౬. ఞాణరాసిఛక్కనిద్దేసో

౧౮౩. కతమాని చతువీసతి సమాధివసేన ఞాణాని? దీఘం అస్సాసవసేన చిత్తస్స ఏకగ్గతా అవిక్ఖేపో సమాధి, దీఘం పస్సాసవసేన చిత్తస్స ఏకగ్గతా అవిక్ఖేపో సమాధి…పే… విమోచయం చిత్తం అస్సాసవసేన చిత్తస్స ఏకగ్గతా అవిక్ఖేపో సమాధి, విమోచయం చిత్తం పస్సాసవసేన చిత్తస్స ఏకగ్గతా అవిక్ఖేపో సమాధి. ఇమాని చతువీసతి సమాధివసేన ఞాణాని.

కతమాని ద్వేసత్తతి విపస్సనావసేన ఞాణాని? దీఘం అస్సాసం అనిచ్చతో అనుపస్సనట్ఠేన విపస్సనా, దుక్ఖతో అనుపస్సనట్ఠేన విపస్సనా, అనత్తతో అనుపస్సనట్ఠేన విపస్సనా, దీఘం పస్సాసం అనిచ్చతో అనుపస్సనట్ఠేన విపస్సనా, దుక్ఖతో అనుపస్సనట్ఠేన విపస్సనా, అనత్తతో అనుపస్సనట్ఠేన విపస్సనా…పే… విమోచయం చిత్తం అస్సాసం, విమోచయం చిత్తం పస్సాసం అనిచ్చతో అనుపస్సనట్ఠేన విపస్సనా, దుక్ఖతో అనుపస్సనట్ఠేన విపస్సనా, అనత్తతో అనుపస్సనట్ఠేన విపస్సనా. ఇమాని ద్వేసత్తతి విపస్సనావసేన ఞాణాని.

కతమాని అట్ఠ నిబ్బిదాఞాణాని? అనిచ్చానుపస్సీ అస్సాసం యథాభూతం జానాతి పస్సతీతి – నిబ్బిదాఞాణం, అనిచ్చానుపస్సీ పస్సాసం యథాభూతం జానాతి పస్సతీతి – నిబ్బిదాఞాణం…పే… పటినిస్సగ్గానుపస్సీ అస్సాసం యథాభూతం జానాతి పస్సతీతి – నిబ్బిదాఞాణం, పటినిస్సగ్గానుపస్సీ పస్సాసం యథాభూతం జానాతి పస్సతీతి – నిబ్బిదాఞాణం. ఇమాని అట్ఠ నిబ్బిదాఞాణాని.

కతమాని అట్ఠ నిబ్బిదానులోమే ఞాణాని? అనిచ్చానుపస్సీ అస్సాసం భయతుపట్ఠానే పఞ్ఞా నిబ్బిదానులోమే ఞాణం, అనిచ్చానుపస్సీ పస్సాసం భయతుపట్ఠానే పఞ్ఞా నిబ్బిదానులోమే ఞాణం…పే… పటినిస్సగ్గానుపస్సీ అస్సాసం భయతుపట్ఠానే పఞ్ఞా నిబ్బిదానులోమే ఞాణం, పటినిస్సగ్గానుపస్సీ పస్సాసం భయతుపట్ఠానే పఞ్ఞా నిబ్బిదానులోమే ఞాణం – ఇమాని అట్ఠ నిబ్బిదానులోమే ఞాణాని.

కతమాని అట్ఠ నిబ్బిదాపటిప్పస్సద్ధిఞాణాని? అనిచ్చానుపస్సీ అస్సాసం పటిసఙ్ఖా సన్తిట్ఠనా పఞ్ఞా నిబ్బిదాపటిప్పస్సద్ధిఞాణం, అనిచ్చానుపస్సీ పస్సాసం పటిసఙ్ఖా సన్తిట్ఠనా పఞ్ఞా నిబ్బిదాపటిప్పస్సద్ధిఞాణం…పే… పటినిస్సగ్గానుపస్సీ అస్సాసం పటిసఙ్ఖా సన్తిట్ఠనా పఞ్ఞా నిబ్బిదాపటిప్పస్సద్ధిఞాణం, పటినిస్సగ్గానుపస్సీ పస్సాసం పటిసఙ్ఖా సన్తిట్ఠనా పఞ్ఞా నిబ్బిదాపటిప్పస్సద్ధిఞాణం – ఇమాని అట్ఠ నిబ్బిదాపటిప్పస్సద్ధిఞాణాని.

కతమాని ఏకవీసతి విముత్తిసుఖే ఞాణాని? సోతాపత్తిమగ్గేన సక్కాయదిట్ఠియా పహీనత్తా సముచ్ఛిన్నత్తా ఉప్పజ్జతి విముత్తిసుఖే ఞాణం, విచికిచ్ఛాయ పహీనత్తా సముచ్ఛిన్నత్తా ఉప్పజ్జతి విముత్తిసుఖే ఞాణం, సీలబ్బతపరామాసస్స…పే… దిట్ఠానుసయస్స, విచికిచ్ఛానుసయస్స పహీనత్తా సముచ్ఛిన్నత్తా ఉప్పజ్జతి విముత్తిసుఖే ఞాణం, సకదాగామిమగ్గేన ఓళారికస్స, కామరాగసఞ్ఞోజనస్స…పే… పటిఘసఞ్ఞోజనస్స, ఓళారికస్స కామరాగానుసయస్స, పటిఘానుసయస్స పహీనత్తా సముచ్ఛిన్నత్తా ఉప్పజ్జతి విముత్తిసుఖే ఞాణం, అనాగామిమగ్గేన అనుసహగతస్స కామరాగసఞ్ఞోజనస్స…పే… పటిఘసఞ్ఞోజనస్స, అనుసహగతస్స కామరాగానుసయస్స, పటిఘానుసయస్స పహీనత్తా సముచ్ఛిన్నత్తా ఉప్పజ్జతి విముత్తిసుఖే ఞాణం, అరహత్తమగ్గేన, రూపరాగస్స…పే… అరూపరాగస్స, మానస్స, ఉద్ధచ్చస్స, అవిజ్జాయ, మానానుసయస్స, భవరాగానుసయస్స, అవిజ్జానుసయస్స పహీనత్తా సముచ్ఛిన్నత్తా ఉప్పజ్జతి విముత్తిసుఖే ఞాణం. ఇమాని ఏకవీసతి విముత్తిసుఖే ఞాణాని. సోళసవత్థుకం ఆనాపానస్సతిసమాధిం భావయతో సమధికాని ఇమాని ద్వే ఞాణసతాని ఉప్పజ్జన్తి.

ఞాణరాసిఛక్కనిద్దేసో ఛట్ఠో.

ఆనాపానస్సతికథా [ఆనాపానకథా (స్యా. క.)] నిట్ఠితా.