౬. ధమ్మకథికసుత్తవణ్ణనా

౧౬. ఛట్ఠే నిబ్బిదాయాతి నిబ్బిన్దనత్థాయ. విరాగాయాతి విరజ్జనత్థాయ. నిరోధాయాతి నిరుజ్ఝనత్థాయ. పటిపన్నో హోతీతి ఏత్థ సీలతో పట్ఠాయ యావ అరహత్తమగ్గా పటిపన్నోతి వేదితబ్బో. ధమ్మానుధమ్మప్పటిపన్నోతి లోకుత్తరస్స నిబ్బానధమ్మస్స అనుధమ్మభూతం పటిపదం పటిపన్నో. అనుధమ్మభూతన్తి అనురూపసభావభూతం. నిబ్బిదా విరాగా నిరోధాతి నిబ్బిదాయ చేవ విరాగేన చ నిరోధేన చ. అనుపాదా విముత్తోతి చతూహి ఉపాదానేహి కిఞ్చి ధమ్మం అనుపాదియిత్వా విముత్తో. దిట్ఠధమ్మనిబ్బానప్పత్తోతి దిట్ఠేవ ధమ్మే నిబ్బానప్పత్తో. అలం వచనాయాతి, ఏవం వత్తబ్బతం అరహతి, యుత్తో అనుచ్ఛవికోతి అత్థో. ఏవమేత్థ ఏకేన నయేన ధమ్మకథికస్స పుచ్ఛా కథితా, ద్వీహి తం విసేసేత్వా సేక్ఖాసేక్ఖభూమియో నిద్దిట్ఠాతి. ఛట్ఠం.