౪. ఉపాదానపరిపవత్తసుత్తవణ్ణనా

౫౬. చతుత్థే చతుపరివట్టన్తి ఏకేకస్మిం ఖన్ధే చతున్నం పరివట్టనవసేన. రూపం అబ్భఞ్ఞాసిన్తి రూపం దుక్ఖసచ్చన్తి అభిఞ్ఞాసిం. ఏవం సబ్బపదేసు చతుసచ్చవసేనేవ అత్థో వేదితబ్బో. ఆహారసముదయాతి ఏత్థ సచ్ఛన్దరాగో కబళీకారాహారో ఆహారో నామ. పటిపన్నాతి సీలతో పట్ఠాయ యావ అరహత్తమగ్గా పటిపన్నా హోన్తి. గాధన్తీతి పతిట్ఠహన్తి. ఏత్తావతా సేక్ఖభూమిం కథేత్వా ఇదాని అసేక్ఖభూమిం కథేన్తో యే చ ఖో కేచి, భిక్ఖవేతిఆదిమాహ. సువిముత్తాతి అరహత్తఫలవిముత్తియా సుట్ఠు విముత్తా. కేవలినోతి సకలినో కతసబ్బకిచ్చా. వట్టం తేసం నత్థి పఞ్ఞాపనాయాతి యేన తే అవసిట్ఠేన వట్టేన పఞ్ఞాపేయ్యుం, తం నేసం వట్టం నత్థి పఞ్ఞాపనాయ. అథ వా వట్టన్తి కారణం, పఞ్ఞాపనాయ కారణం నత్థీతి. ఏత్తావతా అసేక్ఖభూమివారో కథితో. చతుత్థం.