౩. బోజ్ఝఙ్గకథా

౧౭. సావత్థినిదానం. ‘‘సత్తిమే, భిక్ఖవే [సం. ని. ౫.౨౦౦], బోజ్ఝఙ్గా. కతమే సత్త? సతిసమ్బోజ్ఝఙ్గో, ధమ్మవిచయసమ్బోజ్ఝఙ్గో, వీరియసమ్బోజ్ఝఙ్గో, పీతిసమ్బోజ్ఝఙ్గో, పస్సద్ధిసమ్బోజ్ఝఙ్గో, సమాధిసమ్బోజ్ఝఙ్గో, ఉపేక్ఖాసమ్బోజ్ఝఙ్గో – ఇమే ఖో, భిక్ఖవే, సత్త బోజ్ఝఙ్గా’’.

బోజ్ఝఙ్గాతి కేనట్ఠేన బోజ్ఝఙ్గా? బోధాయ సంవత్తన్తీతి – బోజ్ఝఙ్గా. బుజ్ఝన్తీతి – బోజ్ఝఙ్గా. అనుబుజ్ఝన్తీతి – బోజ్ఝఙ్గా. పటిబుజ్ఝన్తీతి – బోజ్ఝఙ్గా. సమ్బుజ్ఝన్తీతి – బోజ్ఝఙ్గా.

బుజ్ఝనట్ఠేన బోజ్ఝఙ్గా, అనుబుజ్ఝనట్ఠేన బోజ్ఝఙ్గా, పటిబుజ్ఝనట్ఠేన బోజ్ఝఙ్గా, సమ్బుజ్ఝనట్ఠేన బోజ్ఝఙ్గా.

బోధేన్తీతి – బోజ్ఝఙ్గా. అనుబోధేన్తీతి – బోజ్ఝఙ్గా. పటిబోధేన్తీతి – బోజ్ఝఙ్గా. సమ్బోధేన్తీతి – బోజ్ఝఙ్గా.

బోధనట్ఠేన బోజ్ఝఙ్గా, అనుబోధనట్ఠేన బోజ్ఝఙ్గా, పటిబోధనట్ఠేన బోజ్ఝఙ్గా, సమ్బోధనట్ఠేన బోజ్ఝఙ్గా.

బోధిపక్ఖియట్ఠేన బోజ్ఝఙ్గా, అనుబోధిపక్ఖియట్ఠేన బోజ్ఝఙ్గా, పటిబోధిపక్ఖియట్ఠేన బోజ్ఝఙ్గా, సమ్బోధిపక్ఖియట్ఠేన బోజ్ఝఙ్గా.

బుద్ధిలభనట్ఠేన బోజ్ఝఙ్గా, బుద్ధిపటిలభనట్ఠేన బోజ్ఝఙ్గా, బుద్ధిరోపనట్ఠేన బోజ్ఝఙ్గా, బుద్ధిఅభిరోపనట్ఠేన బోజ్ఝఙ్గా, బుద్ధిపాపనట్ఠేన బోజ్ఝఙ్గా, బుద్ధిసమ్పాపనట్ఠేన బోజ్ఝఙ్గా.

మూలమూలకాదిదసకం

౧౮. మూలట్ఠేన బోజ్ఝఙ్గా, మూలచరియట్ఠేన బోజ్ఝఙ్గా, మూలపరిగ్గహట్ఠేన బోజ్ఝఙ్గా, మూలపరివారట్ఠేన బోజ్ఝఙ్గా, మూలపరిపూరణట్ఠేన [మూలపరిపూరట్ఠేన (స్యా. క.) ఏవముపరిపి] బోజ్ఝఙ్గా, మూలపరిపాకట్ఠేన బోజ్ఝఙ్గా, మూలపటిసమ్భిదట్ఠేన బోజ్ఝఙ్గా, మూలపటిసమ్భిదాపాపనట్ఠేన బోజ్ఝఙ్గా, మూలపటిసమ్భిదాయ వసీభావట్ఠేన బోజ్ఝఙ్గా, మూలపటిసమ్భిదాయ వసీభావప్పత్తానమ్పి బోజ్ఝఙ్గా.

హేతుట్ఠేన బోజ్ఝఙ్గా, హేతుచరియట్ఠేన బోజ్ఝఙ్గా, హేతుపరిగ్గహట్ఠేన బోజ్ఝఙ్గా, హేతుపరివారట్ఠేన బోజ్ఝఙ్గా, హేతుపరిపూరణట్ఠేన బోజ్ఝఙ్గా, హేతుపరిపాకట్ఠేన బోజ్ఝఙ్గా, హేతుపటిసమ్భిదట్ఠేన బోజ్ఝఙ్గా, హేతుపటిసమ్భిదాపాపనట్ఠేన బోజ్ఝఙ్గా, హేతుపటిసమ్భిదాయ వసీభావట్ఠేన బోజ్ఝఙ్గా, హేతుపటిసమ్భిదాయ వసీభావప్పత్తానమ్పి బోజ్ఝఙ్గా.

పచ్చయట్ఠేన బోజ్ఝఙ్గా, పచ్చయచరియట్ఠేన బోజ్ఝఙ్గా, పచ్చయపరిగ్గహట్ఠేన బోజ్ఝఙ్గా, పచ్చయపరివారట్ఠేన బోజ్ఝఙ్గా, పచ్చయపరిపూరణట్ఠేన బోజ్ఝఙ్గా, పచ్చయపరిపాకట్ఠేన బోజ్ఝఙ్గా, పచ్చయపటిసమ్భిదట్ఠేన బోజ్ఝఙ్గా, పచ్చయపటిసమ్భిదాపాపనట్ఠేన బోజ్ఝఙ్గా, పచ్చయపటిసమ్భిదాయ వసీభావట్ఠేన బోజ్ఝఙ్గా, పచ్చయపటిసమ్భిదాయ వసీభావప్పత్తానమ్పి బోజ్ఝఙ్గా.

విసుద్ధట్ఠేన బోజ్ఝఙ్గా, విసుద్ధిచరియట్ఠేన బోజ్ఝఙ్గా, విసుద్ధిపరిగ్గహట్ఠేన బోజ్ఝఙ్గా, విసుద్ధిపరివారట్ఠేన బోజ్ఝఙ్గా, విసుద్ధిపరిపూరణట్ఠేన బోజ్ఝఙ్గా, విసుద్ధిపరిపాకట్ఠేన బోజ్ఝఙ్గా, విసుద్ధిపటిసమ్భిదట్ఠేన బోజ్ఝఙ్గా, విసుద్ధిపటిసమ్భిదాపాపనట్ఠేన బోజ్ఝఙ్గా, విసుద్ధిపటిసమ్భిదాయ వసీభావట్ఠేన బోజ్ఝఙ్గా, విసుద్ధిపటిసమ్భిదాయ వసీభావప్పత్తానమ్పి బోజ్ఝఙ్గా.

అనవజ్జట్ఠేన బోజ్ఝఙ్గా, అనవజ్జచరియట్ఠేన బోజ్ఝఙ్గా, అనవజ్జపరిగ్గహట్ఠేన బోజ్ఝఙ్గా, అనవజ్జపరివారట్ఠేన బోజ్ఝఙ్గా, అనవజ్జపరిపూరణట్ఠేన బోజ్ఝఙ్గా, అనవజ్జపరిపాకట్ఠేన బోజ్ఝఙ్గా, అనవజ్జపటిసమ్భిదట్ఠేన బోజ్ఝఙ్గా, అనవజ్జపటిసమ్భిదాపాపనట్ఠేన బోజ్ఝఙ్గా, అనవజ్జపటిసమ్భిదాయ వసీభావట్ఠేన బోజ్ఝఙ్గా, అనవజ్జపటిసమ్భిదాయ వసీభావప్పత్తానమ్పి బోజ్ఝఙ్గా.

