౪. సన్తతరసుత్తం

౭౩. వుత్తఞ్హేతం భగవతా, వుత్తమరహతాతి మే సుతం –

‘‘రూపేహి, భిక్ఖవే, అరూపా [ఆరుప్పా (సీ.)] సన్తతరా, అరూపేహి నిరోధో సన్తతరో’’తి. ఏతమత్థం భగవా అవోచ. తత్థేతం ఇతి వుచ్చతి –

‘‘యే చ రూపూపగా సత్తా, యే చ అరూపట్ఠాయినో [ఆరుప్పట్ఠాయినో (సీ.)];

నిరోధం అప్పజానన్తా, ఆగన్తారో పునబ్భవం.

‘‘యే చ రూపే పరిఞ్ఞాయ, అరూపేసు అసణ్ఠితా;

నిరోధే యే విముచ్చన్తి, తే జనా మచ్చుహాయినో.

‘‘కాయేన అమతం ధాతుం, ఫుసయిత్వా నిరూపధిం;

ఉపధిప్పటినిస్సగ్గం, సచ్ఛికత్వా అనాసవో;

దేసేతి సమ్మాసమ్బుద్ధో, అసోకం విరజం పద’’న్తి.

అయమ్పి అత్థో వుత్తో భగవతా, ఇతి మే సుతన్తి. చతుత్థం.