౬. సమ్మాసమ్బుద్ధసుత్తవణ్ణనా

౫౮. ఛట్ఠే కో అధిప్పయాసోతి కో అధికపయోగో. అనుప్పన్నస్సాతి ఇమఞ్హి మగ్గం కస్సపసమ్మాసమ్బుద్ధో ఉప్పాదేసి, అన్తరా అఞ్ఞో సత్థా ఉప్పాదేతుం నాసక్ఖి, ఇతి భగవా అనుప్పన్నస్స మగ్గస్స ఉప్పాదేతా నామ. నగరోపమస్మిఞ్హి అవళఞ్జనట్ఠానేసు పురాణమగ్గో జాతో, ఇధ అవత్తమానట్ఠేన అనుప్పన్నమగ్గో నామ. అసఞ్జాతస్సాతి తస్సేవ వేవచనం. అనక్ఖాతస్సాతి అకథితస్స. మగ్గం జానాతీతి మగ్గఞ్ఞూ. మగ్గం విదితం పాకటం అకాసీతి మగ్గవిదూ. మగ్గే చ అమగ్గే చ కోవిదోతి మగ్గకోవిదో. మగ్గానుగాతి మగ్గం అనుగచ్ఛన్తా. పచ్ఛా సమన్నాగతాతి అహం పఠమం గతో, సావకా పచ్ఛా సమన్నాగతా. ఛట్ఠం.