౨. సచ్చకథా

౮. పురిమనిదానం. ‘‘చత్తారిమాని, భిక్ఖవే [సం. ని. ౫.౧౦౯౦], తథాని అవితథాని అనఞ్ఞథాని. కతమాని చత్తారి? ‘ఇదం దుక్ఖ’న్తి, భిక్ఖవే, తథమేతం అవితథమేతం అనఞ్ఞథమేతం; ‘అయం దుక్ఖసముదయో’తి తథమేతం అవితథమేతం అనఞ్ఞథమేతం, ‘అయం దుక్ఖనిరోధో’తి తథమేతం అవితథమేతం అనఞ్ఞథమేతం, ‘అయం దుక్ఖనిరోధగామినీ పటిపదా’తి తథమేతం అవితథమేతం అనఞ్ఞథమేతం. ఇమాని ఖో, భిక్ఖవే, చత్తారి తథాని అవితథాని అనఞ్ఞథాని’’.

౧. పఠమసుత్తన్తనిద్దేసో

కథం దుక్ఖం తథట్ఠేన సచ్చం? చత్తారో దుక్ఖస్స దుక్ఖట్ఠా తథా అవితథా అనఞ్ఞథా. దుక్ఖస్స పీళనట్ఠో, సఙ్ఖతట్ఠో, సన్తాపట్ఠో, విపరిణామట్ఠో – ఇమే చత్తారో దుక్ఖస్స దుక్ఖట్ఠా తథా అవితథా అనఞ్ఞథా. ఏవం దుక్ఖం తథట్ఠేన సచ్చం.

కథం సముదయో తథట్ఠేన సచ్చం? చత్తారో సముదయస్స సముదయట్ఠా తథా అవితథా అనఞ్ఞథా. సముదయస్స ఆయూహనట్ఠో, నిదానట్ఠో, సంయోగట్ఠో పలిబోధట్ఠో – ఇమే చత్తారో సముదయస్స సముదయట్ఠా తథా అవితథా అనఞ్ఞథా. ఏవం సముదయో తథట్ఠేన సచ్చం.

కథం నిరోధో తథట్ఠేన సచ్చం? చత్తారో నిరోధస్స నిరోధట్ఠా తథా అవితథా అనఞ్ఞథా. నిరోధస్స నిస్సరణట్ఠో, వివేకట్ఠో, అసఙ్ఖతట్ఠో, అమతట్ఠో – ఇమే చత్తారో నిరోధస్స నిరోధట్ఠా తథా అవితథా అనఞ్ఞథా. ఏవం నిరోధో తథట్ఠేన సచ్చం.

కథం మగ్గో తథట్ఠేన సచ్చం? చత్తారో మగ్గస్స మగ్గట్ఠా తథా అవితథా అనఞ్ఞథా. మగ్గస్స నియ్యానట్ఠో, హేతుట్ఠో, దస్సనట్ఠో, ఆధిపతేయ్యట్ఠో – ఇమే చత్తారో మగ్గస్స మగ్గట్ఠా తథా అవితథా అనఞ్ఞథా. ఏవం మగ్గో తథట్ఠేన సచ్చం.

౯. కతిహాకారేహి చత్తారి సచ్చాని ఏకప్పటివేధాని? చతూహాకారేహి చత్తారి సచ్చాని ఏకప్పటివేధాని. తథట్ఠేన, అనత్తట్ఠేన, సచ్చట్ఠేన, పటివేధట్ఠేన – ఇమేహి చతూహాకారేహి చత్తారి సచ్చాని ఏకసఙ్గహితాని. యం ఏకసఙ్గహితం తం ఏకత్తం. ఏకత్తం ఏకేన ఞాణేన పటివిజ్ఝతీతి – చత్తారి సచ్చాని ఏకప్పటివేధాని.

కథం తథట్ఠేన చత్తారి సచ్చాని ఏకప్పటివేధాని? చతూహాకారేహి తథట్ఠేన చత్తారి సచ్చాని ఏకప్పటివేధాని. దుక్ఖస్స దుక్ఖట్ఠో తథట్ఠో, సముదయస్స సముదయట్ఠో తథట్ఠో, నిరోధస్స నిరోధట్ఠో తథట్ఠో, మగ్గస్స మగ్గట్ఠో తథట్ఠో – ఇమేహి చతూహాకారేహి తథట్ఠేన చత్తారి సచ్చాని ఏకసఙ్గహితాని. యం ఏకసఙ్గహితం తం ఏకత్తం. ఏకత్తం ఏకేన ఞాణేన పటివిజ్ఝతీతి – చత్తారి సచ్చాని ఏకప్పటివేధాని.

