౨. పుప్ఫసుత్తవణ్ణనా

౯౪. దుతియే వివదతీతి ‘‘అనిచ్చం దుక్ఖం అనత్తా అసుభ’’న్తి యథాసభావేన వదన్తేన సద్ధిం ‘‘నిచ్చం సుఖం అత్తా సుభ’’న్తి వదన్తో వివదతి. లోకధమ్మోతి ఖన్ధపఞ్చకం. తఞ్హి లుజ్జనసభావత్తా లోకధమ్మోతి వుచ్చతి. కిన్తి కరోమీతి కథం కరోమి? మయ్హఞ్హి పటిపత్తికథనమేవ భారో, పటిపత్తిపూరణం పన కులపుత్తానం భారోతి దస్సేతి. ఇమస్మిం సుత్తే తయో లోకా కథితా. ‘‘నాహం, భిక్ఖవే, లోకేనా’’తి ఏత్థ హి సత్తలోకో కథితో, ‘‘అత్థి, భిక్ఖవే, లోకే లోకధమ్మో’’తి ఏత్థ సఙ్ఖారలోకో, ‘‘తథాగతో లోకే జాతో లోకే సంవడ్ఢో’’తి ఏత్థ ఓకాసలోకో కథితో. దుతియం.