నేక్ఖమ్మట్ఠేన బోజ్ఝఙ్గా, నేక్ఖమ్మచరియట్ఠేన బోజ్ఝఙ్గా, నేక్ఖమ్మపరిగ్గహట్ఠేన బోజ్ఝఙ్గా, నేక్ఖమ్మపరివారట్ఠేన బోజ్ఝఙ్గా, నేక్ఖమ్మపరిపూరణట్ఠేన బోజ్ఝఙ్గా, నేక్ఖమ్మపరిపాకట్ఠేన బోజ్ఝఙ్గా, నేక్ఖమ్మపటిసమ్భిదట్ఠేన బోజ్ఝఙ్గా, నేక్ఖమ్మపటిసమ్భిదాపాపనట్ఠేన బోజ్ఝఙ్గా, నేక్ఖమ్మపటిసమ్భిదాయ వసీభావట్ఠేన బోజ్ఝఙ్గా, నేక్ఖమ్మపటిసమ్భిదాయ వసీభావప్పత్తానమ్పి బోజ్ఝఙ్గా.

విముత్తట్ఠేన బోజ్ఝఙ్గా, విముత్తిచరియట్ఠేన బోజ్ఝఙ్గా, విముత్తిపరిగ్గహట్ఠేన బోజ్ఝఙ్గా, విముత్తిపరివారట్ఠేన బోజ్ఝఙ్గా, విముత్తిపరిపూరణట్ఠేన బోజ్ఝఙ్గా, విముత్తిపరిపాకట్ఠేన బోజ్ఝఙ్గా, విముత్తిపటిసమ్భిదట్ఠేన బోజ్ఝఙ్గా, విముత్తిపటిసమ్భిదాపాపనట్ఠేన బోజ్ఝఙ్గా, విముత్తిపటిసమ్భిదాయ వసీభావట్ఠేన బోజ్ఝఙ్గా, విముత్తిపటిసమ్భిదాయ వసీభావప్పత్తానమ్పి బోజ్ఝఙ్గా.

అనాసవట్ఠేన బోజ్ఝఙ్గా, అనాసవచరియట్ఠేన బోజ్ఝఙ్గా, అనాసవపరిగ్గహట్ఠేన బోజ్ఝఙ్గా, అనాసవపరివారట్ఠేన బోజ్ఝఙ్గా, అనాసవపరిపూరణట్ఠేన బోజ్ఝఙ్గా, అనాసవపరిపాకట్ఠేన బోజ్ఝఙ్గా, అనాసవపటిసమ్భిదట్ఠేన బోజ్ఝఙ్గా, అనాసవపటిసమ్భిదాపాపనట్ఠేన బోజ్ఝఙ్గా, అనాసవపటిసమ్భిదాయ వసీభావట్ఠేన బోజ్ఝఙ్గా, అనాసవపటిసమ్భిదాయ వసీభావప్పత్తానమ్పి బోజ్ఝఙ్గా.

వివేకట్ఠేన బోజ్ఝఙ్గా, వివేకచరియట్ఠేన బోజ్ఝఙ్గా, వివేకపరిగ్గహట్ఠేన బోజ్ఝఙ్గా, వివేకపరివారట్ఠేన బోజ్ఝఙ్గా, వివేకపరిపూరణట్ఠేన బోజ్ఝఙ్గా, వివేకపరిపాకట్ఠేన బోజ్ఝఙ్గా, వివేకపటిసమ్భిదట్ఠేన బోజ్ఝఙ్గా, వివేకపటిసమ్భిదాపాపనట్ఠేన బోజ్ఝఙ్గా, వివేకపటిసమ్భిదాయ వసీభావట్ఠేన బోజ్ఝఙ్గా, వివేకపటిసమ్భిదాయ వసీభావప్పత్తానమ్పి బోజ్ఝఙ్గా.

వోసగ్గట్ఠేన బోజ్ఝఙ్గా, వోసగ్గచరియట్ఠేన బోజ్ఝఙ్గా, వోసగ్గపరిగ్గహట్ఠేన బోజ్ఝఙ్గా, వోసగ్గపరివారట్ఠేన బోజ్ఝఙ్గా, వోసగ్గపరిపూరణట్ఠేన బోజ్ఝఙ్గా, వోసగ్గపరిపాకట్ఠేన బోజ్ఝఙ్గా, వోసగ్గపటిసమ్భిదట్ఠేన బోజ్ఝఙ్గా, వోసగ్గపటిసమ్భిదాపాపనట్ఠేన బోజ్ఝఙ్గా, వోసగ్గపటిసమ్భిదాయ వసీభావట్ఠేన బోజ్ఝఙ్గా, వోసగ్గపటిసమ్భిదాయ వసీభావప్పత్తానమ్పి బోజ్ఝఙ్గా.

౧౯. మూలట్ఠం బుజ్ఝన్తీతి – బోజ్ఝఙ్గా. హేతుట్ఠం బుజ్ఝన్తీతి – బోజ్ఝఙ్గా. పచ్చయట్ఠం బుజ్ఝన్తీతి – బోజ్ఝఙ్గా. విసుద్ధట్ఠం బుజ్ఝన్తీతి – బోజ్ఝఙ్గా. అనవజ్జట్ఠం బుజ్ఝన్తీతి – బోజ్ఝఙ్గా. నేక్ఖమ్మట్ఠం బుజ్ఝన్తీతి – బోజ్ఝఙ్గా. విముత్తట్ఠం బుజ్ఝన్తీతి – బోజ్ఝఙ్గా. అనాసవట్ఠం బుజ్ఝన్తీతి – బోజ్ఝఙ్గా. వివేకట్ఠం బుజ్ఝన్తీతి – బోజ్ఝఙ్గా. వోసగ్గట్ఠం బుజ్ఝన్తీతి – బోజ్ఝఙ్గా.

మూలచరియట్ఠం బుజ్ఝన్తీతి – బోజ్ఝఙ్గా. హేతుచరియట్ఠం బుజ్ఝన్తీతి – బోజ్ఝఙ్గా. పచ్చయచరియట్ఠం బుజ్ఝన్తీతి – బోజ్ఝఙ్గా. విసుద్ధిచరియట్ఠం బుజ్ఝన్తీతి – బోజ్ఝఙ్గా. అనవజ్జచరియట్ఠం బుజ్ఝన్తీతి – బోజ్ఝఙ్గా. నేక్ఖమ్మచరియట్ఠం బుజ్ఝన్తీతి – బోజ్ఝఙ్గా. విముత్తిచరియట్ఠం బుజ్ఝన్తీతి – బోజ్ఝఙ్గా. అనాసవచరియట్ఠం బుజ్ఝన్తీతి – బోజ్ఝఙ్గా. వివేకచరియట్ఠం బుజ్ఝన్తీతి – బోజ్ఝఙ్గా. వోసగ్గచరియట్ఠం బుజ్ఝన్తీతి – బోజ్ఝఙ్గా.

మూలపరిగ్గహట్ఠం బుజ్ఝన్తీతి – బోజ్ఝఙ్గా…పే… వోసగ్గపరిగ్గహట్ఠం బుజ్ఝన్తీతి – బోజ్ఝఙ్గా. మూలపరివారట్ఠం బుజ్ఝన్తీతి – బోజ్ఝఙ్గా…పే… వోసగ్గపరివారట్ఠం బుజ్ఝన్తీతి – బోజ్ఝఙ్గా. మూలపరిపూరణట్ఠం బుజ్ఝన్తీతి – బోజ్ఝఙ్గా…పే… వోసగ్గపరిపూరట్ఠం బుజ్ఝన్తీతి – బోజ్ఝఙ్గా. మూలపరిపాకట్ఠం బుజ్ఝన్తీతి – బోజ్ఝఙ్గా…పే… వోసగ్గపరిపాకట్ఠం బుజ్ఝన్తీతి – బోజ్ఝఙ్గా. మూలపటిసమ్భిదట్ఠం బుజ్ఝన్తీతి – బోజ్ఝఙ్గా…పే… వోసగ్గపటిసమ్భిదట్ఠం బుజ్ఝన్తీతి – బోజ్ఝఙ్గా. మూలపటిసమ్భిదాపాపనట్ఠం బుజ్ఝన్తీతి – బోజ్ఝఙ్గా…పే… వోసగ్గపటిసమ్భిదాపాపనట్ఠం బుజ్ఝన్తీతి – బోజ్ఝఙ్గా. మూలపటిసమ్భిదాయ వసీభావట్ఠం బుజ్ఝన్తీతి – బోజ్ఝఙ్గా…పే… వోసగ్గపటిసమ్భిదాయ వసీభావట్ఠం బుజ్ఝన్తీతి – బోజ్ఝఙ్గా…పే….