కథం అనత్తట్ఠేన చత్తారి సచ్చాని ఏకప్పటివేధాని? చతూహాకారేహి అనత్తట్ఠేన చత్తారి సచ్చాని ఏకప్పటివేధాని. దుక్ఖస్స దుక్ఖట్ఠో అనత్తట్ఠో, సముదయస్స సముదయట్ఠో అనత్తట్ఠో, నిరోధస్స నిరోధట్ఠో అనత్తట్ఠో, మగ్గస్స మగ్గట్ఠో అనత్తట్ఠో – ఇమేహి చతూహాకారేహి అనత్తట్ఠేన చత్తారి సచ్చాని ఏకసఙ్గహితాని. యం ఏకసఙ్గహితం తం ఏకత్తం. ఏకత్తం ఏకేన ఞాణేన పటివిజ్ఝతీతి – చత్తారి సచ్చాని ఏకప్పటివేధాని.

కథం సచ్చట్ఠేన చత్తారి సచ్చాని ఏకప్పటివేధాని? చతూహాకారేహి సచ్చట్ఠేన చత్తారి సచ్చాని ఏకప్పటివేధాని. దుక్ఖస్స దుక్ఖట్ఠో సచ్చట్ఠో, సముదయస్స సముదయట్ఠో సచ్చట్ఠో, నిరోధస్స నిరోధట్ఠో సచ్చట్ఠో, మగ్గస్స మగ్గట్ఠో సచ్చట్ఠో – ఇమేహి చతూహాకారేహి సచ్చట్ఠేన చత్తారి సచ్చాని ఏకసఙ్గహితాని. యం ఏకసఙ్గహితం తం ఏకత్తం. ఏకత్తం ఏకేన ఞాణేన పటివిజ్ఝతీతి – చత్తారి సచ్చాని ఏకప్పటివేధాని.

కథం పటివేధట్ఠేన చత్తారి సచ్చాని ఏకప్పటివేధాని? చతూహాకారేహి పటివేధట్ఠేన చత్తారి సచ్చాని ఏకప్పటివేధాని. దుక్ఖస్స దుక్ఖట్ఠో పటివేధట్ఠో, సముదయస్స సముదయట్ఠో పటివేధట్ఠో నిరోధస్స నిరోధట్ఠో పటివేధట్ఠో, మగ్గస్స మగ్గట్ఠో పటివేధట్ఠో – ఇమేహి చతూహాకారేహి పటివేధట్ఠేన చత్తారి సచ్చాని ఏకసఙ్గహితాని యం ఏకసఙ్గహితం తం ఏకత్తం. ఏకత్తం ఏకేన ఞాణేన పటివిజ్ఝతీతి – చత్తారి సచ్చాని ఏకప్పటివేధాని.

౧౦. కతిహాకారేహి చత్తారి సచ్చాని ఏకప్పటివేధాని? యం అనిచ్చం తం దుక్ఖం, యం దుక్ఖం తం అనిచ్చం, యం అనిచ్చఞ్చ దుక్ఖఞ్చ తం అనత్తా. యం అనిచ్చఞ్చ దుక్ఖఞ్చ అనత్తా చ తం తథం. యం అనిచ్చం చ దుక్ఖఞ్చ అనత్తా చ తథఞ్చ తం సచ్చం. యం అనిచ్చఞ్చ దుక్ఖఞ్చ అనత్తా చ తథఞ్చ సచ్చఞ్చ తం ఏకసఙ్గహితం. యం ఏకసఙ్గహితం తం ఏకత్తం. ఏకత్తం ఏకేన ఞాణేన పటివిజ్ఝతీతి – చత్తారి సచ్చాని ఏకప్పటివేధాని.

కతిహాకారేహి చత్తారి సచ్చాని ఏకప్పటివేధాని? నవహాకారేహి చత్తారి సచ్చాని ఏకప్పటివేధాని. తథట్ఠేన, అనత్తట్ఠేన, సచ్చట్ఠేన, పటివేధట్ఠేన, అభిఞ్ఞట్ఠేన, పరిఞ్ఞట్ఠేన, పహానట్ఠేన, భావనట్ఠేన, సచ్ఛికిరియట్ఠేన – ఇమేహి నవహాకారేహి చత్తారి సచ్చాని ఏకసఙ్గహితాని. యం ఏకసఙ్గహితం తం ఏకత్తం. ఏకత్తం ఏకేన ఞాణేన పటివిజ్ఝతీతి – చత్తారి సచ్చాని ఏకప్పటివేధాని.

