన్తి జోతేన్తి పతాపేన్తి.

సబ్బే ఉపరిమాయ దిసాయ వినిపాతికా అవేరినో హోన్తు, ఖేమినో హోన్తు, సుఖినో హోన్తూతి – అస్సద్ధియే న కమ్పతి. సద్ధాబలపరిభావితా హోతి మేత్తాచేతోవిముత్తి. కోసజ్జే న కమ్పతి. వీరియబలపరిభావితా హోతి మేత్తాచేతోవిముత్తి. పమాదే న కమ్పతి. సతిబలపరిభావితా హోతి మేత్తాచేతోవిముత్తి. ఉద్ధచ్చే న కమ్పతి. సమాధిబలపరిభావితా హోతి మేత్తాచేతోవిముత్తి. అవిజ్జాయ న కమ్పతి. పఞ్ఞాబలపరిభావితా హోతి మేత్తాచేతోవిముత్తి.

ఇమాని పఞ్చ బలాని మేత్తాయ చేతోవిముత్తియా ఆసేవనా హోన్తి. ఇమేహి పఞ్చహి బలేహి మేత్తాచేతోవిముత్తి ఆసేవీయతి…పే… నిబ్బత్తేన్తి జోతేన్తి పతాపేన్తి.

సబ్బే ఉపరిమాయ దిసాయ వినిపాతికా అవేరినో హోన్తు, ఖేమినో హోన్తు, సుఖినో హోన్తూతి – సతిం ఉపట్ఠాపేతి. సతిసమ్బోజ్ఝఙ్గపరిభావితా హోతి మేత్తాచేతోవిముత్తి.

పఞ్ఞాయ పవిచినాతి. ధమ్మవిచయసమ్బోజ్ఝఙ్గపరిభావితా హోతి మేత్తాచేతోవిముత్తి. వీరియం పగ్గణ్హాతి. వీరియసమ్బోజ్ఝఙ్గపరిభావితా హోతి మేత్తాచేతోవిముత్తి. పరిళాహం పటిప్పస్సమ్భేతి. పీతిసమ్బోజ్ఝఙ్గపరిభావితా హోతి మేత్తాచేతోవిముత్తి. దుట్ఠుల్లం పటిప్పస్సమ్భేతి. పస్సద్ధిసమ్బోజ్ఝఙ్గపరిభావితా హోతి మేత్తాచేతోవిముత్తి. చిత్తం సమాదహతి. సమాధిసమ్బోజ్ఝఙ్గపరిభావితా హోతి మేత్తాచేతోవిముత్తి. ఞాణేన కిలేసే పటిసఙ్ఖాతి. ఉపేక్ఖాసమ్బోజ్ఝఙ్గపరిభావితా హోతి మేత్తాచేతోవిముత్తి.

ఇమే సత్త బోజ్ఝఙ్గా మేత్తాయ చేతోవిముత్తియా ఆసేవనా హోన్తి. ఇమేహి సత్తహి బోజ్ఝఙ్గేహి మేత్తాచేతోవిముత్తి ఆసేవీయతి…పే… నిబ్బత్తేన్తి జోతేన్తి పతాపేన్తి.

సబ్బే ఉపరిమాయ దిసాయ వినిపాతికా అవేరినో హోన్తు, ఖేమినో హోన్తు, సుఖినో హోన్తూతి – సమ్మా పస్సతి. సమ్మాదిట్ఠి పరిభావితా హోతి మేత్తాచేతోవిముత్తి. సమ్మా అభినిరోపేతి. సమ్మాసఙ్కప్పపరిభావితా హోతి మేత్తాచేతోవిముత్తి. సమ్మా పరిగ్గణ్హాతి. సమ్మావాచాపరిభావితా హోతి మేత్తాచేతోవిముత్తి. సమ్మా సముట్ఠాపేతి. సమ్మాకమ్మన్తపరిభావితా హోతి మేత్తాచేతోవిముత్తి. సమ్మా వోదాపేతి. సమ్మా ఆజీవపరిభావితా హోతి మేత్తాచేతోవిముత్తి. సమ్మా పగ్గణ్హాతి. సమ్మావాయామపరిభావితా హోతి మేత్తాచేతోవిముత్తి. సమ్మా ఉపట్ఠాతి. సమ్మాసతిపరిభావితా హోతి మేత్తాచేతోవిముత్తి. సమ్మా సమాదహతి. సమ్మాసమాధిపరిభావితా హోతి మేత్తాచేతోవిముత్తి.

ఇమే అట్ఠ మగ్గఙ్గా మేత్తాయ చేతోవిముత్తియా ఆసేవనా హోన్తి. ఇమేహి అట్ఠహి మగ్గఙ్గేహి మేత్తాచేతోవిముత్తి ఆసేవీయతి…పే… ఇమే అట్ఠ మగ్గఙ్గా మేత్తాయ చేతోవిముత్తియా పరిభావితా హోన్తి. ఇమేహి అట్ఠహి మగ్గఙ్గేహి మేత్తాచేతోవిముత్తి సుపరివుతా హోతి. ఇమే అట్ఠ మగ్గఙ్గా మేత్తాయ చేతోవిముత్తియా ఆసేవనా హోన్తి, భావనా హోన్తి, బహులీకతా హోన్తి, అలఙ్కారా హోన్తి, పరిక్ఖారా హోన్తి, పరివారా హోన్తి, పారిపూరీ హోన్తి, సహగతా హోన్తి, సహజాతా హోన్తి, సంసట్ఠా హోన్తి, సమ్పయుత్తా హోన్తి, పక్ఖన్దనా హోన్తి, పసీదనా హోన్తి, సన్తిట్ఠనా హోన్తి, విముచ్చనా హోన్తి, ‘‘ఏతం సన్త’’న్తి ఫస్సనా హోన్తి, యానీకతా హోన్తి, వత్థుకతా హోన్తి, అనుట్ఠితా హోన్తి, పరిచితా హోన్తి, సుసమారద్ధా హోన్తి, సుభావితా హోన్తి, స్వాధిట్ఠితా హోన్తి, సుసముగ్గతా హోన్తి, సువిముత్తా హోన్తి నిబ్బత్తేన్తి జోతేన్తి పతాపేన్తీతి.

మేత్తాకథా నిట్ఠితా.