పరిగ్గహట్ఠం బుజ్ఝన్తీతి – బోజ్ఝఙ్గా. పరివారట్ఠం బుజ్ఝన్తీతి – బోజ్ఝఙ్గా. పరిపూరణట్ఠం బుజ్ఝన్తీతి – బోజ్ఝఙ్గా. ఏకగ్గట్ఠం బుజ్ఝన్తీతి – బోజ్ఝఙ్గా. అవిక్ఖేపట్ఠం బుజ్ఝన్తీతి – బోజ్ఝఙ్గా. పగ్గహట్ఠం బుజ్ఝన్తీతి – బోజ్ఝఙ్గా. అవిసారట్ఠం బుజ్ఝన్తీతి – బోజ్ఝఙ్గా. అనావిలట్ఠం బుజ్ఝన్తీతి – బోజ్ఝఙ్గా. అనిఞ్జనట్ఠం బుజ్ఝన్తీతి – బోజ్ఝఙ్గా. ఏకత్తుపట్ఠానవసేన చిత్తస్స ఠితట్ఠం బుజ్ఝన్తీతి – బోజ్ఝఙ్గా. ఆరమ్మణట్ఠం బుజ్ఝన్తీతి – బోజ్ఝఙ్గా. గోచరట్ఠం బుజ్ఝన్తీతి – బోజ్ఝఙ్గా. పహానట్ఠం బుజ్ఝన్తీతి – బోజ్ఝఙ్గా. పరిచ్చాగట్ఠం బుజ్ఝన్తీతి – బోజ్ఝఙ్గా. వుట్ఠానట్ఠం బుజ్ఝన్తీతి – బోజ్ఝఙ్గా. వివట్టనట్ఠం బుజ్ఝన్తీతి – బోజ్ఝఙ్గా. సన్తట్ఠం బుజ్ఝన్తీతి – బోజ్ఝఙ్గా. పణీతట్ఠం బుజ్ఝన్తీతి – బోజ్ఝఙ్గా. విముత్తట్ఠం బుజ్ఝన్తీతి – బోజ్ఝఙ్గా. అనాసవట్ఠం బుజ్ఝన్తీతి – బోజ్ఝఙ్గా. తరణట్ఠం బుజ్ఝన్తీతి – బోజ్ఝఙ్గా. అనిమిత్తట్ఠం బుజ్ఝన్తీతి – బోజ్ఝఙ్గా. అప్పణిహితట్ఠం బుజ్ఝన్తీతి – బోజ్ఝఙ్గా. సుఞ్ఞతట్ఠం బుజ్ఝన్తీతి – బోజ్ఝఙ్గా. ఏకరసట్ఠం బుజ్ఝన్తీతి – బోజ్ఝఙ్గా. అనతివత్తనట్ఠం బుజ్ఝన్తీతి – బోజ్ఝఙ్గా. యుగనద్ధట్ఠం బుజ్ఝన్తీతి – బోజ్ఝఙ్గా. నియ్యానట్ఠం బుజ్ఝన్తీతి – బోజ్ఝఙ్గా. హేతుట్ఠం బుజ్ఝన్తీతి – బోజ్ఝఙ్గా. దస్సనట్ఠం బుజ్ఝన్తీతి – బోజ్ఝఙ్గా. ఆధిపతేయ్యట్ఠం బుజ్ఝన్తీతి – బోజ్ఝఙ్గా.

సమథస్స అవిక్ఖేపట్ఠం బుజ్ఝన్తీతి – బోజ్ఝఙ్గా. విపస్సనాయ అనుపస్సనట్ఠం బుజ్ఝన్తీతి – బోజ్ఝఙ్గా. సమథవిపస్సనానం ఏకరసట్ఠం బుజ్ఝన్తీతి – బోజ్ఝఙ్గా. యుగనద్ధస్స అనతివత్తనట్ఠం బుజ్ఝన్తీతి – బోజ్ఝఙ్గా. సిక్ఖాయ సమాదానట్ఠం బుజ్ఝన్తీతి – బోజ్ఝఙ్గా. ఆరమ్మణస్స గోచరట్ఠం బుజ్ఝన్తీతి – బోజ్ఝఙ్గా. లీనస్స చిత్తస్స పగ్గహట్ఠం బుజ్ఝన్తీతి – బోజ్ఝఙ్గా. ఉద్ధతస్స చిత్తస్స నిగ్గహట్ఠం బుజ్ఝన్తీతి – బోజ్ఝఙ్గా. ఉభోవిసుద్ధానం అజ్ఝుపేక్ఖనట్ఠం బుజ్ఝన్తీతి – బోజ్ఝఙ్గా. విసేసాధిగమట్ఠం బుజ్ఝన్తీతి – బోజ్ఝఙ్గా. ఉత్తరి పటివేధట్ఠం బుజ్ఝన్తీతి – బోజ్ఝఙ్గా. సచ్చాభిసమయట్ఠం బుజ్ఝన్తీతి – బోజ్ఝఙ్గా. నిరోధే పతిట్ఠాపకట్ఠం బుజ్ఝన్తీతి – బోజ్ఝఙ్గా.

సద్ధిన్ద్రియస్స అధిమోక్ఖట్ఠం బుజ్ఝన్తీతి – బోజ్ఝఙ్గా…పే… పఞ్ఞిన్ద్రియస్స దస్సనట్ఠం బుజ్ఝన్తీతి – బోజ్ఝఙ్గా. సద్ధాబలస్స అస్సద్ధియే అకమ్పియట్ఠం బుజ్ఝన్తీతి – బోజ్ఝఙ్గా…పే… పఞ్ఞాబలస్స అవిజ్జాయ అకమ్పియట్ఠం బుజ్ఝన్తీతి – బోజ్ఝఙ్గా. సతిసమ్బోజ్ఝఙ్గస్స ఉపట్ఠానట్ఠం బుజ్ఝన్తీతి – బోజ్ఝఙ్గా…పే… ఉపేక్ఖాసమ్బోజ్ఝఙ్గస్స పటిసఙ్ఖానట్ఠం బుజ్ఝన్తీతి – బోజ్ఝఙ్గా. సమ్మాదిట్ఠియా దస్సనట్ఠం బుజ్ఝన్తీతి – బోజ్ఝఙ్గా…పే… సమ్మాసమాధిస్స అవిక్ఖేపట్ఠం బుజ్ఝన్తీతి – బోజ్ఝఙ్గా.

ఇన్ద్రియానం ఆధిపతేయ్యట్ఠం బుజ్ఝన్తీతి – బోజ్ఝఙ్గా. బలానం అకమ్పియట్ఠం బుజ్ఝన్తీతి – బోజ్ఝఙ్గా. నియ్యానట్ఠం బుజ్ఝన్తీతి – బోజ్ఝఙ్గా. మగ్గస్స హేతుట్ఠం బుజ్ఝన్తీతి – బోజ్ఝఙ్గా. సతిపట్ఠానానం ఉపట్ఠానట్ఠం బుజ్ఝన్తీతి – బోజ్ఝఙ్గా. సమ్మప్పధానానం పదహనట్ఠం బుజ్ఝన్తీతి – బోజ్ఝఙ్గా. ఇద్ధిపాదానం ఇజ్ఝనట్ఠం బుజ్ఝన్తీతి – బోజ్ఝఙ్గా. సచ్చానం తథట్ఠం బుజ్ఝన్తీతి – బోజ్ఝఙ్గా. పయోగానం పటిప్పస్సద్ధట్ఠం బుజ్ఝన్తీతి – బోజ్ఝఙ్గా. ఫలానం సచ్ఛికిరియట్ఠం బుజ్ఝన్తీతి – బోజ్ఝఙ్గా.