కథం తథట్ఠేన చత్తారి సచ్చాని ఏకప్పటివేధాని? నవహాకారేహి తథట్ఠేన చత్తారి సచ్చాని ఏకప్పటివేధాని. దుక్ఖస్స దుక్ఖట్ఠో తథట్ఠో, సముదయస్స సముదయట్ఠో తథట్ఠో, నిరోధస్స నిరోధట్ఠో తథట్ఠో, మగ్గస్స మగ్గట్ఠో తథట్ఠో, అభిఞ్ఞాయ అభిఞ్ఞట్ఠో తథట్ఠో, పరిఞ్ఞాయ పరిఞ్ఞట్ఠో తథట్ఠో, పహానస్స పహానట్ఠో తథట్ఠో, భావనాయ భావనట్ఠో తథట్ఠో, సచ్ఛికిరియాయ సచ్ఛికిరియట్ఠో తథట్ఠో – ఇమేహి నవహాకారేహి తథట్ఠేన చత్తారి సచ్చాని ఏకసఙ్గహితాని. యం ఏకసఙ్గహితం తం ఏకత్తం. ఏకత్తం ఏకేన ఞాణేన పటివిజ్ఝతీతి – చత్తారి సచ్చాని ఏకప్పటివేధాని.

కథం అనత్తట్ఠేన… సచ్చట్ఠేన… పటివేధట్ఠేన చత్తారి సచ్చాని ఏకప్పటివేధాని? నవహాకారేహి పటివేధట్ఠేన చత్తారి సచ్చాని ఏకప్పటివేధాని. దుక్ఖస్స దుక్ఖట్ఠో పటివేధట్ఠో, సముదయస్స సముదయట్ఠో పటివేధట్ఠో, నిరోధస్స నిరోధట్ఠో పటివేధట్ఠో, మగ్గస్స మగ్గట్ఠో పటివేధట్ఠో, అభిఞ్ఞాయ అభిఞ్ఞట్ఠో పటివేధట్ఠో, పరిఞ్ఞాయ పరిఞ్ఞట్ఠో పటివేధట్ఠో, పహానస్స పహానట్ఠో పటివేధట్ఠో, భావనాయ భావనట్ఠో పటివేధట్ఠో, సచ్ఛికిరియాయ సచ్ఛికిరియట్ఠో పటివేధట్ఠో – ఇమేహి నవహాకారేహి పటివేధట్ఠేన చత్తారి సచ్చాని ఏకసఙ్గహితాని. యం ఏకసఙ్గహితం తం ఏకత్తం. ఏకత్తం ఏకేన ఞాణేన పటివిజ్ఝతీతి – చత్తారి సచ్చాని ఏకప్పటివేధాని.

౧౧. కతిహాకారేహి చత్తారి సచ్చాని ఏకప్పటివేధాని? ద్వాదసహి ఆకారేహి చత్తారి సచ్చాని ఏకప్పటివేధాని. తథట్ఠేన, అనత్తట్ఠేన, సచ్చట్ఠేన, పటివేధట్ఠేన, అభిజాననట్ఠేన, పరిజాననట్ఠేన, ధమ్మట్ఠేన, తథట్ఠేన, ఞాతట్ఠేన, సచ్ఛికిరియట్ఠేన, ఫస్సనట్ఠేన, అభిసమయట్ఠేన – ఇమేహి ద్వాదసహి ఆకారేహి చత్తారి సచ్చాని ఏకసఙ్గహితాని. యం ఏకసఙ్గహితం తం ఏకత్తం. ఏకత్తం ఏకేన ఞాణేన పటివిజ్ఝతీతి – చత్తారి సచ్చాని ఏకప్పటివేధాని.

కథం తథట్ఠేన చత్తారి సచ్చాని ఏకప్పటివేధాని? సోళసహి ఆకారేహి తథట్ఠేన చత్తారి సచ్చాని ఏకప్పటివేధాని. దుక్ఖస్స పీళనట్ఠో, సఙ్ఖతట్ఠో, సన్తాపట్ఠో, విపరిణామట్ఠో, తథట్ఠో; సముదయస్స ఆయూహనట్ఠో, నిదానట్ఠో, సంయోగట్ఠో, పలిబోధట్ఠో తథట్ఠో; నిరోధస్స నిస్సరణట్ఠో, వివేకట్ఠో, అసఙ్ఖతట్ఠో, అమతట్ఠో తథట్ఠో; మగ్గస్స నియ్యానట్ఠో, హేతుట్ఠో, దస్సనట్ఠో, ఆధిపతేయ్యట్ఠో తథట్ఠో – ఇమేహి సోళసహి ఆకారేహి తథట్ఠేన చత్తారి సచ్చాని ఏకసఙ్గహితాని. యం ఏకసఙ్గహితం తం ఏకత్తం. ఏకత్తం ఏకేన ఞాణేన పటివిజ్ఝతీతి – చత్తారి సచ్చాని ఏకప్పటివేధాని.

