౨. నిద్దేసో

౪౮. కతమం సుఞ్ఞసుఞ్ఞం? చక్ఖు సుఞ్ఞం అత్తేన వా అత్తనియేన వా నిచ్చేన వా ధువేన వా సస్సతేన వా అవిపరిణామధమ్మేన వా. సోతం సుఞ్ఞం…పే… ఘానం సుఞ్ఞం… జివ్హా సుఞ్ఞా… కాయో సుఞ్ఞో… మనో సుఞ్ఞో అత్తేన వా అత్తనియేన వా నిచ్చేన వా ధువేన వా సస్సతేన వా అవిపరిణామధమ్మేన వా. ఇదం సుఞ్ఞసుఞ్ఞం.

కతమం సఙ్ఖారసుఞ్ఞం? తయో సఙ్ఖారా – పుఞ్ఞాభిసఙ్ఖారో, అపుఞ్ఞాభిసఙ్ఖారో, ఆనేఞ్జాభిసఙ్ఖారో. పుఞ్ఞాభిసఙ్ఖారో అపుఞ్ఞాభిసఙ్ఖారేన చ ఆనేఞ్జాభిసఙ్ఖారేన చ సుఞ్ఞో. అపుఞ్ఞాభిసఙ్ఖారో పుఞ్ఞాభిసఙ్ఖారేన చ ఆనేఞ్జాభిసఙ్ఖారేన చ సుఞ్ఞో. ఆనేఞ్జాభిసఙ్ఖారో పుఞ్ఞాభిసఙ్ఖారేన చ అపుఞ్ఞాభిసఙ్ఖారేన చ సుఞ్ఞో. ఇమే తయో సఙ్ఖారా.

అపరేపి తయో సఙ్ఖారా – కాయసఙ్ఖారో, వచీసఙ్ఖారో, చిత్తసఙ్ఖారో. కాయసఙ్ఖారో వచీసఙ్ఖారేన చ చిత్తసఙ్ఖారేన చ సుఞ్ఞో. వచీసఙ్ఖారో కాయసఙ్ఖారేన చ చిత్తసఙ్ఖారేన చ సుఞ్ఞో. చిత్తసఙ్ఖారో కాయసఙ్ఖారేన చ వచీసఙ్ఖారేన చ సుఞ్ఞో. ఇమే తయో సఙ్ఖారా.

అపరేపి తయో సఙ్ఖారా – అతీతా సఙ్ఖారా, అనాగతా సఙ్ఖారా, పచ్చుప్పన్నా సఙ్ఖారా. అతీతా సఙ్ఖారా అనాగతేహి చ పచ్చుప్పన్నేహి చ సఙ్ఖారేహి సుఞ్ఞా. అనాగతా సఙ్ఖారా అతీతేహి చ పచ్చుప్పన్నేహి చ సఙ్ఖారేహి సుఞ్ఞా పచ్చుప్పన్నా సఙ్ఖారా అతీతేహి చ అనాగతేహి చ సఙ్ఖారేహి సుఞ్ఞా. ఇమే తయో సఙ్ఖారా; ఇదం సఙ్ఖారసుఞ్ఞం.

కతమం విపరిణామసుఞ్ఞం? జాతం రూపం సభావేన సుఞ్ఞం. విగతం రూపం విపరిణతఞ్చేవ సుఞ్ఞఞ్చ. జాతా వేదనా సభావేన సుఞ్ఞా. విగతా వేదనా విపరిణతా చేవ సుఞ్ఞా చ …పే… జాతా సఞ్ఞా… జాతా సఙ్ఖారా… జాతం విఞ్ఞాణం… జాతం చక్ఖు…పే… జాతో భవో సభావేన సుఞ్ఞో. విగతో భవో విపరిణతో చేవ సుఞ్ఞో చ. ఇదం విపరిణామసుఞ్ఞం.