వితక్కస్స అభినిరోపనట్ఠం బుజ్ఝన్తీతి – బోజ్ఝఙ్గా. విచారస్స ఉపవిచారట్ఠం బుజ్ఝన్తీతి – బోజ్ఝఙ్గా. పీతియా ఫరణట్ఠం బుజ్ఝన్తీతి – బోజ్ఝఙ్గా. సుఖస్స అభిసన్దనట్ఠం బుజ్ఝన్తీతి – బోజ్ఝఙ్గా. చిత్తస్స ఏకగ్గట్ఠం బుజ్ఝన్తీతి – బోజ్ఝఙ్గా.

ఆవజ్జనట్ఠం బుజ్ఝన్తీతి – బోజ్ఝఙ్గా. విజాననట్ఠం బుజ్ఝన్తీతి – బోజ్ఝఙ్గా. పజాననట్ఠం బుజ్ఝన్తీతి – బోజ్ఝఙ్గా. సఞ్జాననట్ఠం బుజ్ఝన్తీతి – బోజ్ఝఙ్గా. ఏకోదట్ఠం బుజ్ఝన్తీతి – బోజ్ఝఙ్గా. అభిఞ్ఞాయ ఞాతట్ఠం [అభిఞ్ఞేయ్యత్థం (స్యా.)] బుజ్ఝన్తీతి – బోజ్ఝఙ్గా. పరిఞ్ఞాయ తీరణట్ఠం బుజ్ఝన్తీతి – బోజ్ఝఙ్గా. పహానస్స పరిచ్చాగట్ఠం బుజ్ఝన్తీతి – బోజ్ఝఙ్గా. భావనాయ ఏకరసట్ఠం బుజ్ఝన్తీతి – బోజ్ఝఙ్గా. సచ్ఛికిరియాయ ఫస్సనట్ఠం బుజ్ఝన్తీతి – బోజ్ఝఙ్గా. ఖన్ధానం ఖన్ధట్ఠం బుజ్ఝన్తీతి – బోజ్ఝఙ్గా. ధాతూనం ధాతుట్ఠం బుజ్ఝన్తీతి – బోజ్ఝఙ్గా. ఆయతనానం ఆయతనట్ఠం బుజ్ఝన్తీతి – బోజ్ఝఙ్గా. సఙ్ఖతానం సఙ్ఖతట్ఠం బుజ్ఝన్తీతి – బోజ్ఝఙ్గా. అసఙ్ఖతస్స అసఙ్ఖతట్ఠం బుజ్ఝన్తీతి – బోజ్ఝఙ్గా.

చిత్తట్ఠం బుజ్ఝన్తీతి – బోజ్ఝఙ్గా. చిత్తానన్తరియట్ఠం బుజ్ఝన్తీతి – బోజ్ఝఙ్గా. చిత్తస్స వుట్ఠానట్ఠం బుజ్ఝన్తీతి – బోజ్ఝఙ్గా. చిత్తస్స వివట్టనట్ఠం [వివజ్జనట్ఠం (స్యా.)] బుజ్ఝన్తీతి – బోజ్ఝఙ్గా. చిత్తస్స హేతుట్ఠం బుజ్ఝన్తీతి – బోజ్ఝఙ్గా. చిత్తస్స పచ్చయట్ఠం బుజ్ఝన్తీతి – బోజ్ఝఙ్గా. చిత్తస్స వత్థుట్ఠం బుజ్ఝన్తీతి – బోజ్ఝఙ్గా. చిత్తస్స భూమట్ఠం [భుమ్మట్ఠం (స్యా.) పటి. మ. ౧.౧౪ పస్సితబ్బా] బుజ్ఝన్తీతి – బోజ్ఝఙ్గా. చిత్తస్స ఆరమ్మణట్ఠం బుజ్ఝన్తీతి – బోజ్ఝఙ్గా. చిత్తస్స గోచరట్ఠం బుజ్ఝన్తీతి – బోజ్ఝఙ్గా. చిత్తస్స చరియట్ఠం బుజ్ఝన్తీతి – బోజ్ఝఙ్గా. చిత్తస్స గతట్ఠం బుజ్ఝన్తీతి – బోజ్ఝఙ్గా. చిత్తస్స అభినీహారట్ఠం బుజ్ఝన్తీతి – బోజ్ఝఙ్గా. చిత్తస్స నియ్యానట్ఠం బుజ్ఝన్తీతి – బోజ్ఝఙ్గా. చిత్తస్స నిస్సరణట్ఠం బుజ్ఝన్తీతి – బోజ్ఝఙ్గా.

ఏకత్తే ఆవజ్జనట్ఠం బుజ్ఝన్తీతి – బోజ్ఝఙ్గా. ఏకత్తే విజాననట్ఠం బుజ్ఝన్తీతి – బోజ్ఝఙ్గా. ఏకత్తే పజాననట్ఠం బుజ్ఝన్తీతి – బోజ్ఝఙ్గా. ఏకత్తే సఞ్జాననట్ఠం బుజ్ఝన్తీతి – బోజ్ఝఙ్గా. ఏకత్తే ఏకోదట్ఠం బుజ్ఝన్తీతి – బోజ్ఝఙ్గా. ( ) [(ఏకత్తే ఉపనిబన్ధనట్ఠం బుజ్ఝన్తీతి – బోజ్ఝఙ్గా) (సబ్బత్థ)]. ఏకత్తే పక్ఖన్దనట్ఠం బుజ్ఝన్తీతి – బోజ్ఝఙ్గా. ఏకత్తే పసీదనట్ఠం బుజ్ఝన్తీతి – బోజ్ఝఙ్గా. ఏకత్తే సన్తిట్ఠనట్ఠం బుజ్ఝన్తీతి – బోజ్ఝఙ్గా. ఏకత్తే విముచ్చనట్ఠం బుజ్ఝన్తీతి – బోజ్ఝఙ్గా. ఏకత్తే ఏతం సన్తన్తి పస్సనట్ఠం బుజ్ఝన్తీతి – బోజ్ఝఙ్గా. ఏకత్తే యానీకతట్ఠం బుజ్ఝన్తీతి – బోజ్ఝఙ్గా. ఏకత్తే వత్థుకతట్ఠం బుజ్ఝన్తీతి – బోజ్ఝఙ్గా. ఏకత్తే అనుట్ఠితట్ఠం బుజ్ఝన్తీతి – బోజ్ఝఙ్గా. ఏకత్తే పరిచితట్ఠం బుజ్ఝన్తీతి – బోజ్ఝఙ్గా. ఏకత్తే సుసమారద్ధట్ఠం బుజ్ఝన్తీతి – బోజ్ఝఙ్గా. ఏకత్తే పరిగ్గహట్ఠం బుజ్ఝన్తీతి – బోజ్ఝఙ్గా. ఏకత్తే పరివారట్ఠం బుజ్ఝన్తీతి – బోజ్ఝఙ్గా. ఏకత్తే పరిపూరణట్ఠం బుజ్ఝన్తీతి – బోజ్ఝఙ్గా. ఏకత్తే సమోధానట్ఠం బుజ్ఝన్తీతి – బోజ్ఝఙ్గా. ఏకత్తే అధిట్ఠానట్ఠం బుజ్ఝన్తీతి – బోజ్ఝఙ్గా. ఏకత్తే ఆసేవనట్ఠం బుజ్ఝన్తీతి – బోజ్ఝఙ్గా. ఏకత్తే భావనట్ఠం బుజ్ఝన్తీతి – బోజ్ఝఙ్గా. ఏకత్తే బహులీకమ్మట్ఠం బుజ్ఝన్తీతి – బోజ్ఝఙ్గా. ఏకత్తే సుసముగ్గతట్ఠం బుజ్ఝన్తీతి – బోజ్ఝఙ్గా. ఏకత్తే సువిముత్తట్ఠం బుజ్ఝన్తీతి – బోజ్ఝఙ్గా. ఏకత్తే బుజ్ఝనట్ఠం బుజ్ఝన్తీతి – బోజ్ఝఙ్గా. ఏకత్తే అనుబుజ్ఝనట్ఠం బుజ్ఝన్తీతి – బోజ్ఝఙ్గా. ఏకత్తే పటిబుజ్ఝనట్ఠం బుజ్ఝన్తీతి – బోజ్ఝఙ్గా. ఏకత్తే సమ్బుజ్ఝనట్ఠం బుజ్ఝన్తీతి – బోజ్ఝఙ్గా. ఏకత్తే బోధనట్ఠం బుజ్ఝన్తీతి – బోజ్ఝఙ్గా. ఏకత్తే అనుబోధనట్ఠం బుజ్ఝన్తీతి – బోజ్ఝఙ్గా. ఏకత్తే పటిబోధనట్ఠం బుజ్ఝన్తీతి – బోజ్ఝఙ్గా. ఏకత్తే సమ్బుజ్ఝనట్ఠం బుజ్ఝన్తీతి – బోజ్ఝఙ్గా. ఏకత్తే బోధిపక్ఖియట్ఠం బుజ్ఝన్తీతి – బోజ్ఝఙ్గా. ఏకత్తే అనుబోధిపక్ఖియట్ఠం బుజ్ఝన్తీతి – బోజ్ఝఙ్గా. ఏకత్తే పటిబోధిపక్ఖియట్ఠం బుజ్ఝన్తీతి – బోజ్ఝఙ్గా. ఏకత్తే సమ్బోధిపక్ఖియట్ఠం బుజ్ఝన్తీతి – బోజ్ఝఙ్గా. ఏకత్తే జోతనట్ఠం బుజ్ఝన్తీతి – బోజ్ఝఙ్గా. ఏకత్తే ఉజ్జోతనట్ఠం బుజ్ఝన్తీతి – బోజ్ఝఙ్గా. ఏకత్తే అనుజోతనట్ఠం బుజ్ఝన్తీతి – బోజ్ఝఙ్గా. ఏకత్తే పటిజోతనట్ఠం బుజ్ఝన్తీతి – బోజ్ఝఙ్గా. ఏకత్తే సఞ్జోతనట్ఠం బుజ్ఝన్తీతి – బోజ్ఝఙ్గా.

