౬. ఏసుకారీసుత్తవణ్ణనా

౪౩౭. ఏవం మే సుతన్తి ఏసుకారీసుత్తం. తత్థ బిలం ఓలగ్గేయ్యున్తి కోట్ఠాసం లగ్గాపేయ్యుం, ఇమినా సత్థధమ్మం నామ దస్సేతి. సత్థవాహో కిర మహాకన్తారపటిపన్నో అన్తరామగ్గే గోణే మతే మంసం గహేత్వా సబ్బేసం సత్థికానం ‘‘ఇదం ఖాదిత్వా ఏత్తకం మూలం దాతబ్బ’’న్తి కోట్ఠాసం ఓలగ్గేతి, గోణమంసం నామ ఖాదన్తాపి అత్థి అఖాదన్తాపి, మూలం దాతుం సక్కోన్తాపి అసక్కోన్తాపి. సత్థవాహో యేన మూలేన గోణో గహితో, తస్స నిక్ఖమనత్థం సబ్బేసం బలక్కారేన కోట్ఠాసం దత్వా మూలం గణ్హాతి, అయం సత్థధమ్మో. ఏవమేవం బ్రాహ్మణాపి లోకస్స పటిఞ్ఞం అగ్గహేత్వా అత్తనోవ ధమ్మతాయ చతస్సో పారిచరియా పఞ్ఞపేన్తీతి దస్సేతుం ఏవమేవ ఖోతిఆదిమాహ. పాపియో అస్సాతి పాపం అస్స. సేయ్యో అస్సాతి హితం అస్స. అథ వా పాపియోతి పాపకో లామకో అత్తభావో అస్స. సేయ్యోతి సేట్ఠో ఉత్తమో. సేయ్యంసోతి సేయ్యో. ఉచ్చాకులీనతాతి ఉచ్చాకులీనత్తేన సేయ్యో. పాపియంసోతి పాపియో. ఉచ్చాకులీనతా చ ద్వీసు కులేసు వడ్ఢేతి ఖత్తియకులే బ్రాహ్మణకులే చ, ఉళారవణ్ణతా తీసు. వేస్సోపి హి ఉళారవణ్ణో హోతి. ఉళారభోగతా చతూసుపి. సుద్దోపి హి అన్తమసో చణ్డాలోపి ఉళారభోగో హోతియేవ.

౪౪౦. భిక్ఖాచరియన్తి కోటిధనేనపి హి బ్రాహ్మణేన భిక్ఖా చరితబ్బావ, పోరాణకబ్రాహ్మణా అసీతికోటిధనాపి ఏకవేలం భిక్ఖం చరన్తి. కస్మా? దుగ్గతకాలే చరన్తానం ఇదాని భిక్ఖం చరితుం ఆరద్ధాతి గరహా న భవిస్సతీతి. అతిమఞ్ఞమానోతి యో భిక్ఖాచరియవంసం హరిత్వా సత్తజీవకసికమ్మవణిజ్జాదీహి జీవికం కప్పేతి, అయం అతిమఞ్ఞతి నామ. గోపో వాతి యథా గోపకో అత్తనా రక్ఖితబ్బం భణ్డం థేనేన్తో అకిచ్చకారీ హోతి, ఏవన్తి అత్థో. ఇమినా నయేన సబ్బవారేసు అత్థో వేదితబ్బో. అసితబ్యాభఙ్గిన్తి తిణలాయనఅసితఞ్చేవ కాజఞ్చ. అనుస్సరతోతి యత్థ జాతో, తస్మిం పోరాణే మాతాపేత్తికే కులవంసే అనుస్సరియమానేతి అత్థో. సేసం సబ్బత్థ ఉత్తానమేవాతి.

పపఞ్చసూదనియా మజ్ఝిమనికాయట్ఠకథాయ

ఏసుకారీసుత్తవణ్ణనా నిట్ఠితా.