౬. పటిసన్ధిపఞ్హో

౬. రాజా ఆహ ‘‘భన్తే నాగసేన, అత్థి కోచి మతో న పటిసన్దహతీ’’తి. థేరో ఆహ ‘‘కోచి పటిసన్దహతి, కోచి న పటిసన్దహతీ’’తి. ‘‘కో పటిసన్దహతి, కో న పటిసన్దహతీ’’తి? ‘‘సకిలేసో, మహారాజ, పటిసన్దహతి, నిక్కిలేసో న పటిసన్దహతీ’’తి. ‘‘త్వం పన, భన్తే నాగసేన, పటిసన్దహిస్ససీ’’తి? ‘‘సచే, మహారాజ, సఉపాదానో భవిస్సామి పటిసన్దహిస్సామి, సచే అనుపాదానో భవిస్సామి న పటిసన్దహిస్సామీ’’తి.

‘‘కల్లోసి, భన్తే నాగసేనా’’తి.

పటిసన్ధిపఞ్హో ఛట్ఠో.