౫. అమతవగ్గో

౨. సముదయసుత్తవణ్ణనా

౪౦౮. పఞ్చమవగ్గస్స దుతియే ఆహారసముదయా కాయస్స సముదయోతి ఆహారసముదయేన కాయసముదయో. ఏసేవ నయో సేసేసు. మనసికారసముదయాతి ఏత్థ పన యోనిసోమనసికారసముదయా బోజ్ఝఙ్గధమ్మానం సముదయో, అయోనిసోమనసికారసముదయా నీవరణధమ్మానం. ఇతి ఇమస్మిం సుత్తే సారమ్మణసతిపట్ఠానా కథితా.

౪. సతిసుత్తవణ్ణనా

౪౧౦. చతుత్థం సుద్ధికం కత్వా సముదయే కథితే బుజ్ఝనకానం అజ్ఝాసయేన వుత్తం.

౬. పాతిమోక్ఖసంవరసుత్తవణ్ణనా

౪౧౨. ఛట్ఠే పాతిమోక్ఖసంవరసంవుతోతి చతున్నం సీలానం జేట్ఠకసీలం దస్సేన్తో ఏవమాహ. తిపిటకచూళనాగత్థేరో పనాహ – ‘‘పాతిమోక్ఖసంవరోవ సీలం, ఇతరాని తీణి సీలన్తి వుత్తట్ఠానం నామ నత్థీ’’తి. వత్వా తం అనుజానన్తో ఆహ – ‘‘ఇన్ద్రియసంవరో నామ ఛద్వారరక్ఖణమత్తమేవ, ఆజీవపారిసుద్ధి ధమ్మేనేవ సమేన పచ్చయుప్పత్తిమత్తకం, పచ్చయసన్నిస్సితం పటిలద్ధపచ్చయే ఇదమత్థన్తి పచ్చవేక్ఖిత్వా పరిభుఞ్జనమత్తకం. నిప్పరియాయేన పాతిమోక్ఖసంవరోవ సీలం. యస్స సో భిన్నో, అయం ఛిన్నసీసో వియ పురిసో హత్థపాదే, సేసాని రక్ఖిస్సతీతి న వత్తబ్బో. యస్స పన సో అరోగో, అయం అచ్ఛిన్నసీసో వియ పురిసో జీవితం, సేసాని పున పాకతికాని కత్వా రక్ఖితుమ్పి సక్కోతీ’’తి. తస్మా పాతిమోక్ఖసంవరోవ సీలం, తేన పాతిమోక్ఖసంవరేన సంవుతోతి పాతిమోక్ఖసంవరసంవుతో, ఉపేతో సమన్నాగతోతి అత్థో.

ఆచారగోచరసమ్పన్నోతి ఆచారేన చ గోచరేన చ సమ్పన్నో. అణుమత్తేసూతి అప్పమత్తకేసు. వజ్జేసూతి అకుసలధమ్మేసు. భయదస్సావీతి భయదస్సీ. సమాదాయాతి సమ్మా ఆదియిత్వా. సిక్ఖస్సు సిక్ఖాపదేసూతి సిక్ఖాపదేసు తం తం సిక్ఖాపదం సమాదియిత్వా సిక్ఖ, యం యం పన కిఞ్చి సిక్ఖాపదేసు సిక్ఖాకోట్ఠాసేసు సిక్ఖితబ్బం కాయికం వా వాచసికం వా, తం తం సబ్బం సమ్మా ఆదాయ సిక్ఖస్సూతి అయమేత్థ సఙ్ఖేపత్థో. విత్థారో పన విసుద్ధిమగ్గే (విసుద్ధి. ౧.౧౪) వుత్తో. ఇతి ఇమస్మిం సుత్తే పాతిమోక్ఖసంవరసీలమేవ కథితం.

౭. దుచ్చరితసుత్తవణ్ణనా

౪౧౩. సత్తమే కాయసుచరితవచీసుచరితాని పాతిమోక్ఖసంవరసీలం, మనోసుచరితం ఇతరాని తీణి సీలానీతి చతుపారిసుద్ధిసీలం కథితం హోతి. ఇమినా నయేన పఞ్చసత్తనవదససు కుసలకమ్మపథేసు పచ్ఛిమాపి తయో సీలం హోతీతి వేదితబ్బా. సేసం ఉత్తానమేవాతి. ఛట్ఠసత్తమేసు హేట్ఠా వుత్తనయేనేవ అత్థో వేదితబ్బో.

అమతవగ్గో పఞ్చమో.

సతిపట్ఠానసంయుత్తవణ్ణనా నిట్ఠితా.