౯. దానసుత్తం

౯౮. వుత్తఞ్హేతం భగవతా, వుత్తమరహతాతి మే సుతం –

‘‘ద్వేమాని, భిక్ఖవే, దానాని – ఆమిసదానఞ్చ ధమ్మదానఞ్చ. ఏతదగ్గం, భిక్ఖవే, ఇమేసం ద్విన్నం దానానం యదిదం – ధమ్మదానం.

‘‘ద్వేమే, భిక్ఖవే, సంవిభాగా – ఆమిససంవిభాగో చ ధమ్మసంవిభాగో చ. ఏతదగ్గం, భిక్ఖవే, ఇమేసం ద్విన్నం సంవిభాగానం యదిదం – ధమ్మసంవిభాగో.

‘‘ద్వేమే, భిక్ఖవే, అనుగ్గహా – ఆమిసానుగ్గహో చ ధమ్మానుగ్గహో చ. ఏతదగ్గం, భిక్ఖవే, ఇమేసం ద్విన్నం అనుగ్గహానం యదిదం – ధమ్మానుగ్గహో’’తి. ఏతమత్థం భగవా అవోచ. తత్థేతం ఇతి వుచ్చతి –

‘‘యమాహు దానం పరమం అనుత్తరం, యం సంవిభాగం భగవా అవణ్ణయి [అవణ్ణయీ (సీ.)];

అగ్గమ్హి ఖేత్తమ్హి పసన్నచిత్తో, విఞ్ఞూ పజానం కో న యజేథ కాలే.

‘‘యే చేవ భాసన్తి సుణన్తి చూభయం, పసన్నచిత్తా సుగతస్స సాసనే;

తేసం సో అత్థో పరమో విసుజ్ఝతి, యే అప్పమత్తా సుగతస్స సాసనే’’తి.

అయమ్పి అత్థో వుత్తో భగవతా, ఇతి మే సుతన్తి. నవమం.