కథం అనత్తట్ఠేన…పే… సచ్చట్ఠేన… పటివేధట్ఠేన… అభిజాననట్ఠేన… పరిజాననట్ఠేన… ధమ్మట్ఠేన… తథట్ఠేన… ఞాతట్ఠేన… సచ్ఛికిరియట్ఠేన… ఫస్సనట్ఠేన… అభిసమయట్ఠేన చత్తారి సచ్చాని ఏకప్పటివేధాని? సోళసహి ఆకారేహి అభిసమయట్ఠేన చత్తారి సచ్చాని ఏకప్పటివేధాని. దుక్ఖస్స పీళనట్ఠో, సఙ్ఖతట్ఠో, సన్తాపట్ఠో, విపరిణామట్ఠో, అభిసమయట్ఠో; సముదయస్స ఆయూహనట్ఠో, నిదానట్ఠో, సంయోగట్ఠో, పలిబోధట్ఠో, అభిసమయట్ఠో; నిరోధస్స నిస్సరణట్ఠో, వివేకట్ఠో, అసఙ్ఖతట్ఠో, అమతట్ఠో, అభిసమయట్ఠో; మగ్గస్స నియ్యానట్ఠో, హేతుట్ఠో, దస్సనట్ఠో, ఆధిపతేయ్యట్ఠో, అభిసమయట్ఠో – ఇమేహి సోళసహి ఆకారేహి అభిసమయట్ఠేన చత్తారి సచ్చాని ఏకసఙ్గహితాని. యం ఏకసఙ్గహితం తం ఏకత్తం. ఏకత్తం ఏకేన ఞాణేన పటివిజ్ఝతీతి – చత్తారి సచ్చాని ఏకప్పటివేధాని.

౧౨. సచ్చానం కతి లక్ఖణాని? సచ్చానం ద్వే లక్ఖణాని. సఙ్ఖతలక్ఖణఞ్చ, అసఙ్ఖతలక్ఖణఞ్చ – సచ్చానం ఇమాని ద్వే లక్ఖణాని.

సచ్చానం కతి లక్ఖణాని? సచ్చానం ఛ లక్ఖణాని. సఙ్ఖతానం సచ్చానం ఉప్పాదో పఞ్ఞాయతి, వయో పఞ్ఞాయతి, ఠితానం అఞ్ఞథత్తం పఞ్ఞాయతి అసఙ్ఖతస్స సచ్చస్స న ఉప్పాదో పఞ్ఞాయతి, న వయో పఞ్ఞాయతి, న ఠితస్స అఞ్ఞథత్తం పఞ్ఞాయతి – సచ్చానం ఇమాని ఛ లక్ఖణాని.

సచ్చానం కతి లక్ఖణాని? సచ్చానం ద్వాదస లక్ఖణాని. దుక్ఖసచ్చస్స ఉప్పాదో పఞ్ఞాయతి, వయో పఞ్ఞాయతి, ఠితస్స అఞ్ఞథత్తం పఞ్ఞాయతి; సముదయసచ్చస్స ఉప్పాదో పఞ్ఞాయతి, వయో పఞ్ఞాయతి, ఠితస్స అఞ్ఞథత్తం పఞ్ఞాయతి; మగ్గసచ్చస్స ఉప్పాదో పఞ్ఞాయతి, వయో పఞ్ఞాయతి, ఠితస్స అఞ్ఞథత్తం పఞ్ఞాయతి; నిరోధసచ్చస్స న ఉప్పాదో పఞ్ఞాయతి, న వయో పఞ్ఞాయతి, న ఠితస్స అఞ్ఞథత్తం పఞ్ఞాయతి – సచ్చానం ఇమాని ద్వాదస లక్ఖణాని.

చతున్నం సచ్చానం కతి కుసలా, కతి అకుసలా, కతి అబ్యాకతా? సముదయసచ్చం అకుసలం, మగ్గసచ్చం కుసలం, నిరోధసచ్చం అబ్యాకతం. దుక్ఖసచ్చం సియా కుసలం, సియా అకుసలం, సియా అబ్యాకతం.

