౧. బ్రాహ్మణధమ్మయాగసుత్తం

౧౦౦. వుత్తఞ్హేతం భగవతా, వుత్తమరహతాతి మే సుతం –

‘‘అహమస్మి, భిక్ఖవే, బ్రాహ్మణో యాచయోగో సదా పయతపాణి [పయతపాణీ (సీ. స్యా.)] అన్తిమదేహధరో అనుత్తరో భిసక్కో సల్లకత్తో. తస్స మే తుమ్హే పుత్తా ఓరసా ముఖతో జాతా ధమ్మజా ధమ్మనిమ్మితా ధమ్మదాయాదా, నో ఆమిసదాయాదా.

‘‘ద్వేమాని, భిక్ఖవే, దానాని – ఆమిసదానఞ్చ ధమ్మదానఞ్చ. ఏతదగ్గం, భిక్ఖవే, ఇమేసం ద్విన్నం దానానం యదిదం – ధమ్మదానం.

‘‘ద్వేమే, భిక్ఖవే, సంవిభాగా – ఆమిససంవిభాగో చ ధమ్మసంవిభాగో చ. ఏతదగ్గం, భిక్ఖవే, ఇమేసం ద్విన్నం సంవిభాగానం యదిదం – ధమ్మసంవిభాగో.

‘‘ద్వేమే, భిక్ఖవే, అనుగ్గహా – ఆమిసానుగ్గహో చ ధమ్మానుగ్గహో చ. ఏతదగ్గం, భిక్ఖవే, ఇమేసం ద్విన్నం అనుగ్గహానం యదిదం – ధమ్మానుగ్గహో.

‘‘ద్వేమే, భిక్ఖవే, యాగా – ఆమిసయాగో చ ధమ్మయాగో చ. ఏతదగ్గం, భిక్ఖవే, ఇమేసం ద్విన్నం యాగానం యదిదం – ధమ్మయాగో’’తి. ఏతమత్థం భగవా అవోచ. తత్థేతం ఇతి వుచ్చతి –

‘‘యో ధమ్మయాగం అయజీ అమచ్ఛరీ, తథాగతో సబ్బభూతానుకమ్పీ [సబ్బసత్తానుకమ్పీ (స్యా.) అట్ఠకథాయమ్పి];

తం తాదిసం దేవమనుస్ససేట్ఠం, సత్తా నమస్సన్తి భవస్స పారగు’’న్తి.

అయమ్పి అత్థో వుత్తో భగవతా, ఇతి మే సుతన్తి. పఠమం.