పతాపనట్ఠం బుజ్ఝన్తీతి – బోజ్ఝఙ్గా. విరోచనట్ఠం బుజ్ఝన్తీతి – బోజ్ఝఙ్గా. కిలేసానం సన్తాపనట్ఠం బుజ్ఝన్తీతి – బోజ్ఝఙ్గా. అమలట్ఠం బుజ్ఝన్తీతి – బోజ్ఝఙ్గా. విమలట్ఠం బుజ్ఝన్తీతి – బోజ్ఝఙ్గా. నిమ్మలట్ఠం బుజ్ఝన్తీతి – బోజ్ఝఙ్గా. సమట్ఠం బుజ్ఝన్తీతి – బోజ్ఝఙ్గా. సమయట్ఠం బుజ్ఝన్తీతి – బోజ్ఝఙ్గా. వివేకట్ఠం బుజ్ఝన్తీతి – బోజ్ఝఙ్గా. వివేకచరియట్ఠం బుజ్ఝన్తీతి – బోజ్ఝఙ్గా. విరాగట్ఠం బుజ్ఝన్తీతి – బోజ్ఝఙ్గా. విరాగచరియట్ఠం బుజ్ఝన్తీతి – బోజ్ఝఙ్గా. నిరోధట్ఠం బుజ్ఝన్తీతి – బోజ్ఝఙ్గా. నిరోధచరియట్ఠం బుజ్ఝన్తీతి – బోజ్ఝఙ్గా. వోసగ్గట్ఠం బుజ్ఝన్తీతి – బోజ్ఝఙ్గా. వోసగ్గచరియట్ఠం బుజ్ఝన్తీతి – బోజ్ఝఙ్గా. విముత్తట్ఠం బుజ్ఝన్తీతి – బోజ్ఝఙ్గా. విముత్తిచరియట్ఠం బుజ్ఝన్తీతి – బోజ్ఝఙ్గా.

ఛన్దట్ఠం బుజ్ఝన్తీతి – బోజ్ఝఙ్గా. ఛన్దస్స మూలట్ఠం బుజ్ఝన్తీతి – బోజ్ఝఙ్గా. ఛన్దస్స పాదట్ఠం బుజ్ఝన్తీతి – బోజ్ఝఙ్గా. ఛన్దస్స పధానట్ఠం బుజ్ఝన్తీతి – బోజ్ఝఙ్గా. ఛన్దస్స ఇజ్ఝనట్ఠం బుజ్ఝన్తీతి – బోజ్ఝఙ్గా. ఛన్దస్స అధిమోక్ఖట్ఠం బుజ్ఝన్తీతి – బోజ్ఝఙ్గా. ఛన్దస్స పగ్గహట్ఠం బుజ్ఝన్తీతి – బోజ్ఝఙ్గా. ఛన్దస్స ఉపట్ఠానట్ఠం బుజ్ఝన్తీతి – బోజ్ఝఙ్గా. ఛన్దస్స అవిక్ఖేపట్ఠం బుజ్ఝన్తీతి – బోజ్ఝఙ్గా. ఛన్దస్స దస్సనట్ఠం బుజ్ఝన్తీతి – బోజ్ఝఙ్గా.

వీరియట్ఠం బుజ్ఝన్తీతి – బోజ్ఝఙ్గా…పే… చిత్తట్ఠం బుజ్ఝన్తీతి – బోజ్ఝఙ్గా…పే… వీమంసట్ఠం బుజ్ఝన్తీతి – బోజ్ఝఙ్గా. వీమంసాయ మూలట్ఠం బుజ్ఝన్తీతి – బోజ్ఝఙ్గా. వీమంసాయ పాదట్ఠం బుజ్ఝన్తీతి – బోజ్ఝఙ్గా. వీమంసాయ పధానట్ఠం బుజ్ఝన్తీతి – బోజ్ఝఙ్గా. వీమంసాయ ఇజ్ఝనట్ఠం బుజ్ఝన్తీతి – బోజ్ఝఙ్గా. వీమంసాయ అధిమోక్ఖట్ఠం బుజ్ఝన్తీతి – బోజ్ఝఙ్గా. వీమంసాయ పగ్గహట్ఠం బుజ్ఝన్తీతి – బోజ్ఝఙ్గా. వీమంసాయ ఉపట్ఠానట్ఠం బుజ్ఝన్తీతి – బోజ్ఝఙ్గా. వీమంసాయ అవిక్ఖేపట్ఠం బుజ్ఝన్తీతి – బోజ్ఝఙ్గా. వీమంసాయ దస్సనట్ఠం బుజ్ఝన్తీతి – బోజ్ఝఙ్గా.

