౮. బాహితికసుత్తవణ్ణనా

౩౫౮. ఏవం మే సుతన్తి బాహితికసుత్తం. తత్థ ఏకపుణ్డరీకం నాగన్తి ఏవంనామకం హత్థిం. తస్స కిర ఫాసుకానం ఉపరి తాలఫలమత్తం పణ్డరట్ఠానం అత్థి, తేనస్స ఏకపుణ్డరీకోతి నామం అకంసు. సిరివడ్ఢం మహామత్తన్తి పచ్చేకహత్థిం అభిరుహిత్వా కథాఫాసుకత్థం సద్ధిం గచ్ఛన్తం ఏవంనామకం మహామత్తం. ఆయస్మానోతి ఏత్థ నోతి పుచ్ఛాయ నిపాతో. మహామత్తో థేరస్స సఙ్ఘాటిపత్తధారణాకారం సల్లక్ఖేత్వా ‘‘ఏవం, మహారాజా’’తి ఆహ.

౩౫౯. ఓపారమ్భోతి ఉపారమ్భం దోసం ఆరోపనారహో. కిం పుచ్ఛామీతి రాజా పుచ్ఛతి. సున్దరివత్థుస్మిం ఉప్పన్నమిదం సుత్తం, తం పుచ్ఛామీతి పుచ్ఛతి. యఞ్హి మయం, భన్తేతి, భన్తే, యం మయం విఞ్ఞూహీతి ఇదం పదం గహేత్వా పఞ్హేన పరిపూరేతుం నాసక్ఖిమ్హా, తం కారణం ఆయస్మతా ఏవం వదన్తేన పరిపూరితం.

౩౬౦. అకుసలోతి అకోసల్లసమ్భూతో. సావజ్జోతి సదోసో. సబ్యాబజ్ఝోతి సదుక్ఖో. దుక్ఖవిపాకోతి ఇధ నిస్సన్దవిపాకో కథితో. తస్సాతి తస్స ఏవం అత్తబ్యాబాధాదీనం అత్థాయ పవత్తకాయసమాచారస్స.

సబ్బాకుసలధమ్మపహీనో ఖో, మహారాజ, తథాగతో కుసలధమ్మసమన్నాగతోతి ఏత్థ సబ్బేసంయేవ అకుసలానం ధమ్మానం పహానం వణ్ణేతీతి. ఆమ వణ్ణేతీతి వుత్తే యథా పుచ్ఛా, తథా అత్థో వుత్తో భవేయ్య. ఏవం బ్యాకరణం పన న భారియం. అప్పహీనఅకుసలోపి హి పహానం వణ్ణేయ్య, భగవా పన పహీనాకుసలతాయ యథాకారీ తథావాదీతి దస్సేతుం ఏవం బ్యాకాసి. సుక్కపక్ఖేపి ఏసేవ నయో.

౩౬౨. బాహితికాతి బాహితిరట్ఠే ఉట్ఠితవత్థస్సేతం నామం. సోళససమా ఆయామేనాతి ఆయామేన సమసోళసహత్థా. అట్ఠసమా విత్థారేనాతి విత్థారేన సమఅట్ఠహత్థా.

౩౬౩. భగవతో పాదాసీతి భగవతో నియ్యాతేసి. దత్వా చ పన గన్ధకుటియం వితానం కత్వా బన్ధి. తతో పట్ఠాయ గన్ధకుటి భియ్యోసోమత్తాయ సోభి. సేసం సబ్బత్థ ఉత్తానమేవ. నేయ్యపుగ్గలస్స పన వసేన అయం దేసనా నిట్ఠితాతి.

పపఞ్చసూదనియా మజ్ఝిమనికాయట్ఠకథాయ

బాహితికసుత్తవణ్ణనా నిట్ఠితా.