౬. ఉచ్ఛేదదిట్ఠినిద్దేసో

౧౩౯. సక్కాయవత్థుకాయ ఉచ్ఛేదదిట్ఠియా కతమేహి పఞ్చహి ఆకారేహి అభినివేసో హోతి? ఇధ అస్సుతవా పుథుజ్జనో అరియానం అదస్సావీ అరియధమ్మస్స అకోవిదో అరియధమ్మే అవినీతో సప్పురిసానం అదస్సావీ సప్పురిసధమ్మస్స అకోవిదో సప్పురిసధమ్మే అవినీతో రూపం అత్తతో సమనుపస్సతి, వేదనం అత్తతో సమనుపస్సతి, సఞ్ఞం అత్తతో సమనుపస్సతి, సఙ్ఖారే అత్తతో సమనుపస్సతి, విఞ్ఞాణం అత్తతో సమనుపస్సతి.

కథం రూపం అత్తతో సమనుపస్సతి? ఇధేకచ్చో పథవీకసిణం…పే… ఓదాతకసిణం అత్తతో సమనుపస్సతి. ‘‘యం ఓదాతకసిణం, సో అహం; యో అహం, తం ఓదాతకసిణ’’న్తి – ఓదాతకసిణఞ్చ అత్తఞ్చ అద్వయం సమనుపస్సతి. సేయ్యథాపి తేలప్పదీపస్స ఝాయతో…పే… అయం పఠమా సక్కాయవత్థుకా ఉచ్ఛేదదిట్ఠి. ఉచ్ఛేదదిట్ఠి మిచ్ఛాదిట్ఠి…పే… ఇమాని సఞ్ఞోజనాని, న చ దిట్ఠియో. ఏవం రూపం అత్తతో సమనుపస్సతి…పే… సక్కాయవత్థుకాయ ఉచ్ఛేదదిట్ఠియా ఇమేహి పఞ్చహి ఆకారేహి అభినివేసో హోతి.

ఉచ్ఛేదదిట్ఠినిద్దేసో ఛట్ఠో.