దుక్ఖట్ఠం బుజ్ఝన్తీతి – బోజ్ఝఙ్గా. దుక్ఖస్స పీళనట్ఠం బుజ్ఝన్తీతి – బోజ్ఝఙ్గా. దుక్ఖస్స సఙ్ఖతట్ఠం బుజ్ఝన్తీతి – బోజ్ఝఙ్గా. దుక్ఖస్స సన్తాపట్ఠం బుజ్ఝన్తీతి – బోజ్ఝఙ్గా. దుక్ఖస్స విపరిణామట్ఠం బుజ్ఝన్తీతి – బోజ్ఝఙ్గా. సముదయట్ఠం బుజ్ఝన్తీతి – బోజ్ఝఙ్గా. సముదయస్స ఆయూహనట్ఠం నిదానట్ఠం సఞ్ఞోగట్ఠం పలిబోధట్ఠం బుజ్ఝన్తీతి – బోజ్ఝఙ్గా. నిరోధట్ఠం బుజ్ఝన్తీతి – బోజ్ఝఙ్గా. నిరోధస్స నిస్సరణట్ఠం వివేకట్ఠం అసఙ్ఖతట్ఠం అమతట్ఠం బుజ్ఝన్తీతి – బోజ్ఝఙ్గా. మగ్గట్ఠం బుజ్ఝన్తీతి – బోజ్ఝఙ్గా. మగ్గస్స నియ్యానట్ఠం హేతుట్ఠం దస్సనట్ఠం ఆధిపతేయ్యట్ఠం బుజ్ఝన్తీతి – బోజ్ఝఙ్గా.

తథట్ఠం బుజ్ఝన్తీతి – బోజ్ఝఙ్గా. అనత్తట్ఠం బుజ్ఝన్తీతి – బోజ్ఝఙ్గా. సచ్చట్ఠం బుజ్ఝన్తీతి – బోజ్ఝఙ్గా. పటివేధట్ఠం బుజ్ఝన్తీతి – బోజ్ఝఙ్గా. అభిజాననట్ఠం బుజ్ఝన్తీతి – బోజ్ఝఙ్గా. పరిజాననట్ఠం బుజ్ఝన్తీతి – బోజ్ఝఙ్గా. ధమ్మట్ఠం బుజ్ఝన్తీతి – బోజ్ఝఙ్గా. ధాతుట్ఠం బుజ్ఝన్తీతి – బోజ్ఝఙ్గా. ఞాతట్ఠం బుజ్ఝన్తీతి – బోజ్ఝఙ్గా. సచ్ఛికిరియట్ఠం బుజ్ఝన్తీతి – బోజ్ఝఙ్గా. ఫస్సనట్ఠం బుజ్ఝన్తీతి – బోజ్ఝఙ్గా. అభిసమయట్ఠం బుజ్ఝన్తీతి – బోజ్ఝఙ్గా.

నేక్ఖమ్మం బుజ్ఝన్తీతి – బోజ్ఝఙ్గా. అబ్యాపాదం బుజ్ఝన్తీతి – బోజ్ఝఙ్గా. ఆలోకసఞ్ఞం బుజ్ఝన్తీతి – బోజ్ఝఙ్గా. అవిక్ఖేపం బుజ్ఝన్తీతి – బోజ్ఝఙ్గా. ధమ్మవవత్థానం బుజ్ఝన్తీతి – బోజ్ఝఙ్గా. ఞాణం బుజ్ఝన్తీతి – బోజ్ఝఙ్గా. పామోజ్జం బుజ్ఝన్తీతి – బోజ్ఝఙ్గా. పఠమం ఝానం బుజ్ఝన్తీతి – బోజ్ఝఙ్గా…పే… అరహత్తమగ్గం బుజ్ఝన్తీతి – బోజ్ఝఙ్గా. అరహత్తఫలసమాపత్తిం బుజ్ఝన్తీతి – బోజ్ఝఙ్గా.

అధిమోక్ఖట్ఠేన సద్ధిన్ద్రియం బుజ్ఝన్తీతి – బోజ్ఝఙ్గా…పే… దస్సనట్ఠేన పఞ్ఞిన్ద్రియం బుజ్ఝన్తీతి – బోజ్ఝఙ్గా. అస్సద్ధియే అకమ్పియట్ఠేన సద్ధాబలం బుజ్ఝన్తీతి – బోజ్ఝఙ్గా…పే… అవిజ్జాయ అకమ్పియట్ఠేన పఞ్ఞాబలం బుజ్ఝన్తీతి – బోజ్ఝఙ్గా. ఉపట్ఠానట్ఠేన సతిసమ్బోజ్ఝఙ్గం బుజ్ఝన్తీతి – బోజ్ఝఙ్గా…పే… పటిసఙ్ఖానట్ఠేన ఉపేక్ఖాసమ్బోజ్ఝఙ్గం బుజ్ఝన్తీతి – బోజ్ఝఙ్గా.

దస్సనట్ఠేన సమ్మాదిట్ఠిం బుజ్ఝన్తీతి – బోజ్ఝఙ్గా…పే… అవిక్ఖేపట్ఠేన సమ్మాసమాధిం బుజ్ఝన్తీతి – బోజ్ఝఙ్గా. ఆధిపతేయ్యట్ఠేన ఇన్ద్రియం బుజ్ఝన్తీతి – బోజ్ఝఙ్గా. అకమ్పియట్ఠేన బలం బుజ్ఝన్తీతి – బోజ్ఝఙ్గా. నియ్యానట్ఠం బుజ్ఝన్తీతి – బోజ్ఝఙ్గా. హేతుట్ఠేన మగ్గం బుజ్ఝన్తీతి – బోజ్ఝఙ్గా. ఉపట్ఠానట్ఠేన సతిపట్ఠానం బుజ్ఝన్తీతి – బోజ్ఝఙ్గా. పదహనట్ఠేన సమ్మప్పధానం బుజ్ఝన్తీతి – బోజ్ఝఙ్గా. ఇజ్ఝనట్ఠేన ఇద్ధిపాదం బుజ్ఝన్తీతి – బోజ్ఝఙ్గా. తథట్ఠేన సచ్చం బుజ్ఝన్తీతి – బోజ్ఝఙ్గా. అవిక్ఖేపట్ఠేన సమథం బుజ్ఝన్తీతి – బోజ్ఝఙ్గా. అనుపస్సనట్ఠే విపస్సనం …పే… ఏకరసట్ఠేన సమథవిపస్సనం బుజ్ఝన్తీతి – బోజ్ఝఙ్గా. అనతివత్తనట్ఠేన యుగనద్ధం బుజ్ఝన్తీతి – బోజ్ఝఙ్గా. సంవరట్ఠేన సీలవిసుద్ధిం బుజ్ఝన్తీతి – బోజ్ఝఙ్గా. అవిక్ఖేపట్ఠేన చిత్తవిసుద్ధిం బుజ్ఝన్తీతి – బోజ్ఝఙ్గా. దస్సనట్ఠేన దిట్ఠివిసుద్ధిం బుజ్ఝన్తీతి – బోజ్ఝఙ్గా. ముత్తట్ఠేన విమోక్ఖం బుజ్ఝన్తీతి – బోజ్ఝఙ్గా. పటివేధట్ఠేన విజ్జం బుజ్ఝన్తీతి – బోజ్ఝఙ్గా. పరిచ్చాగట్ఠేన విముత్తిం బుజ్ఝన్తీతి – బోజ్ఝఙ్గా. సముచ్ఛేదట్ఠేన ఖయే ఞాణం బుజ్ఝన్తీతి – బోజ్ఝఙ్గా. పటిప్పస్సద్ధట్ఠేన అనుప్పాదే ఞాణం బుజ్ఝన్తీతి – బోజ్ఝఙ్గా.

ఛన్దం మూలట్ఠేన బుజ్ఝన్తీతి – బోజ్ఝఙ్గా. మనసికారం సముట్ఠానట్ఠేన బుజ్ఝన్తీతి – బోజ్ఝఙ్గా. ఫస్సం సమోధానట్ఠేన బుజ్ఝన్తీతి – బోజ్ఝఙ్గా. వేదనం సమోసరణట్ఠేన బుజ్ఝన్తీతి – బోజ్ఝఙ్గా. సమాధిం పముఖట్ఠేన బుజ్ఝన్తీతి – బోజ్ఝఙ్గా. సతిం ఆధిపతేయ్యట్ఠేన బుజ్ఝన్తీతి – బోజ్ఝఙ్గా. పఞ్ఞం తతుత్తరట్ఠేన బుజ్ఝన్తీతి – బోజ్ఝఙ్గా. విముత్తిం సారట్ఠేన బుజ్ఝన్తీతి – బోజ్ఝఙ్గా. అమతోగధం నిబ్బానం పరియోసానట్ఠేన బుజ్ఝన్తీతి – బోజ్ఝఙ్గా.

