౧౦. లోకసుత్తవణ్ణనా

౭౦. దసమే కిస్మిం లోకో సముప్పన్నోతి కిస్మిం ఉప్పన్నే లోకో ఉప్పన్నోతి పుచ్ఛతి. ఛసూతి ఛసు అజ్ఝత్తికేసు ఆయతనేసు ఉప్పన్నేసు ఉప్పన్నోతి వుచ్చతి. ఛసు కుబ్బతీతి తేసుయేవ ఛసు సన్థవం కరోతి. ఉపాదాయాతి తానియేవ చ ఉపాదాయ ఆగమ్మ పటిచ్చ పవత్తతి. విహఞ్ఞతీతి తేసుయేవ ఛసు విహఞ్ఞతి పీళియతి. ఇతి అజ్ఝత్తికాయతనవసేన అయం పఞ్హో ఆగతో, అజ్ఝత్తికబాహిరానం పన వసేన ఆహరితుం వట్టతి. ఛసు హి అజ్ఝత్తికాయతనేసు ఉప్పన్నేసు అయం ఉప్పన్నో నామ హోతి, ఛసు బాహిరేసు సన్థవం కరోతి, ఛన్నం అజ్ఝత్తికానం ఉపాదాయ ఛసు బాహిరేసు విహఞ్ఞతీతి. దసమం.

అద్ధవగ్గో సత్తమో.