౭. థేరపటిసన్దహనాపటిసన్దహనపఞ్హో

౭. రాజా ఆహ ‘‘భన్తే నాగసేన, త్వం పన పటిసన్దహిస్ససీ’’తి? ‘‘అలం, మహారాజ, కిం తే తేన పుచ్ఛితేన, నను మయా పటికచ్చేవ అక్ఖాతం ‘సచే, మహారాజ, సఉపాదానో భవిస్సామి, పటిసన్దహిస్సామి, సచే అనుపాదానో భవిస్సామి, న పటిసన్దహిస్సామీ’’’తి.

‘‘ఓపమ్మం కరోహీ’’తి. ‘‘యథా, మహారాజ, కోచిదేవ పురిసో రఞ్ఞో అధికారం కరేయ్య. రాజా తుట్ఠో అధికారం దదేయ్య, సో తేన అధికారేన పఞ్చహి కామగుణేహి సమప్పితో సమఙ్గిభూతో పరిచరేయ్య, సో చే జనస్స ఆరోచేయ్య ‘న మే రాజా కిఞ్చి పటికరోతీ’ తి. కిం ను ఖో సో, మహారాజ, పురిసో యుత్తకారీ భవేయ్యా’’తి? ‘‘న హి భన్తే’’తి. ‘‘ఏవమేవ ఖో, మహారాజ, కిం తే తేన పుచ్ఛితేన, నను మయా పటికచ్చేవ అక్ఖాతం ‘సచే సఉపాదానో భవిస్సామి, పటిసన్దహిస్సామి, సచే అనుపాదానో భవిస్సామి, న పటిసన్దహిస్సామీ’’’తి.

‘‘కల్లోసి, భన్తే నాగసేనా’’తి.

థేరపటిసన్దహనాపటిసన్దహనపఞ్హో సత్తమో.