కతమం అగ్గసుఞ్ఞం? అగ్గమేతం పదం సేట్ఠమేతం పదం విసిట్ఠమేతం [విసేట్ఠమేతం (క.)] పదం యదిదం సబ్బసఙ్ఖారసమథో సబ్బూపధిపటినిస్సగ్గో తణ్హక్ఖయో విరాగో నిరోధో నిబ్బానం. ఇదం అగ్గసుఞ్ఞం.

కతమం లక్ఖణసుఞ్ఞం? ద్వే లక్ఖణాని – బాలలక్ఖణఞ్చ పణ్డితలక్ఖణఞ్చ. బాలలక్ఖణం పణ్డితలక్ఖణేన సుఞ్ఞం. పణ్డితలక్ఖణం బాలలక్ఖణేన సుఞ్ఞం. తీణి లక్ఖణాని – ఉప్పాదలక్ఖణం, వయలక్ఖణం, ఠితఞ్ఞథత్తలక్ఖణం. ఉప్పాదలక్ఖణం వయలక్ఖణేన చ ఠితఞ్ఞథత్తలక్ఖణేన చ సుఞ్ఞం. వయలక్ఖణం ఉప్పాదలక్ఖణేన చ ఠితఞ్ఞథత్తలక్ఖణేన చ సుఞ్ఞం, ఠితఞ్ఞథత్తలక్ఖణం ఉప్పాదలక్ఖణేన చ వయలక్ఖణేన చ సుఞ్ఞం.

రూపస్స ఉప్పాదలక్ఖణం వయలక్ఖణేన చ ఠితఞ్ఞథత్తలక్ఖణేన చ సుఞ్ఞం. రూపస్స వయలక్ఖణం ఉప్పాదలక్ఖణేన చ ఠితఞ్ఞథత్తలక్ఖణేన చ సుఞ్ఞం. రూపస్స ఠితఞ్ఞథత్తలక్ఖణం ఉప్పాదలక్ఖణేన చ వయలక్ఖణేన చ సుఞ్ఞం. వేదనాయ…పే… సఞ్ఞాయ… సఙ్ఖారానం… విఞ్ఞాణస్స… చక్ఖుస్స… జరామరణస్స ఉప్పాదలక్ఖణం వయలక్ఖణేన చ ఠితఞ్ఞథత్తలక్ఖణేన చ సుఞ్ఞం. జరామరణస్స వయలక్ఖణం ఉప్పాదలక్ఖణేన చ ఠితఞ్ఞథత్తలక్ఖణేన చ సుఞ్ఞం. జరామరణస్స ఠితఞ్ఞథత్తలక్ఖణం ఉప్పాదలక్ఖణేన చ వయలక్ఖణేన చ సుఞ్ఞం. ఇదం లక్ఖణసుఞ్ఞం.

కతమం విక్ఖమ్భనసుఞ్ఞం? నేక్ఖమ్మేన కామచ్ఛన్దో విక్ఖమ్భితో చేవ సుఞ్ఞో చ. అబ్యాపాదేన బ్యాపాదో విక్ఖమ్భితో చేవ సుఞ్ఞో చ. ఆలోకసఞ్ఞాయ థినమిద్ధం విక్ఖమ్భితఞ్చేవ సుఞ్ఞఞ్చ. అవిక్ఖేపేన ఉద్ధచ్చం విక్ఖమ్భితఞ్చేవ సుఞ్ఞఞ్చ. ధమ్మవవత్థానేన విచికిచ్ఛా విక్ఖమ్భితా చేవ సుఞ్ఞా చ. ఞాణేన అవిజ్జా విక్ఖమ్భితా చేవ సుఞ్ఞా చ. పామోజ్జేన అరతి విక్ఖమ్భితా చేవ సుఞ్ఞా చ. పఠమేన ఝానేన నీవరణా విక్ఖమ్భితా చేవ సుఞ్ఞా చ…పే… అరహత్తమగ్గేన సబ్బకిలేసా విక్ఖమ్భితా చేవ సుఞ్ఞా చ. ఇదం విక్ఖమ్భనసుఞ్ఞం.

