౩. ఛత్తఙ్గపఞ్హో

౩. ‘‘భన్తే నాగసేన, ‘ఛత్తస్స తీణి అఙ్గాని గహేతబ్బానీ’తి యం వదేసి, కతమాని తాని తీణి అఙ్గాని గహేతబ్బానీ’’తి? ‘‘యథా, మహారాజ, ఛత్తం ఉపరి ముద్ధని చరతి, ఏవమేవ ఖో, మహారాజ, యోగినా యోగావచరేన కిలేసానం ఉపరి ముద్ధని చరేన భవితబ్బం. ఇదం, మహారాజ, ఛత్తస్స పఠమం అఙ్గం గహేతబ్బం.

‘‘పున చపరం, మహారాజ, ఛత్తం ముద్ధనుపత్థమ్భం హోతి, ఏవమేవ ఖో, మహారాజ, యోగినా యోగావచరేన యోనిసో మనసికారుపత్థమ్భేన భవితబ్బం. ఇదం, మహారాజ, ఛత్తస్స దుతియం అఙ్గం గహేతబ్బం.

‘‘పున చపరం, మహారాజ, ఛత్తం వాతాతపమేఘవుట్ఠియో పటిహనతి, ఏవమేవ ఖో, మహారాజ, యోగినా యోగావచరేన నానావిధదిట్ఠిపుథుసమణబ్రాహ్మణానం [మహావాత (క.)] మతవాతతివిధగ్గిసన్తాపకిలేసవుట్ఠియో పటిహన్తబ్బా. ఇదం, మహారాజ, ఛత్తస్స తతియం అఙ్గం గహేతబ్బం. భాసితమ్పేతం, మహారాజ, థేరేన సారిపుత్తేన ధమ్మసేనాపతినా –

‘‘‘యథాపి ఛత్తం విపులం, అచ్ఛిద్దం థిరసంహితం;

వాతాతపం నివారేతి, మహతీ మేఘవుట్ఠియో.

‘‘‘తథేవ బుద్ధపుత్తోపి, సీలఛత్తధరో సుచి;

కిలేసవుట్ఠిం వారేతి, సన్తాపతివిధగ్గయో’’’తి.

ఛత్తఙ్గపఞ్హో తతియో.