౭. ధనఞ్జానిసుత్తవణ్ణనా

౪౪౫. ఏవం మే సుతన్తి ధనఞ్జానిసుత్తం. తత్థ దక్ఖిణాగిరిస్మిన్తి గిరీతి పబ్బతో, రాజగహం పరిక్ఖిపిత్వా ఠితపబ్బతస్స దక్ఖిణదిసాభాగే జనపదస్సేతం నామం. తణ్డులపాలిద్వారాయాతి రాజగహస్స కిర ద్వత్తింసమహాద్వారాని చతుసట్ఠిఖుద్దకద్వారాని, తేసు ఏకం తణ్డులపాలిద్వారం నామ, తం సన్ధాయేవమాహ. రాజానం నిస్సాయాతి ‘‘గచ్ఛ మనుస్సే అపీళేత్వా సస్సభాగం గణ్హాహీ’’తి రఞ్ఞా పేసితో గన్త్వా సబ్బమేవ సస్సం గణ్హాతి, ‘‘మా నో, భన్తే, నాసేహీ’’తి చ వుత్తే – ‘‘రాజకులే వుత్తం మన్దం, అహం రఞ్ఞా ఆగమనకాలేయేవ ఏవం ఆణత్తో, మా కన్దిత్థా’’తి ఏవం రాజానం నిస్సాయ బ్రాహ్మణగహపతికే విలుమ్పతి. ధఞ్ఞం యేభుయ్యేన అత్తనో ఘరం పవేసేత్వా అప్పకం రాజకులే పవేసేతి. కిం బ్రాహ్మణగహపతికానం న పీళం అకాసీతి చ వుత్తో – ‘‘ఆమ, మహారాజ, ఇమస్మిం వారే ఖేత్తాని మన్దసస్సాని అహేసుం, తస్మా అపీళేన్తస్స మే గణ్హతో న బహుం జాత’’న్తి ఏవం బ్రాహ్మణగహపతికే నిస్సాయ రాజానం విలుమ్పతి.

౪౪౬. పయో పీయతన్తి తరుణఖీరం పివతు. తావ భత్తస్సాతి యావ ఖీరం పివిత్వా నిసీదిస్సథ, తావదేవ భత్తస్స కాలో భవిస్సతి. ఇధేవ హి నో పాతరాసభత్తం ఆహరిస్సన్తీతి దస్సేతి. మాతాపితరోతిఆదీసు మహల్లకా మాతాపితరో ముదుకాని అత్థరణపావురణాని సుఖుమాని వత్థాని మధురభోజనం సుగన్ధగన్ధమాలాదీని చ పరియేసిత్వా పోసేతబ్బా. పుత్తధీతానం నామకరణమఙ్గలాదీని సబ్బకిచ్చాని కరోన్తేన పుత్తదారో పోసేతబ్బో. ఏవఞ్హి అకరియమానే గరహా ఉప్పజ్జతీతి ఇమినా నయేన అత్థో వేదితబ్బో.

౪౪౭. అధమ్మచారీతి పఞ్చ దుస్సీల్యకమ్మాని వా దస దుస్సీల్యకమ్మాని వా ఇధ అధమ్మో నామ. ఉపకడ్ఢేయ్యున్తి పఞ్చవిధబన్ధనాదికమ్మకరణత్థం తం తం నిరయం కడ్ఢేయ్యుం.

౪౪౮. ధమ్మచారీతి ధమ్మికసివవిజ్జాదికమ్మకారీ. పటిక్కమన్తీతి ఓసరన్తి పరిహాయన్తి. అభిక్కమన్తీతి అభిసరన్తి వడ్ఢన్తి. సేయ్యోతి వరతరం. హీనేతి నిహీనే లామకే. కాలఙ్కతో చ సారిపుత్తాతి ఇదం భగవా ‘‘తత్రస్స గన్త్వా దేసేహీ’’తి అధిప్పాయేన థేరమాహ. థేరోపి తంఖణంయేవ గన్త్వా మహాబ్రహ్మునో ధమ్మం దేసేసి, తతో పట్ఠాయ చాతుప్పదికం గాథం కథేన్తోపి చతుసచ్చవిముత్తం నామ న కథేసీతి.

పపఞ్చసూదనియా మజ్ఝిమనికాయట్ఠకథాయ

ధనఞ్జానిసుత్తవణ్ణనా నిట్ఠితా.