౧. పఠమసిక్ఖాపదవణ్ణనా

౧౦౨౫. ఆరామవగ్గస్స పఠమసిక్ఖాపదే – పరిక్ఖేపం అతిక్కామేన్తియా, ఉపచారం ఓక్కమన్తియాతి ఏత్థ పఠమపాదే దుక్కటం, దుతియపాదే పాచిత్తియం.

౧౦౨౭. సీసానులోకికాతి పఠమం పవిసన్తీనం భిక్ఖునీనం సీసం అనులోకేన్తీ పవిసతి, అనాపత్తి. యత్థ భిక్ఖునియోతి యత్థ భిక్ఖునియో పఠమతరం పవిసిత్వా సజ్ఝాయచేతియవన్దనాదీని కరోన్తి, తత్థ తాసం సన్తికం గచ్ఛామీతి గన్తుం వట్టతి. ఆపదాసూతి కేనచి ఉపద్దుతా హోతి, ఏవరూపాసు ఆపదాసు పవిసితుం వట్టతి. సేసం ఉత్తానమేవ.

ధురనిక్ఖేపసముట్ఠానం – కిరియాకిరియం, సఞ్ఞావిమోక్ఖం, సచిత్తకం, పణ్ణత్తివజ్జం, కాయకమ్మం, వచీకమ్మం, తిచిత్తం, తివేదనన్తి.

పఠమసిక్ఖాపదం.