కతమం తదఙ్గసుఞ్ఞం? నేక్ఖమ్మేన కామచ్ఛన్దో తదఙ్గసుఞ్ఞో. అబ్యాపాదేన బ్యాపాదో తదఙ్గసుఞ్ఞో. ఆలోకసఞ్ఞాయ థినమిద్ధం తదఙ్గసుఞ్ఞం. అవిక్ఖేపేన ఉద్ధచ్చం తదఙ్గసుఞ్ఞం. ధమ్మవవత్థానేన విచికిచ్ఛా తదఙ్గసుఞ్ఞా. ఞాణేన అవిజ్జా తదఙ్గసుఞ్ఞా. పామోజ్జేన అరతి తదఙ్గసుఞ్ఞా. పఠమేన ఝానేన నీవరణా తదఙ్గసుఞ్ఞా…పే… వివట్టనానుపస్సనాయ సఞ్ఞోగాభినివేసో తదఙ్గసుఞ్ఞో. ఇదం తదఙ్గసుఞ్ఞం.

కతమం సముచ్ఛేదసుఞ్ఞం? నేక్ఖమ్మేన కామచ్ఛన్దో సముచ్ఛిన్నో చేవ సుఞ్ఞో చ. అబ్యాపాదేన బ్యాపాదో సముచ్ఛిన్నో చేవ సుఞ్ఞో చ. ఆలోకసఞ్ఞాయ థినమిద్ధం సముచ్ఛిన్నఞ్చేవ సుఞ్ఞఞ్చ. అవిక్ఖేపేన ఉద్ధచ్చం సముచ్ఛిన్నఞ్చేవ సుఞ్ఞఞ్చ. ధమ్మవవత్థానేన విచికిచ్ఛా సముచ్ఛిన్నా చేవ సుఞ్ఞా చ. ఞాణేన అవిజ్జా సముచ్ఛిన్నా చేవ సుఞ్ఞా చ. పామోజ్జేన అరతి సముచ్ఛిన్నా చేవ సుఞ్ఞా చ. పఠమేన ఝానేన నీవరణా సముచ్ఛిన్నా చేవ సుఞ్ఞా చ…పే… అరహత్తమగ్గేన సబ్బకిలేసా సముచ్ఛిన్నా చేవ సుఞ్ఞా చ. ఇదం సముచ్ఛేదసుఞ్ఞం.

కతమం పటిప్పస్సద్ధిసుఞ్ఞం? నేక్ఖమ్మేన కామచ్ఛన్దో పటిప్పస్సద్ధో చేవ సుఞ్ఞో చ. అబ్యాపాదేన బ్యాపాదో పటిప్పస్సద్ధో చేవ సుఞ్ఞో చ. ఆలోకసఞ్ఞాయ థినమిద్ధం పటిప్పస్సద్ధఞ్చేవ సుఞ్ఞఞ్చ. అవిక్ఖేపేన ఉద్ధచ్చం పటిప్పస్సద్ధఞ్చేవ సుఞ్ఞఞ్చ. ధమ్మవవత్థానేన విచికిచ్ఛా పటిప్పస్సద్ధా చేవ సుఞ్ఞా చ. ఞాణేన అవిజ్జా పటిప్పస్సద్ధా చేవ సుఞ్ఞా చ. పామోజ్జేన అరతి పటిప్పస్సద్ధా చేవ సుఞ్ఞా చ. పఠమేన ఝానేన నీవరణా పటిప్పస్సద్ధా చేవ సుఞ్ఞా చ…పే… అరహత్తమగ్గేన సబ్బకిలేసా పటిప్పస్సద్ధా చేవ సుఞ్ఞా చ. ఇదం పటిప్పస్సద్ధిసుఞ్ఞం.

