౨. బళిససుత్తవణ్ణనా

౧౫౮. దుతియే బాళిసికోతి బళిసం గహేత్వా చరమానో మచ్ఛఘాతకో. ఆమిసగతన్తి ఆమిసమక్ఖితం. ఆమిసచక్ఖూతి ఆమిసే చక్ఖు దస్సనం అస్సాతి ఆమిసచక్ఖు. గిలబళిసోతి గిలితబళిసో. అనయం ఆపన్నోతి దుక్ఖం పత్తో. బ్యసనం ఆపన్నోతి వినాసం పత్తో. యథాకామకరణీయోతి యథాకామేన యథారుచియా యథేవ నం బాళిసికో ఇచ్ఛతి, తథేవస్స కత్తబ్బోతి అత్థో. యథాకామకరణీయో పాపిమతోతి యథా కిలేసమారస్స కామో, ఏవం కత్తబ్బో, నిరయం వా తిరచ్ఛానయోనిం వా పేత్తివిసయం వా పాపేతబ్బో. దుతియం.