సియా తీణి సచ్చాని ఏకసచ్చేన సఙ్గహితాని, ఏకసచ్చం తీహి సచ్చేహి సఙ్గహితం? వత్థువసేన పరియాయేన సియాతి. కథఞ్చ సియా? యం దుక్ఖసచ్చం అకుసలం, సముదయసచ్చం అకుసలం – ఏవం అకుసలట్ఠేన ద్వే సచ్చాని ఏకసచ్చేన సఙ్గహితాని, ఏకసచ్చం ద్వీహి సచ్చేహి సఙ్గహితం. యం దుక్ఖసచ్చం కుసలం, మగ్గసచ్చం కుసలం – ఏవం కుసలట్ఠేన ద్వే సచ్చాని ఏకసచ్చేన సఙ్గహితాని, ఏకసచ్చం ద్వీహి సచ్చేహి సఙ్గహితం. యం దుక్ఖసచ్చం అబ్యాకతం, నిరోధసచ్చం అబ్యాకతం – ఏవం అబ్యాకతట్ఠేన ద్వే సచ్చాని ఏకసచ్చేన సఙ్గహితాని, ఏకసచ్చం ద్వీహి సచ్చేహి సఙ్గహితం. ఏవం సియా తీణి సచ్చాని ఏకసచ్చేన సఙ్గహితాని, ఏకసచ్చం తీహి సచ్చేహి సఙ్గహితం వత్థువసేన పరియాయేనాతి.

౨. దుతియసుత్తన్తపాళి

౧౩. ‘‘పుబ్బే మే, భిక్ఖవే [సం. ని. ౩.౨౬], సమ్బోధా అనభిసమ్బుద్ధస్స బోధిసత్తస్సేవ సతో ఏతదహోసి – ‘కో ను ఖో రూపస్స అస్సాదో, కో ఆదీనవో, కిం నిస్సరణం; కో వేదనాయ అస్సాదో, కో ఆదీనవో, కిం నిస్సరణం; కో సఞ్ఞాయ అస్సాదో, కో ఆదీనవో, కిం నిస్సరణం; కో సఙ్ఖారానం అస్సాదో, కో ఆదీనవో, కిం నిస్సరణం; కో విఞ్ఞాణస్స అస్సాదో, కో ఆదీనవో, కిం నిస్సరణ’న్తి? తస్స మయ్హం, భిక్ఖవే, ఏతదహోసి – ‘యం ఖో రూపం పటిచ్చ ఉప్పజ్జతి సుఖం సోమనస్సం – అయం రూపస్స అస్సాదో. యం రూపం అనిచ్చం, తం దుక్ఖం విపరిణామధమ్మం – అయం రూపస్స ఆదీనవో. యో రూపస్మిం ఛన్దరాగవినయో ఛన్దరాగప్పహానం – ఇదం రూపస్స నిస్సరణం. యం వేదనం పటిచ్చ…పే… యం సఞ్ఞం పటిచ్చ… యం సఙ్ఖారే పటిచ్చ… యం విఞ్ఞాణం పటిచ్చ ఉప్పజ్జతి సుఖం సోమనస్సం – అయం విఞ్ఞాణస్స అస్సాదో. యం విఞ్ఞాణం అనిచ్చం తం దుక్ఖం విపరిణామధమ్మం – అయం విఞ్ఞాణస్స ఆదీనవో. యో విఞ్ఞాణస్మిం ఛన్దరాగవినయో ఛన్దరాగప్పహానం – ఇదం విఞ్ఞాణస్స నిస్సరణం’’.

‘‘యావకీవఞ్చాహం, భిక్ఖవే, ఇమేసం పఞ్చన్నం ఉపాదానక్ఖన్ధానం ఏవం అస్సాదఞ్చ అస్సాదతో ఆదీనవఞ్చ ఆదీనవతో నిస్సరణఞ్చ నిస్సరణతో యథాభూతం నాబ్భఞ్ఞాసిం, నేవ తావాహం, భిక్ఖవే, సదేవకే లోకే సమారకే సబ్రహ్మకే సస్సమణబ్రాహ్మణియా పజాయ సదేవమనుస్సాయ ‘అనుత్తరం సమ్మాసమ్బోధిం అభిసమ్బుద్ధో’తి పచ్చఞ్ఞాసిం [అభిసమ్బుద్ధో పచ్చఞ్ఞాసిం (స్యా.) సం. ని. ౩.౨౬ పస్సితబ్బా] యతో చ ఖ్వాహం, భిక్ఖవే, ఇమేసం పఞ్చన్నం ఉపాదానక్ఖన్ధానం ఏవం అస్సాదఞ్చ అస్సాదతో ఆదీనవఞ్చ ఆదీనవతో నిస్సరణఞ్చ నిస్సరణతో యథాభూతం అబ్భఞ్ఞాసిం, అథాహం, భిక్ఖవే, ‘సదేవకే లోకే సమారకే సబ్రహ్మకే సస్సమణబ్రాహ్మణియా పజాయ సదేవమనుస్సాయ అనుత్తరం సమ్మాసమ్బోధిం అభిసమ్బుద్ధో’తి పచ్చఞ్ఞాసిం. ఞాణఞ్చ పన మే దస్సనం ఉదపాది – ‘అకుప్పా మే విముత్తి [చేతోవిముత్తి (స్యా. క.) సం. ని. ౩.౨౭ పస్సితబ్బా]. అయమన్తిమా జాతి, నత్థి దాని పునబ్భవో’’’తి.