కతమం నిస్సరణసుఞ్ఞం? నేక్ఖమ్మేన కామచ్ఛన్దో నిస్సటో చేవ సుఞ్ఞో చ. అబ్యాపాదేన బ్యాపాదో నిస్సటో చేవ సుఞ్ఞో చ. ఆలోకసఞ్ఞాయ థినమిద్ధం నిస్సటఞ్చేవ సుఞ్ఞఞ్చ. అవిక్ఖేపేన ఉద్ధచ్చం నిస్సటఞ్చేవ సుఞ్ఞఞ్చ. ధమ్మవవత్థానేన విచికిచ్ఛా నిస్సటా చేవ సుఞ్ఞా చ. ఞాణేన అవిజ్జా నిస్సటా చేవ సుఞ్ఞా చ. పామోజ్జేన అరతి నిస్సటా చేవ సుఞ్ఞా చ. పఠమేన ఝానేన నీవరణా నిస్సటా చేవ సుఞ్ఞా చ …పే… అరహత్తమగ్గేన సబ్బకిలేసా నిస్సటా చేవ సుఞ్ఞా చ. ఇదం నిస్సరణసుఞ్ఞం.

కతమం అజ్ఝత్తసుఞ్ఞం? అజ్ఝత్తం చక్ఖుం సుఞ్ఞం అత్తేన వా అత్తనియేన వా నిచ్చేన వా ధువేన వా సస్సతేన వా అవిపరిణామధమ్మేన వా. అజ్ఝత్తం సోతం సుఞ్ఞం… అజ్ఝత్తం ఘానం సుఞ్ఞం… అజ్ఝత్తం జివ్హా సుఞ్ఞా… అజ్ఝత్తం కాయో సుఞ్ఞో… అజ్ఝత్తం మనో సుఞ్ఞో అత్తేన వా అత్తనియేన వా నిచ్చేన వా ధువేన వా సస్సతేన వా అవిపరిణామధమ్మేన వా. ఇదం అజ్ఝత్తసుఞ్ఞం.

కతమం బహిద్ధాసుఞ్ఞం? బహిద్ధా రూపా సుఞ్ఞా…పే… బహిద్ధా ధమ్మా సుఞ్ఞా అత్తేన వా అత్తనియేన వా నిచ్చేన వా ధువేన వా సస్సతేన వా అవిపరిణామధమ్మేన వా. ఇదం బహిద్ధాసుఞ్ఞం.

కతమం దుభతోసుఞ్ఞం? యఞ్చ అజ్ఝత్తం చక్ఖు యే చ బహిద్ధా రూపా ఉభయమేతం సుఞ్ఞం [ఉభయతో తం సుఞ్ఞా (స్యా.)] అత్తేన వా అత్తనియేన వా నిచ్చేన వా ధువేన వా సస్సతేన వా అవిపరిణామధమ్మేన వా. యఞ్చ అజ్ఝత్తం సోతం యే చ బహిద్ధా సద్దా…పే… యఞ్చ అజ్ఝత్తం ఘానం యే చ బహిద్ధా గన్ధా… యా చ అజ్ఝత్తం జివ్హా యే చ బహిద్ధా రసా… యో చ అజ్ఝత్తం కాయో యే చ బహిద్ధా ఫోట్ఠబ్బా… యో చ అజ్ఝత్తం మనో యే చ బహిద్ధా ధమ్మా ఉభయమేతం సుఞ్ఞం అత్తేన వా అత్తనియేన వా నిచ్చేన వా ధువేన వా సస్సతేన వా అవిపరిణామధమ్మేన వా. ఇదం దుభతోసుఞ్ఞం.

కతమం సభాగసుఞ్ఞం? ఛ అజ్ఝత్తికాని ఆయతనాని సభాగాని చేవ సుఞ్ఞాని చ. ఛ బాహిరాని ఆయతనాని సభాగాని చేవ సుఞ్ఞాని చ. ఛ విఞ్ఞాణకాయా సభాగా చేవ సుఞ్ఞా చ. ఛ ఫస్సకాయా సభాగా చేవ సుఞ్ఞా చ. ఛ వేదనాకాయా సభాగా చేవ సుఞ్ఞా చ. ఛ సఞ్ఞాకాయా సభాగా చేవ సుఞ్ఞా చ. ఛ చేతనాకాయా సభాగా చేవ సుఞ్ఞా చ. ఇదం సభాగసుఞ్ఞం.