౨౦. సావత్థినిదానం. తత్ర ఖో ఆయస్మా సారిపుత్తో భిక్ఖూ ఆమన్తేసి – ‘‘ఆవుసో భిక్ఖవో’’తి [ఆవుసోతి (స్యా.) సం. ని. ౫.౧౮౫ పస్సితబ్బా]. ‘‘ఆవుసో’’తి ఖో తే భిక్ఖూ ఆయస్మతో సారిపుత్తస్స పచ్చస్సోసుం. ఆయస్మా సారిపుత్తో ఏతదవోచ –

‘‘సత్తిమే, ఆవుసో, బోజ్ఝఙ్గా. కతమే సత్త? సతిసమ్బోజ్ఝఙ్గో, ధమ్మవిచయసమ్బోజ్ఝఙ్గో…పే… ఉపేక్ఖాసమ్బోజ్ఝఙ్గో – ఇమే ఖో, ఆవుసో, సత్త బోజ్ఝఙ్గా. ఇమేసం ఖ్వాహం, ఆవుసో, సత్తన్నం బోజ్ఝఙ్గానం యేన యేన బోజ్ఝఙ్గేన ఆకఙ్ఖామి పుబ్బణ్హసమయం విహరితుం, తేన తేన బోజ్ఝఙ్గేన పుబ్బణ్హసమయం విహరామి. యేన యేన బోజ్ఝఙ్గేన ఆకఙ్ఖామి మజ్ఝన్హికసమయం…పే… సాయన్హసమయం విహరితుం, తేన తేన బోజ్ఝఙ్గేన సాయన్హసమయం విహరామి. సతిసమ్బోజ్ఝఙ్గో ఇతి చే మే, ‘ఆవుసో, హోతి, అప్పమాణో’తి మే హోతి, ‘సుసమారద్ధో’తి మే హోతి. తిట్ఠన్తఞ్చ నం [తిట్ఠన్తం చరం (స్యా.) సం. ని. ౫.౧౮౫ పస్సితబ్బా] ‘తిట్ఠతీ’తి పజానామి. సచేపి మే చవతి, ‘ఇదప్పచ్చయా మే చవతీ’తి పజానామి. ధమ్మవిచయసమ్బోజ్ఝఙ్గో…పే… ఉపేక్ఖాసమ్బోజ్ఝఙ్గో ఇతి చే మే, ఆవుసో, హోతి, ‘అప్పమాణో’తి మే హోతి, ‘సుసమారద్ధో’తి మే హోతి. తిట్ఠన్తఞ్చ నం ‘తిట్ఠతీ’తి పజానామి. సచేపి మే చవతి, ‘ఇదప్పచ్చయా మే చవతీ’తి పజానామి.

‘‘సేయ్యథాపి, ఆవుసో, రఞ్ఞో వా రాజమహామత్తస్స వా నానారత్తానం దుస్సానం దుస్సకరణ్డకో పూరో అస్స. సో యఞ్ఞదేవ దుస్సయుగం ఆకఙ్ఖేయ్య పుబ్బణ్హసమయం పారుపితుం, తం తదేవ దుస్సయుగం పుబ్బణ్హసమయం పారుపేయ్య. యఞ్ఞదేవ దుస్సయుగం ఆకఙ్ఖేయ్య మజ్ఝన్హికసమయం…పే… సాయన్హసమయం పారుపితుం, తం తదేవ దుస్సయుగం సాయన్హసమయం పారుపేయ్య. ఏవమేవ ఖ్వాహం, ఆవుసో, ఇమేసం సత్తన్నం బోజ్ఝఙ్గానం యేన యేన బోజ్ఝఙ్గేన ఆకఙ్ఖామి పుబ్బణ్హసమయం విహరితుం, తేన తేన బోజ్ఝఙ్గేన పుబ్బణ్హసమయం విహరామి. యేన యేన బోజ్ఝఙ్గేన ఆకఙ్ఖామి మజ్ఝన్హికసమయం…పే… సాయన్హసమయం విహరితుం, తేన తేన బోజ్ఝఙ్గేన సాయన్హసమయం విహరామి. సతిసమ్బోజ్ఝఙ్గో ఇతి చే మే, ఆవుసో, హోతి, ‘అప్పమాణో’తి మే హోతి, ‘సుసమారద్ధో’తి మే హోతి. తిట్ఠన్తఞ్చ నం ‘తిట్ఠతీ’తి పజానామి. సచేపి మే చవతి, ‘ఇదప్పచ్చయా మే చవతీ’తి పజానామి…పే… ఉపేక్ఖాసమ్బోజ్ఝఙ్గో ఇతి చే మే, ఆవుసో, హోతి, ‘అప్పమాణో’తి మే హోతి, ‘సుసమారద్ధో’తి మే హోతి. తిట్ఠన్తఞ్చ నం ‘తిట్ఠతీ’తి పజానామి. సచేపి మే చవతి, ‘ఇదప్పచ్చయా మే చవతీ’తి పజానామి’’.

సుత్తన్తనిద్దేసో

౨౧. కథం సతిసమ్బోజ్ఝఙ్గో ఇతి చే మే హోతీతి బోజ్ఝఙ్గో? యావతా నిరోధూపట్ఠాతి తావతా సతిసమ్బోజ్ఝఙ్గో. ఇతి చే మే హోతీతి బోజ్ఝఙ్గో. సేయ్యథాపి తేలప్పదీపస్స ఝాయతో యావతా అచ్చి తావతా వణ్ణో, యావతా వణ్ణో తావతా అచ్చి. ఏవమేవ యావతా నిరోధూపట్ఠాతి తావతా సతిసమ్బోజ్ఝఙ్గో. ఇతి చే మే హోతీతి బోజ్ఝఙ్గో.

కథం అప్పమాణో ఇతి చే మే హోతీతి బోజ్ఝఙ్గో? పమాణబద్ధా [పమాణవన్తా (స్యా.), అట్ఠకథా ఓలోకేతబ్బా] కిలేసా, సబ్బే చ పరియుట్ఠానా, యే చ సఙ్ఖారా పోనోభవికా అప్పమాణో నిరోధో అచలట్ఠేన అసఙ్ఖతట్ఠేన. యావతా నిరోధూపట్ఠాతి తావతా అప్పమాణో. ఇతి చే మే హోతీతి బోజ్ఝఙ్గో.

కథం సుసమారద్ధో ఇతి చే మే హోతీతి – బోజ్ఝఙ్గో? విసమా కిలేసా, సబ్బే చ పరియుట్ఠానా, యే చ సఙ్ఖారా పోనోభవికా, సమధమ్మో నిరోధో సన్తట్ఠేన పణీతట్ఠేన. యావతా నిరోధూపట్ఠాతి తావతా సుసమారద్ధో ఇతి చే మే హోతీతి బోజ్ఝఙ్గో.

కథం ‘‘తిట్ఠన్తఞ్చ నం తిట్ఠతీ’’తి పజానామి; సచేపి చవతి ‘‘ఇదప్పచ్చయా చవతీ’’తి పజానామి? కతిహాకారేహి సతిసమ్బోజ్ఝఙ్గో తిట్ఠతి? కతిహాకారేహి సతిసమ్బోజ్ఝఙ్గో చవతి? అట్ఠహాకారేహి సతిసమ్బోజ్ఝఙ్గో తిట్ఠతి. అట్ఠహాకారేహి సతిసమ్బోజ్ఝఙ్గో చవతి.

