౭. మిగఙ్గపఞ్హో

౭. ‘‘భన్తే నాగసేన, ‘మిగస్స తీణి అఙ్గాని గహేతబ్బానీ’తి యం వదేసి, కతమాని తాని తీణి అఙ్గాని గహేతబ్బానీ’’తి? ‘‘యథా, మహారాజ, మిగో దివా అరఞ్ఞే చరతి, రత్తిం అబ్భోకాసే, ఏవమేవ ఖో, మహారాజ, యోగినా యోగావచరేన దివా అరఞ్ఞే విహరితబ్బం, రత్తిం అబ్భోకాసే. ఇదం, మహారాజ, మిగస్స పఠమం అఙ్గం గహేతబ్బం.

‘‘భాసితమ్పేతం, మహారాజ, భగవతా దేవాతిదేవేన లోమహంసనపరియాయే –

‘సో ఖో అహం, సారిపుత్త, యా తా రత్తియో సీతా హేమన్తికా అన్తరట్ఠకా హిమపాతసమయా [అన్తరట్ఠకే హిమపాతసమయే (సీ. పీ. క.)], తథారూపాసు రత్తీసు రత్తిం అబ్భోకాసే విహరామి, దివా వనసణ్డే. గిమ్హానం పచ్ఛిమే మాసే దివా అబ్భోకాసే విహరామి, రత్తిం వనసణ్డే’తి.

‘‘పున చపరం, మహారాజ, మిగో సత్తిమ్హి వా సరే వా ఓపతన్తే వఞ్చేతి [వజ్జేతి (క.)] పలాయతి, న కాయముపనేతి, ఏవమేవ ఖో, మహారాజ, యోగినా యోగావచరేన కిలేసేసు ఓపతన్తేసు వఞ్చయితబ్బం [వజ్జయితబ్బం (క.)] పలాయితబ్బం, న చిత్తముపనేతబ్బం. ఇదం, మహారాజ, మిగస్స దుతియం అఙ్గం గహేతబ్బం.

‘‘పున చపరం, మహారాజ, మిగో మనుస్సే దిస్వా యేన వా తేన వా పలాయతి ‘మా మం తే అద్దసంసూ’తి, ఏవమేవ ఖో, మహారాజ, యోగినా యోగావచరేన భణ్డనకలహవిగ్గహవివాదసీలే దుస్సీలే కుసీతే సఙ్గణికారామే దిస్వా యేన వా తేన వా పలాయితబ్బం ‘మా మం తే అద్దసంసు, అహఞ్చ తే మా అద్దస’న్తి. ఇదం, మహారాజ, మిగస్స తతియం అఙ్గం గహేతబ్బం. భాసితమ్పేతం, మహారాజ, థేరేన సారిపుత్తేన ధమ్మసేనాపతినా –

‘‘‘మా మే కదాచి పాపిచ్ఛో, కుసీతో హీనవీరియో;

అప్పస్సుతో అనాచారో, సమ్మతో [సమేతో (సీ. పీ.)] అహు కత్థచీ’’’తి.

మిగఙ్గపఞ్హో సత్తమో.