కతమం విసభాగసుఞ్ఞం? ఛ అజ్ఝత్తికాని ఆయతనాని ఛహి బాహిరేహి ఆయతనేహి విసభాగాని చేవ సుఞ్ఞాని చ. ఛ బాహిరాని ఆయతనాని ఛహి విఞ్ఞాణకాయేహి విసభాగాని చేవ సుఞ్ఞాని చ. ఛ విఞ్ఞాణకాయా ఛహి ఫస్సకాయేహి విసభాగా చేవ సుఞ్ఞా చ. ఛ ఫస్సకాయా ఛహి వేదనాకాయేహి విసభాగా చేవ సుఞ్ఞా చ. ఛ వేదనాకాయా ఛహి సఞ్ఞాకాయేహి విసభాగా చేవ సుఞ్ఞా చ. ఛ సఞ్ఞాకాయా ఛహి చేతనాకాయేహి విసభాగా చేవ సుఞ్ఞా చ. ఇదం విసభాగసుఞ్ఞం.

కతమం ఏసనాసుఞ్ఞం? నేక్ఖమ్మేసనా కామచ్ఛన్దేన సుఞ్ఞా. అబ్యాపాదేసనా బ్యాపాదేన సుఞ్ఞా. ఆలోకసఞ్ఞేసనా థినమిద్ధేన సుఞ్ఞా. అవిక్ఖేపేసనా ఉద్ధచ్చేన సుఞ్ఞా. ధమ్మవవత్థానేసనా విచికిచ్ఛాయ సుఞ్ఞా. ఞాణేసనా అవిజ్జాయ సుఞ్ఞా. పామోజ్జేసనా అరతియా సుఞ్ఞా. పఠమజ్ఝానేసనా నీవరణేహి సుఞ్ఞా…పే… అరహత్తమగ్గేసనా సబ్బకిలేసేహి సుఞ్ఞా. ఇదం ఏసనాసుఞ్ఞం.

కతమం పరిగ్గహసుఞ్ఞం? నేక్ఖమ్మపరిగ్గహో కామచ్ఛన్దేన సుఞ్ఞో. అబ్యాపాదపరిగ్గహో బ్యాపాదేన సుఞ్ఞో. ఆలోకసఞ్ఞాపరిగ్గహో థినమిద్ధేన సుఞ్ఞో. అవిక్ఖేపపరిగ్గహో ఉద్ధచ్చేన సుఞ్ఞో. ధమ్మవవత్థానపరిగ్గహో విచికిచ్ఛాయ సుఞ్ఞో. ఞాణపరిగ్గహో అవిజ్జాయ సుఞ్ఞో. పామోజ్జపరిగ్గహో అరతియా సుఞ్ఞో. పఠమజ్ఝానపరిగ్గహో నీవరణేహి సుఞ్ఞో…పే… అరహత్తమగ్గపరిగ్గహో సబ్బకిలేసేహి సుఞ్ఞో. ఇదం పరిగ్గహసుఞ్ఞం.

కతమం పటిలాభసుఞ్ఞం? నేక్ఖమ్మపటిలాభో కామచ్ఛన్దేన సుఞ్ఞో. అబ్యాపాదపటిలాభో బ్యాపాదేన సుఞ్ఞో. ఆలోకసఞ్ఞాపటిలాభో థినమిద్ధేన సుఞ్ఞో. అవిక్ఖేపపటిలాభో ఉద్ధచ్చేన సుఞ్ఞో. ధమ్మవవత్థానపటిలాభో విచికిచ్ఛాయ సుఞ్ఞో. ఞాణపటిలాభో అవిజ్జాయ సుఞ్ఞో. పామోజ్జపటిలాభో అరతియా సుఞ్ఞో. పఠమజ్ఝానపటిలాభో నీవరణేహి సుఞ్ఞో…పే… అరహత్తమగ్గపటిలాభో సబ్బకిలేసేహి సుఞ్ఞో. ఇదం పటిలాభసుఞ్ఞం.

