౩. వీమంసనపఞ్హో

౩. రాజా ఆహ ‘‘భన్తే నాగసేన, సల్లపిస్ససి మయా సద్ధి’’న్తి? ‘‘సచే, త్వం మహారాజ, పణ్డితవాదం [పణ్డితవాదా (సీ. పీ.)] సల్లపిస్ససి సల్లపిస్సామి, సచే పన రాజవాదం సల్లపిస్ససి న సల్లపిస్సామీ’’తి. ‘‘కథం, భన్తే నాగసేన, పణ్డితా సల్లపన్తీ’’తి? ‘‘పణ్డితానం ఖో, మహారాజ, సల్లాపే ఆవేఠనమ్పి కయిరతి, నిబ్బేఠనమ్పి కయిరతి, నిగ్గహోపి కయిరతి, పటికమ్మమ్పి కయిరతి, విస్సాసోపి [విసేసోపి (సీ. పీ.)] కయిరతి, పటివిస్సాసోపి కయిరతి, న చ తేన పణ్డితా కుప్పన్తి, ఏవం ఖో, మహారాజ, పణ్డితా సల్లపన్తీ’’తి. ‘‘కథం పన, భన్తే, రాజానో సల్లపన్తీ’’తి? ‘‘రాజానో ఖో, మహారాజ, సల్లాపే ఏకం వత్థుం పటిజానన్తి, యో తం వత్థుం విలోమేతి, తస్స దణ్డం ఆణాపేన్తి ‘ఇమస్స దణ్డం పణేథా’తి, ఏవం ఖో, మహారాజ, రాజానో సల్లపన్తీ’’తి. ‘‘పణ్డితవాదాహం, భన్తే, సల్లపిస్సామి, నో రాజవాదం, విస్సట్ఠో భదన్తో సల్లపతు యథా భిక్ఖునా వా సామణేరేన వా ఉపాసకేన వా ఆరామికేన వా సద్ధిం సల్లపతి, ఏవం విస్సట్ఠో భదన్తో సల్లపతు మా భాయతూ’’తి. ‘‘సుట్ఠు మహారాజా’’తి థేరో అబ్భానుమోది.

రాజా ఆహ ‘‘భన్తే నాగసేన, పుచ్ఛిస్సామీ’’తి. ‘‘పుచ్ఛ మహారాజా’’తి. ‘‘పుచ్ఛితోసి మే భన్తే’’తి. ‘‘విసజ్జితం మహారాజా’’తి. ‘‘కిం పన, భన్తే, తయా విసజ్జిత’’న్తి? ‘‘కిం పన, మహారాజ, తయా పుచ్ఛిత’’న్తి.

వీమంసనపఞ్హో తతియో.