౭. పాపపుఞ్ఞానం అప్పానప్పభావపఞ్హో

౭. రాజా ఆహ ‘‘భన్తే నాగసేన, కతరం ను ఖో బహుతరం పుఞ్ఞం వా అపుఞ్ఞం వా’’తి? ‘‘పుఞ్ఞం ఖో, మహారాజ, బహుతరం, అపుఞ్ఞం థోక’’న్తి. ‘‘కేన కారణేనా’’తి? ‘‘అపుఞ్ఞం ఖో, మహారాజ, కరోన్తో విప్పటిసారీ హోతి ‘పాపకమ్మం మయా కత’న్తి, తేన పాపం న వడ్ఢతి. పుఞ్ఞం ఖో, మహారాజ, కరోన్తో అవిప్పటిసారీ హోతి, అవిప్పటిసారినో పామోజ్జం జాయతి, పముదితస్స పీతి జాయతి, పీతిమనస్స కాయో పస్సమ్భతి, పస్సద్ధకాయో సుఖం వేదేతి, సుఖినో చిత్తం సమాధియతి, సమాహితో యథాభూతం పజానాతి, తేన కారణేన పుఞ్ఞం వడ్ఢతి. పురిసో ఖో, మహారాజ, ఛిన్నహత్థపాదో భగవతో ఏకం ఉప్పలహత్థం దత్వా ఏకనవుతికప్పాని వినిపాతం న గచ్ఛిస్సతి. ఇమినాపి, మహారాజ, కారణేన భణామి ‘పుఞ్ఞం బహుతరం, అపుఞ్ఞం థోక’’’న్తి.

‘‘కల్లోసి, భన్తే నాగసేనా’’తి.

పాపపుఞ్ఞానం అప్పానప్పభావపఞ్హో సత్తమో.