కతమం పటివేధసుఞ్ఞం? నేక్ఖమ్మప్పటివేధో కామచ్ఛన్దేన సుఞ్ఞో. అబ్యాపాదప్పటివేధో బ్యాపాదేన సుఞ్ఞో. ఆలోకసఞ్ఞాప్పటివేధో థినమిద్ధేన సుఞ్ఞో. అవిక్ఖేపప్పటివేధో ఉద్ధచ్చేన సుఞ్ఞో. ధమ్మవవత్థానప్పటివేధో విచికిచ్ఛాయ సుఞ్ఞో. ఞాణప్పటివేధో అవిజ్జాయ సుఞ్ఞో. పామోజ్జప్పటివేధో అరతియా సుఞ్ఞో. పఠమజ్ఝానప్పటివేధో నీవరణేహి సుఞ్ఞో…పే… అరహత్తమగ్గప్పటివేధో సబ్బకిలేసేహి సుఞ్ఞో. ఇదం పటివేధసుఞ్ఞం.

కతమం ఏకత్తసుఞ్ఞం, నానత్తసుఞ్ఞం? కామచ్ఛన్దో నానత్తం, నేక్ఖమ్మం ఏకత్తం. నేక్ఖమ్మేకత్తం చేతయతో కామచ్ఛన్దేన సుఞ్ఞం. బ్యాపాదో నానత్తం, అబ్యాపాదో ఏకత్తం. అబ్యాపాదేకత్తం చేతయతో బ్యాపాదేన సుఞ్ఞం. థినమిద్ధం నానత్తం, ఆలోకసఞ్ఞా ఏకత్తం. ఆలోకసఞ్ఞేకత్తం చేతయతో థినమిద్ధేన సుఞ్ఞం. ఉద్ధచ్చం నానత్తం, అవిక్ఖేపో ఏకత్తం. అవిక్ఖేపేకత్తం చేతయతో ఉద్ధచ్చేన సుఞ్ఞం. విచికిచ్ఛా నానత్తం, ధమ్మవవత్థానం ఏకత్తం. ధమ్మవవత్థానేకత్తం చేతయతో విచికిచ్ఛాయ సుఞ్ఞం. అవిజ్జా నానత్తం, ఞాణం ఏకత్తం. ఞాణేకత్తం చేతయతో అవిజ్జాయ సుఞ్ఞం. అరతి నానత్తం, పామోజ్జం ఏకత్తం. పామోజ్జేకత్తం చేతయతో అరతియా సుఞ్ఞం. నీవరణా నానత్తం, పఠమజ్ఝానం ఏకత్తం. పఠమజ్ఝానేకత్తం చేతయతో నీవరణేహి సుఞ్ఞం…పే… సబ్బకిలేసా నానత్తం, అరహత్తమగ్గో ఏకత్తం. అరహత్తమగ్గేకత్తం చేతయతో సబ్బకిలేసేహి సుఞ్ఞం. ఇదం ఏకత్తసుఞ్ఞం నానత్తసుఞ్ఞం.

కతమం ఖన్తిసుఞ్ఞం? నేక్ఖమ్మఖన్తి కామచ్ఛన్దేన సుఞ్ఞా. అబ్యాపాదఖన్తి బ్యాపాదేన సుఞ్ఞా. ఆలోకసఞ్ఞాఖన్తి థినమిద్ధేన సుఞ్ఞా. అవిక్ఖేపఖన్తి ఉద్ధచ్చేన సుఞ్ఞా. ధమ్మవవత్థానఖన్తి విచికిచ్ఛాయ సుఞ్ఞా. ఞాణఖన్తి అవిజ్జాయ సుఞ్ఞా. పామోజ్జఖన్తి అరతియా సుఞ్ఞా. పఠమజ్ఝానఖన్తి నీవరణేహి సుఞ్ఞా…పే… అరహత్తమగ్గఖన్తి సబ్బకిలేసేహి సుఞ్ఞా. ఇదం ఖన్తిసుఞ్ఞం.

