౯. ఉప్పజ్జతిజాననపఞ్హో

౯. రాజా ఆహ ‘‘భన్తే నాగసేన, యో ఉప్పజ్జతి, జానాతి సో ‘ఉప్పజ్జిస్సామీ’’’తి? ‘‘ఆమ, మహారాజ, యో ఉప్పజ్జతి జానాతి సో ‘ఉప్పజ్జిస్సామీ’’’తి. ‘‘ఓపమ్మం కరోహీ’’తి. ‘‘యథా, మహారాజ, కస్సకో గహపతికో బీజాని పథవియం నిక్ఖిపిత్వా సమ్మా దేవే వస్సన్తే జానాతి ‘ధఞ్ఞం నిబ్బత్తిస్సతీ’’’తి? ‘‘ఆమ, భన్తే, జానేయ్యా’’తి. ‘‘ఏవమేవ ఖో, మహారాజ, యో ఉప్పజ్జతి, జానాతి సో ‘ఉప్పజ్జిస్సామీ’’’తి.

‘‘కల్లోసి, భన్తే నాగసేనా’’తి.

ఉప్పజ్జతిజాననపఞ్హో నవమో.