౩. దుతియసుత్తన్తనిద్దేసో

౧౪. యం రూపం పటిచ్చ ఉప్పజ్జతి సుఖం సోమనస్సం, అయం రూపస్స అస్సాదోతి – పహానప్పటివేధో సముదయసచ్చం. యం రూపం అనిచ్చం తం దుక్ఖం విపరిణామధమ్మం, అయం రూపస్స ఆదీనవోతి – పరిఞ్ఞాపటివేధో దుక్ఖసచ్చం. యో రూపస్మిం ఛన్దరాగవినయో ఛన్దరాగప్పహానం, ఇదం రూపస్స నిస్సరణన్తి – సచ్ఛికిరియాపటివేధో నిరోధసచ్చం. యా ఇమేసు తీసు ఠానేసు దిట్ఠి సఙ్కప్పో వాచా కమ్మన్తో ఆజీవో వాయామో సతి సమాధి – భావనాపటివేధో మగ్గసచ్చం.

యం వేదనం పటిచ్చ…పే… యం సఞ్ఞం పటిచ్చ… యం సఙ్ఖారే పటిచ్చ… యం విఞ్ఞాణం పటిచ్చ ఉప్పజ్జతి సుఖం సోమనస్సం, అయం విఞ్ఞాణస్స అస్సాదోతి – పహానప్పటివేధో సముదయసచ్చం. యం విఞ్ఞాణం అనిచ్చం తం దుక్ఖం విపరిణామధమ్మం, అయం విఞ్ఞాణస్స ఆదీనవోతి – పరిఞ్ఞాపటివేధో దుక్ఖసచ్చం. యో విఞ్ఞాణస్మిం ఛన్దరాగవినయో ఛన్దరాగప్పహానం, ఇదం విఞ్ఞాణస్స నిస్సరణన్తి – సచ్ఛికిరియాపటివేధో నిరోధసచ్చం. యా ఇమేసు తీసు ఠానేసు దిట్ఠి సఙ్కప్పో వాచా కమ్మన్తో ఆజీవో వాయామో సతి సమాధి – భావనాపటివేధో మగ్గసచ్చం.

౧౫. సచ్చన్తి కతిహాకారేహి సచ్చం? ఏసనట్ఠేన, పరిగ్గహట్ఠేన, పటివేధట్ఠేన. కథం ఏసనట్ఠేన సచ్చం? జరామరణం కింనిదానం, కింసముదయం, కింజాతికం, కింపభవన్తి – ఏవం ఏసనట్ఠేన సచ్చం. జరామరణం జాతినిదానం, జాతిసముదయం, జాతిజాతికం, జాతిప్పభవన్తి – ఏవం పరిగ్గహట్ఠేన సచ్చం. జరామరణఞ్చ పజానాతి, జరామరణసముదయఞ్చ పజానాతి, జరామరణనిరోధఞ్చ పజానాతి, జరామరణనిరోధగామినిం పటిపదఞ్చ పజానాతి – ఏవం పటివేధట్ఠేన సచ్చం.

జాతి కింనిదానా, కింసముదయా, కింజాతికా, కింపభవాతి – ఏవం ఏసనట్ఠేన సచ్చం. జాతి భవనిదానా, భవసముదయా, భవజాతికా, భవప్పభవాతి – ఏవం పరిగ్గహట్ఠేన సచ్చం. జాతిఞ్చ పజానాతి, జాతిసముదయఞ్చ పజానాతి, జాతినిరోధఞ్చ పజానాతి, జాతినిరోధగామినిం పటిపదఞ్చ పజానాతి – ఏవం పటివేధట్ఠేన సచ్చం.

భవో కింనిదానో, కింసముదయో, కింజాతికో, కింపభవోతి – ఏవం ఏసనట్ఠేన సచ్చం. భవో ఉపాదాననిదానో, ఉపాదానసముదయో, ఉపాదానజాతికో, ఉపాదానప్పభవోతి – ఏవం పరిగ్గహట్ఠేన సచ్చం. భవం చ పజానాతి, భవసముదయఞ్చ పజానాతి, భవనిరోధఞ్చ పజానాతి, భవనిరోధగామినిం పటిపదఞ్చ పజానాతి – ఏవం పటివేధట్ఠేన సచ్చం.