కతమం అధిట్ఠానసుఞ్ఞం? నేక్ఖమ్మాధిట్ఠానం కామచ్ఛన్దేన సుఞ్ఞం. అబ్యాపాదాధిట్ఠానం బ్యాపాదేన సుఞ్ఞం. ఆలోకసఞ్ఞాధిట్ఠానం థినమిద్ధేన సుఞ్ఞం. అవిక్ఖేపాధిట్ఠానం ఉద్ధచ్చేన సుఞ్ఞం. ధమ్మవవత్థానాధిట్ఠానం విచికిచ్ఛాయ సుఞ్ఞం. ఞాణాధిట్ఠానం అవిజ్జాయ సుఞ్ఞం. పామోజ్జాధిట్ఠానం అరతియా సుఞ్ఞం. పఠమజ్ఝానాధిట్ఠానం నీవరణేహి సుఞ్ఞం…పే… అరహత్తమగ్గాధిట్ఠానం సబ్బకిలేసేహి సుఞ్ఞం. ఇదం అధిట్ఠానసుఞ్ఞం.

కతమం పరియోగాహణసుఞ్ఞం? నేక్ఖమ్మపరియోగాహణం కామచ్ఛన్దేన సుఞ్ఞం. అబ్యాపాదపరియోగాహణం బ్యాపాదేన సుఞ్ఞం. ఆలోకసఞ్ఞాపరియోగాహణం థినమిద్ధేన సుఞ్ఞం. అవిక్ఖేపపరియోగాహణం ఉద్ధచ్చేన సుఞ్ఞం. ధమ్మవవత్థానపరియోగాహణం విచికిచ్ఛాయ సుఞ్ఞం. ఞాణపరియోగాహణం అవిజ్జాయ సుఞ్ఞం. పామోజ్జపరియోగాహణం అరతియా సుఞ్ఞం. పఠమజ్ఝానపరియోగాహణం నీవరణేహి సుఞ్ఞం…పే… అరహత్తమగ్గపరియోగాహణం సబ్బకిలేసేహి సుఞ్ఞం. ఇదం పరియోగాహణసుఞ్ఞం.

కతమం సమ్పజానస్స పవత్తపరియాదానం సబ్బసుఞ్ఞతానం పరమత్థసుఞ్ఞం? ఇధ సమ్పజానో నేక్ఖమ్మేన కామచ్ఛన్దస్స పవత్తం పరియాదియతి, అబ్యాపాదేన బ్యాపాదస్స పవత్తం పరియాదియతి, ఆలోకసఞ్ఞాయ థినమిద్ధస్స పవత్తం పరియాదియతి, అవిక్ఖేపేన ఉద్ధచ్చస్స పవత్తం పరియాదియతి, ధమ్మవవత్థానేన విచికిచ్ఛాయ పవత్తం పరియాదియతి, ఞాణేన అవిజ్జాయ పవత్తం పరియాదియతి, పామోజ్జేన అరతియా పవత్తం పరియాదియతి, పఠమేన ఝానేన నీవరణానం పవత్తం పరియాదియతి…పే… అరహత్తమగ్గేన సబ్బకిలేసానం పవత్తం పరియాదియతి. అథ వా పన సమ్పజానస్స అనుపాదిసేసాయ నిబ్బానధాతుయా పరినిబ్బాయన్తస్స ఇదం చేవ చక్ఖుపవత్తం పరియాదియతి, అఞ్ఞఞ్చ చక్ఖుపవత్తం న ఉప్పజ్జతి. ఇదఞ్చేవ సోతపవత్తం…పే… ఘానపవత్తం… జివ్హాపవత్తం… కాయపవత్తం… మనోపవత్తం పరియాదియతి, అఞ్ఞఞ్చ మనోపవత్తం న ఉప్పజ్జతి. ఇదం సమ్పజానస్స పవత్తపరియాదానం సబ్బసుఞ్ఞతానం పరమత్థసుఞ్ఞన్తి.

సుఞ్ఞకథా నిట్ఠితా.

యుగనద్ధవగ్గో దుతియో.