౪. పవనఙ్గపఞ్హో

౪. ‘‘భన్తే నాగసేన, ‘పవనస్స పఞ్చ అఙ్గాని గహేతబ్బానీ’తి యం వదేసి, కతమాని తాని పఞ్చ అఙ్గాని గహేతబ్బానీ’’తి? ‘‘యథా, మహారాజ, పవనం నామ అసుచిజనం పటిచ్ఛాదేతి, ఏవమేవ ఖో, మహారాజ, యోగినా యోగావచరేన పరేసం అపరద్ధం ఖలితం పటిచ్ఛాదేతబ్బం న వివరితబ్బం. ఇదం, మహారాజ, పవనస్స పఠమం అఙ్గం గహేతబ్బం.

‘‘పున చపరం, మహారాజ, పవనం సుఞ్ఞం పచురజనేహి, ఏవమేవ ఖో, మహారాజ, యోగినా యోగావచరేన రాగదోసమోహమానదిట్ఠిజాలేహి సబ్బేహి చ కిలేసేహి సుఞ్ఞేన భవితబ్బం. ఇదం, మహారాజ, పవనస్స దుతియం అఙ్గం గహేతబ్బం.

‘‘పున చపరం, మహారాజ, పవనం వివిత్తం జనసమ్బాధరహితం, ఏవమేవ ఖో, మహారాజ, యోగినా యోగావచరేన పాపకేహి అకుసలేహి ధమ్మేహి అనరియేహి పవివిత్తేన భవితబ్బం. ఇదం, మహారాజ, పవనస్స తతియం అఙ్గం గహేతబ్బం.

‘‘పున చపరం, మహారాజ, పవనం సన్తం పరిసుద్ధం, ఏవమేవ ఖో, మహారాజ, యోగినా యోగావచరేన సన్తేన పరిసుద్ధేన భవితబ్బం, నిబ్బుతేన పహీనమానేన పహీనమక్ఖేన భవితబ్బం. ఇదం, మహారాజ, పవనస్స చతుత్థం అఙ్గం గహేతబ్బం.

‘‘పున చపరం, మహారాజ, పవనం అరియజనసంసేవితం, ఏవమేవ ఖో, మహారాజ, యోగినా యోగావచరేన అరియజనసంసేవితేన భవితబ్బం. ఇదం, మహారాజ, పవనస్స పఞ్చమం అఙ్గం గహేతబ్బం. భాసితమ్పేతం, మహారాజ, భగవతా దేవాతిదేవేన సంయుత్తనికాయవరే –

‘‘‘పవివిత్తేహి అరియేహి, పహితత్తేహి ఝాయిభి;

నిచ్చం ఆరద్ధవీరియేహి, పణ్డితేహి సహావసే’’’తి.

పవనఙ్గపఞ్హో చతుత్థో.