ఉపాదానం కింనిదానం, కింసముదయం, కింజాతికం, కింపభవన్తి – ఏవం ఏసనట్ఠేన సచ్చం. ఉపాదానం తణ్హానిదానం, తణ్హాసముదయం, తణ్హాజాతికం, తణ్హాపభవన్తి – ఏవం పరిగ్గహట్ఠేన సచ్చం. ఉపాదానఞ్చ పజానాతి, ఉపాదానసముదయఞ్చ పజానాతి, ఉపాదాననిరోధఞ్చ పజానాతి ఉపాదాననిరోధగామినిం పటిపదఞ్చ పజానాతి – ఏవం పటివేధట్ఠేన సచ్చం.

తణ్హా కింనిదానా, కింసముదయా, కింజాతికా, కింపభవాతి – ఏవం ఏసనట్ఠేన సచ్చం. తణ్హా వేదనానిదానా, వేదనాసముదయా, వేదనాజాతికా, వేదనాపభవాతి – ఏవం పరిగ్గహట్ఠేన సచ్చం. తణ్హఞ్చ పజానాతి, తణ్హాసముదయఞ్చ పజానాతి, తణ్హానిరోధఞ్చ పజానాతి, తణ్హానిరోధగామినిం పటిపదఞ్చ పజానాతి – ఏవం పటివేధట్ఠేన సచ్చం.

వేదనా కింనిదానా, కింసముదయా, కింజాతికా, కింపభవాతి – ఏవం ఏసనట్ఠేన సచ్చం. వేదనా ఫస్సనిదానా, ఫస్ససముదయా, ఫస్సజాతికా, ఫస్సప్పభవాతి – ఏవం పరిగ్గహట్ఠేన సచ్చం. వేదనఞ్చ పజానాతి, వేదనాసముదయఞ్చ పజానాతి, వేదనానిరోధఞ్చ పజానాతి, వేదనానిరోధగామినిం పటిపదఞ్చ పజానాతి – ఏవం పటివేధట్ఠేన సచ్చం.

ఫస్సో కింనిదానో, కింసముదయో, కింజాతికో, కింపభవోతి – ఏవం ఏసనట్ఠేన సచ్చం. ఫస్సో సళాయతననిదానో, సళాయతనసముదయో, సళాయతనజాతికో, సళాయతనప్పభవోతి – ఏవం పరిగ్గహట్ఠేన సచ్చం. ఫస్సఞ్చ పజానాతి, ఫస్ససముదయఞ్చ పజానాతి, ఫస్సనిరోధఞ్చ పజానాతి, ఫస్సనిరోధగామినిం పటిపదఞ్చ పజానాతి – ఏవం పటివేధట్ఠేన సచ్చం.

సళాయతనం కింనిదానం, కింసముదయం, కింజాతికం, కింపభవన్తి – ఏవం ఏసనట్ఠేన సచ్చం. సళాయతనం నామరూపనిదానం, నామరూపసముదయం, నామరూపజాతికం, నామరూపప్పభవన్తి – ఏవం పరిగ్గహట్ఠేన సచ్చం. సళాయతనఞ్చ పజానాతి, సళాయతనసముదయఞ్చ పజానాతి, సళాయతననిరోధఞ్చ పజానాతి, సళాయతననిరోధగామినిం పటిపదఞ్చ పజానాతి – ఏవం పటివేధట్ఠేన సచ్చం.

నామరూపం కింనిదానం, కింసముదయం, కింజాతికం, కింపభవన్తి – ఏవం ఏసనట్ఠేన సచ్చం. నామరూపం విఞ్ఞాణనిదానం, విఞ్ఞాణసముదయం, విఞ్ఞాణజాతికం, విఞ్ఞాణప్పభవన్తి – ఏవం పరిగ్గహట్ఠేన సచ్చం. నామరూపఞ్చ పజానాతి, నామరూపసముదయఞ్చ పజానాతి, నామరూపనిరోధఞ్చ పజానాతి, నామరూపనిరోధగామినిం పటిపదఞ్చ పజానాతి – ఏవం పటివేధట్ఠేన సచ్చం.