కతమేహి అట్ఠహాకారేహి సతిసమ్బోజ్ఝఙ్గో తిట్ఠతి? అనుప్పాదం ఆవజ్జితత్తా సతిసమ్బోజ్ఝఙ్గో తిట్ఠతి, ఉప్పాదం అనావజ్జితత్తా సతిసమ్బోజ్ఝఙ్గో తిట్ఠతి, అప్పవత్తం ఆవజ్జితత్తా సతిసమ్బోజ్ఝఙ్గో తిట్ఠతి, పవత్తం అనావజ్జితత్తా సతిసమ్బోజ్ఝఙ్గో తిట్ఠతి, అనిమిత్తం ఆవజ్జితత్తా సతిసమ్బోజ్ఝఙ్గో తిట్ఠతి, నిమిత్తం అనావజ్జితత్తా సతిసమ్బోజ్ఝఙ్గో తిట్ఠతి, నిరోధం ఆవజ్జితత్తా సతిసమ్బోజ్ఝఙ్గో తిట్ఠతి, సఙ్ఖారే అనావజ్జితత్తా సతిసమ్బోజ్ఝఙ్గో తిట్ఠతి – ఇమేహి అట్ఠహాకారేహి సతిసమ్బోజ్ఝఙ్గో తిట్ఠతి.

కతమేహి అట్ఠహాకారేహి సతిసమ్బోజ్ఝఙ్గో చవతి? ఉప్పాదం ఆవజ్జితత్తా సతిసమ్బోజ్ఝఙ్గో చవతి, అనుప్పాదం అనావజ్జితత్తా సతిసమ్బోజ్ఝఙ్గో చవతి, పవత్తం ఆవజ్జితత్తా సతిసమ్బోజ్ఝఙ్గో చవతి, అప్పవత్తం అనావజ్జితత్తా సతిసమ్బోజ్ఝఙ్గో చవతి, నిమిత్తం ఆవజ్జితత్తా సతిసమ్బోజ్ఝఙ్గో చవతి, అనిమిత్తం అనావజ్జితత్తా సతిసమ్బోజ్ఝఙ్గో చవతి, సఙ్ఖారే ఆవజ్జితత్తా సతిసమ్బోజ్ఝఙ్గో చవతి, నిరోధం అనావజ్జితత్తా సతిసమ్బోజ్ఝఙ్గో చవతి – ఇమేహి అట్ఠహాకారేహి సతిసమ్బోజ్ఝఙ్గో చవతి. ఏవం ‘‘తిట్ఠన్తఞ్చ నం తిట్ఠతీ’’తి పజానామి. సచేపి చవతి, ‘‘ఇదప్పచ్చయా మే చవతీ’’తి పజానామి…పే….

కథం ఉపేక్ఖాసమ్బోజ్ఝఙ్గో ఇతి చే మే హోతీతి బోజ్ఝఙ్గో? యావతా నిరోధూపట్ఠాతి తావతా ఉపేక్ఖాసమ్బోజ్ఝఙ్గో ఇతి చే మే హోతీతి బోజ్ఝఙ్గో. సేయ్యథాపి తేలప్పదీపస్స ఝాయతో యావతా అచ్చి తావతా వణ్ణో, యావతా వణ్ణో తావతా అచ్చి. ఏవమేవ యావతా నిరోధూపట్ఠాతి తావతా ఉపేక్ఖాసమ్బోజ్ఝఙ్గో ఇతి చే హోతీతి బోజ్ఝఙ్గో.

కథం అప్పమాణో ఇతి చే హోతీతి బోజ్ఝఙ్గో? పమాణబద్ధా కిలేసా, సబ్బే చ పరియుట్ఠానా, యే చ సఙ్ఖారా పోనోభవికా అప్పమాణో నిరోధో అచలట్ఠేన అసఙ్ఖతట్ఠేన. యావతా నిరోధూపట్ఠాతి తావతా అప్పమాణో ఇతి చే హోతీతి బోజ్ఝఙ్గో.

కథం సుసమారద్ధో ఇతి చే హోతీతి బోజ్ఝఙ్గో? విసమా కిలేసా, సబ్బే చ పరియుట్ఠానా, యే చ సఙ్ఖారా పోనోభవికా సమధమ్మో నిరోధో సన్తట్ఠేన పణీతట్ఠేన. యావతా నిరోధూపట్ఠాతి తావతా సుసమారద్ధో ఇతి చే హోతీతి బోజ్ఝఙ్గో.

కథం ‘‘తిట్ఠన్తఞ్చ నం తిట్ఠతీ’’తి పజానామి; సచేపి చవతి ‘‘ఇదప్పచ్చయా మే చవతీ’’తి పజానామి? కతిహాకారేహి ఉపేక్ఖాసమ్బోజ్ఝఙ్గో తిట్ఠతి? కతిహాకారేహి ఉపేక్ఖాసమ్బోజ్ఝఙ్గో చవతి? అట్ఠహాకారేహి ఉపేక్ఖాసమ్బోజ్ఝఙ్గో తిట్ఠతి. అట్ఠహాకారేహి ఉపేక్ఖాసమ్బోజ్ఝఙ్గో చవతి.

కతమేహి అట్ఠహాకారేహి ఉపేక్ఖాసమ్బోజ్ఝఙ్గో తిట్ఠతి? అనుప్పాదం ఆవజ్జితత్తా ఉపేక్ఖాసమ్బోజ్ఝఙ్గో తిట్ఠతి, ఉప్పాదం అనావజ్జితత్తా ఉపేక్ఖాసమ్బోజ్ఝఙ్గో తిట్ఠతి, అప్పవత్తం ఆవజ్జితత్తా ఉపేక్ఖాసమ్బోజ్ఝఙ్గో తిట్ఠతి, పవత్తం అనావజ్జితత్తా ఉపేక్ఖాసమ్బోజ్ఝఙ్గో తిట్ఠతి, అనిమిత్తం ఆవజ్జితత్తా ఉపేక్ఖాసమ్బోజ్ఝఙ్గో తిట్ఠతి, నిమిత్తం అనావజ్జితత్తా ఉపేక్ఖాసమ్బోజ్ఝఙ్గో తిట్ఠతి, నిరోధం ఆవజ్జితత్తా ఉపేక్ఖాసమ్బోజ్ఝఙ్గో తిట్ఠతి, సఙ్ఖారే అనావజ్జితత్తా ఉపేక్ఖాసమ్బోజ్ఝఙ్గో తిట్ఠతి – ఇమేహి అట్ఠహాకారేహి ఉపేక్ఖాసమ్బోజ్ఝఙ్గో తిట్ఠతి.

కతమేహి అట్ఠహాకారేహి ఉపేక్ఖాసమ్బోజ్ఝఙ్గో చవతి? ఉప్పాదం ఆవజ్జితత్తా ఉపేక్ఖాసమ్బోజ్ఝఙ్గో చవతి, అనుప్పాదం అనావజ్జితత్తా ఉపేక్ఖాసమ్బోజ్ఝఙ్గో చవతి, పవత్తం ఆవజ్జితత్తా ఉపేక్ఖాసమ్బోజ్ఝఙ్గో చవతి, అప్పవత్తం అనావజ్జితత్తా ఉపేక్ఖాసమ్బోజ్ఝఙ్గో చవతి, నిమిత్తం ఆవజ్జితత్తా ఉపేక్ఖాసమ్బోజ్ఝఙ్గో చవతి, అనిమిత్తం అనావజ్జితత్తా ఉపేక్ఖాసమ్బోజ్ఝఙ్గో చవతి, సఙ్ఖారే ఆవజ్జితత్తా ఉపేక్ఖాసమ్బోజ్ఝఙ్గో చవతి, నిరోధం అనావజ్జితత్తా ఉపేక్ఖాసమ్బోజ్ఝఙ్గో చవతి – ఇమేహి అట్ఠహాకారేహి ఉపేక్ఖాసమ్బోజ్ఝఙ్గో చవతి. ఏవం ‘‘తిట్ఠన్తఞ్చ నం తిట్ఠతీ’’తి పజానామి; సచేపి చవతి, ‘‘ఇదప్పచ్చయా మే చవతీ’’తి పజానామి.

బోజ్ఝఙ్గకథా నిట్ఠితా.