౭. యక్ఖపఞ్హో

౭. ‘‘భన్తే నాగసేన, అత్థి లోకే యక్ఖా నామా’’తి? ‘‘ఆమ, మహారాజ, అత్థి లోకే యక్ఖా నామా’’తి. ‘‘చవన్తి పన తే, భన్తే, యక్ఖా తమ్హా యోనియా’’తి? ‘‘ఆమ, మహారాజ, చవన్తి తే యక్ఖా తమ్హా యోనియా’’తి. ‘‘కిస్స పన, భన్తే నాగసేన, తేసం మతానం యక్ఖానం సరీరం న దిస్సతి, కుణపగన్ధోపి న వాయతీ’’తి? ‘‘దిస్సతి, మహారాజ, మతానం యక్ఖానం సరీరం, కుణపగన్ధోపి తేసం వాయతి, మతానం, మహారాజ, యక్ఖానం సరీరం కీటవణ్ణేన వా దిస్సతి, కిమివణ్ణేన వా దిస్సతి, కిపిల్లికవణ్ణేన వా దిస్సతి, పటఙ్గవణ్ణేన వా దిస్సతి, అహివణ్ణేన వా దిస్సతి, విచ్ఛికవణ్ణేన వా దిస్సతి, సతపదివణ్ణేన వా దిస్సతి, దిజవణ్ణేన వా దిస్సతి, మిగవణ్ణేన వా దిస్సతీ’’తి. ‘‘కో హి, భన్తే నాగసేన, అఞ్ఞో ఇదం పఞ్హం పుట్ఠో విసజ్జేయ్య అఞ్ఞత్ర తవాదిసేన బుద్ధిమతా’’తి.

యక్ఖపఞ్హో సత్తమో.