౨. బిళారఙ్గపఞ్హో

౨. ‘‘భన్తే నాగసేన, ‘బిళారస్స ద్వే అఙ్గాని గహేతబ్బానీ’తి యం వదేసి, కతమాని తాని ద్వే అఙ్గాని గహేతబ్బానీ’’తి? ‘‘యథా, మహారాజ, బిళారో గుహాగతోపి సుసిరగతోపి హమ్మియన్తరగతోపి ఉన్దూరం యేవ పరియేసతి, ఏవమేవ ఖో, మహారాజ, యోగినా యోగావచరేన గామగతేనాపి అరఞ్ఞగతేనాపి రుక్ఖమూలగతేనాపి సుఞ్ఞాగారగతేనాపి సతతం సమితం అప్పమత్తేన కాయగతాసతిభోజనం యేవ పరియేసితబ్బం. ఇదం, మహారాజ, బిళారస్స పఠమం అఙ్గం గహేతబ్బం.

‘‘పున చపరం, మహారాజ, బిళారో ఆసన్నే యేవ గోచరం పరియేసతి, ఏవమేవ ఖో, మహారాజ, యోగినా యోగావచరేన ఇమేసు యేవ పఞ్చసు ఉపాదానక్ఖన్ధేసు ఉదయబ్బయానుపస్సినా విహరితబ్బం ‘ఇతి రూపం ఇతి రూపస్స సముదయో ఇతి రూపస్స అత్థఙ్గమో, ఇతి వేదనా ఇతి వేదనాయ సముదయో ఇతి వేదనాయ అత్థఙ్గమో, ఇతి సఞ్ఞా ఇతి సఞ్ఞాయ సముదయో ఇతి సఞ్ఞాయ అత్థఙ్గమో, ఇతి సఙ్ఖారా ఇతి సఙ్ఖారానం సముదయో ఇతి సఙ్ఖారానం అత్థఙ్గమో, ఇతి విఞ్ఞాణం ఇతి విఞ్ఞాణస్స సముదయో ఇతి విఞ్ఞాణస్స అత్థఙ్గమో’తి. ఇదం, మహారాజ, బిళారస్స దుతియం అఙ్గం గహేతబ్బం. భాసితమ్పేతం, మహారాజ, భగవతా దేవాతిదేవేన –

‘‘‘న ఇతో దూరే భవితబ్బం, భవగ్గం కిం కరిస్సతి;

పచ్చుప్పన్నమ్హి వోహారే, సకే కాయమ్హి విన్దథా’’’తి.

బిళారఙ్గపఞ్హో దుతియో.