౧౦. వేఖనససుత్తవణ్ణనా

౨౭౮. ఏవం మే సుతన్తి వేఖనససుత్తం. తత్థ వేఖనసోతి అయం కిర సకులుదాయిస్స ఆచరియో, సో ‘‘సకులుదాయీ పరిబ్బాజకో పరమవణ్ణపఞ్హే పరాజితో’’తి సుత్వా ‘‘మయా సో సాధుకం ఉగ్గహాపితో, తేనాపి సాధుకం ఉగ్గహితం, కథం ను ఖో పరాజితో, హన్దాహం సయం గన్త్వా సమణం గోతమం పరమవణ్ణపఞ్హం పుచ్ఛిత్వా జానిస్సామీ’’తి రాజగహతో పఞ్చచత్తాలీసయోజనం సావత్థిం గన్త్వా యేన భగవా, తేనుపసఙ్కమి, ఉపసఙ్కమిత్వా పన ఠితకోవ భగవతో సన్తికే ఉదానం ఉదానేసి. తత్థ పురిమసదిసం వుత్తనయేనేవ వేదితబ్బం.

౨౮౦. పఞ్చ ఖో ఇమేతి కస్మా ఆరభి? అగారియోపి ఏకచ్చో కామగరుకో కామాధిముత్తో హోతి, ఏకచ్చో నేక్ఖమ్మగరుకో నేక్ఖమ్మాధిముత్తో హోతి. పబ్బజితోపి చ ఏకచ్చో కామగరుకో కామాధిముత్తో హోతి, ఏకచ్చో నేక్ఖమ్మగరుకో నేక్ఖమ్మాధిముత్తో హోతి. అయం పన కామగరుకో కామాధిముత్తో హోతి. సో ఇమాయ కథాయ కథియమానాయ అత్తనో కామాధిముత్తత్తం సల్లక్ఖేస్సతి, ఏవమస్సాయం దేసనా సప్పాయా భవిస్సతీతి ఇమం దేసనం ఆరభి. కామగ్గసుఖన్తి నిబ్బానం అధిప్పేతం.

౨౮౧. పాపితో భవిస్సతీతి అజాననభావం పాపితో భవిస్సతి. నామకంయేవ సమ్పజ్జతీతి నిరత్థకవచనమత్తమేవ సమ్పజ్జతి. తిట్ఠతు పుబ్బన్తో తిట్ఠతు అపరన్తోతి యస్మా తుయ్హం అతీతకథాయ అనుచ్ఛవికం పుబ్బేనివాసఞాణం నత్థి, అనాగతకథాయ అనుచ్ఛవికం దిబ్బచక్ఖుఞాణం నత్థి, తస్మా ఉభయమ్పేతం తిట్ఠతూతి ఆహ. సుత్తబన్ధనేహీతి సుత్తమయబన్ధనేహి. తస్స హి ఆరక్ఖత్థాయ హత్థపాదేసు చేవ గీవాయ చ సుత్తకాని బన్ధన్తి. తాని సన్ధాయేతం వుత్తం. మహల్లకకాలే పనస్స తాని సయం వా పూతీని హుత్వా ముఞ్చన్తి, ఛిన్దిత్వా వా హరన్తి.

ఏవమేవ ఖోతి ఇమినా ఇదం దస్సేతి – దహరస్స కుమారస్స సుత్తబన్ధనానం అజాననకాలో వియ అవిజ్జాయ పురిమాయ కోటియా అజాననం, న హి సక్కా అవిజ్జాయ పురిమకోటి ఞాతుం, మోచనకాలే జాననసదిసం పన అరహత్తమగ్గేన అవిజ్జాబన్ధనస్స పమోక్ఖో జాతోతి జాననం. సేసం సబ్బత్థ ఉత్తానమేవాతి.

పపఞ్చసూదనియా మజ్ఝిమనికాయట్ఠకథాయ

వేఖనససుత్తవణ్ణనా నిట్ఠితా.

తతియవగ్గవణ్ణనా నిట్ఠితా.