౫. పఠమసీలసుత్తం

౩౨. వుత్తఞ్హేతం భగవతా, వుత్తమరహతాతి మే సుతం –

‘‘ద్వీహి, భిక్ఖవే, ధమ్మేహి సమన్నాగతో పుగ్గలో యథాభతం నిక్ఖిత్తో ఏవం నిరయే. కతమేహి ద్వీహి? పాపకేన చ సీలేన, పాపికాయ చ దిట్ఠియా. ఇమేహి ఖో, భిక్ఖవే, ద్వీహి ధమ్మేహి సమన్నాగతో పుగ్గలో యథాభతం నిక్ఖిత్తో ఏవం నిరయే’’తి. ఏతమత్థం భగవా అవోచ. తత్థేతం ఇతి వుచ్చతి –

‘‘పాపకేన చ సీలేన, పాపికాయ చ దిట్ఠియా;

ఏతేహి ద్వీహి ధమ్మేహి, యో సమన్నాగతో నరో;

కాయస్స భేదా దుప్పఞ్ఞో, నిరయం సోపపజ్జతీ’’తి.

అయమ్పి అత్థో వుత్తో భగవతా, ఇతి మే సుతన్తి. పఞ్చమం.