విఞ్ఞాణం కింనిదానం, కింసముదయం, కింజాతికం, కింపభవన్తి – ఏవం ఏసనట్ఠేన సచ్చం. విఞ్ఞాణం సఙ్ఖారనిదానం, సఙ్ఖారసముదయం, సఙ్ఖారజాతికం, సఙ్ఖారప్పభవన్తి – ఏవం పరిగ్గహట్ఠేన సచ్చం. విఞ్ఞాణఞ్చ పజానాతి, విఞ్ఞాణసముదయఞ్చ పజానాతి, విఞ్ఞాణనిరోధఞ్చ పజానాతి, విఞ్ఞాణనిరోధగామినిం పటిపదఞ్చ పజానాతి – ఏవం పటివేధట్ఠేన సచ్చం.

సఙ్ఖారా కింనిదానా, కింసముదయా, కింజాతికా, కింపభవాతి – ఏవం ఏసనట్ఠేన సచ్చం. సఙ్ఖారా అవిజ్జానిదానా, అవిజ్జాసముదయా, అవిజ్జాజాతికా, అవిజ్జాపభవాతి – ఏవం పరిగ్గహట్ఠేన సచ్చం. సఙ్ఖారే చ పజానాతి, సఙ్ఖారసముదయఞ్చ పజానాతి, సఙ్ఖారనిరోధఞ్చ పజానాతి, సఙ్ఖారనిరోధగామినిం పటిపదఞ్చ పజానాతి – ఏవం పటివేధట్ఠేన సచ్చం.

౧౬. జరామరణం దుక్ఖసచ్చం, జాతి సముదయసచ్చం, ఉభిన్నమ్పి నిస్సరణం నిరోధసచ్చం, నిరోధప్పజాననా మగ్గసచ్చం. జాతి దుక్ఖసచ్చం, భవో సముదయసచ్చం, ఉభిన్నమ్పి నిస్సరణం నిరోధసచ్చం, నిరోధప్పజాననా మగ్గసచ్చం. భవో దుక్ఖసచ్చం, ఉపాదానం సముదయసచ్చం, ఉభిన్నమ్పి నిస్సరణం నిరోధసచ్చం, నిరోధప్పజాననా మగ్గసచ్చం. ఉపాదానం దుక్ఖసచ్చం, తణ్హా సముదయసచ్చం, ఉభిన్నమ్పి నిస్సరణం నిరోధసచ్చం, నిరోధప్పజాననా మగ్గసచ్చం. తణ్హా దుక్ఖసచ్చం, వేదనా సముదయసచ్చం, ఉభిన్నమ్పి నిస్సరణం నిరోధసచ్చం, నిరోధప్పజాననా మగ్గసచ్చం. వేదనా దుక్ఖసచ్చం, ఫస్సో సముదయసచ్చం, ఉభిన్నమ్పి నిస్సరణం నిరోధసచ్చం, నిరోధప్పజాననా మగ్గసచ్చం. ఫస్సో దుక్ఖసచ్చం, సళాయతనం సముదయసచ్చం, ఉభిన్నమ్పి నిస్సరణం నిరోధసచ్చం, నిరోధప్పజాననా మగ్గసచ్చం. సళాయతనం దుక్ఖసచ్చం, నామరూపం సముదయసచ్చం, ఉభిన్నమ్పి నిస్సరణం నిరోధసచ్చం, నిరోధప్పజాననా మగ్గసచ్చం. నామరూపం దుక్ఖసచ్చం, విఞ్ఞాణం సముదయసచ్చం, ఉభిన్నమ్పి నిస్సరణం నిరోధసచ్చం, నిరోధప్పజాననా మగ్గసచ్చం. విఞ్ఞాణం దుక్ఖసచ్చం, సఙ్ఖారా సముదయసచ్చం, ఉభిన్నమ్పి నిస్సరణం నిరోధసచ్చం, నిరోధప్పజాననా మగ్గసచ్చం. సఙ్ఖారా దుక్ఖసచ్చం, అవిజ్జా సముదయసచ్చం, ఉభిన్నమ్పి నిస్సరణం నిరోధసచ్చం, నిరోధప్పజాననా మగ్గసచ్చం.

జరామరణం సియా దుక్ఖసచ్చం, సియా సముదయసచ్చం, ఉభిన్నమ్పి నిస్సరణం నిరోధసచ్చం, నిరోధప్పజాననా మగ్గసచ్చం. జాతి సియా దుక్ఖసచ్చం, సియా సముదయసచ్చం…పే… భవో సియా దుక్ఖసచ్చం, సియా సముదయసచ్చం, ఉభిన్నమ్పి నిస్సరణం నిరోధసచ్చం, నిరోధప్పజాననా మగ్గసచ్చన్తి.

భాణవారో.

సచ్చకథా నిట్ఠితా.