౯. గోలియానిసుత్తవణ్ణనా

౧౭౩. ఏవం మే సుతన్తి గోలియానిసుత్తం. తత్థ పదసమాచారోతి దుబ్బలసమాచారో ఓళారికాచారో, పచ్చయేసు సాపేక్ఖో మహారక్ఖితత్థేరో వియ. తం కిర ఉపట్ఠాకకులే నిసిన్నం ఉపట్ఠాకో ఆహ ‘‘అసుకత్థేరస్స మే, భన్తే, చీవరం దిన్న’’న్తి. సాధు తే కతం తంయేవ తక్కేత్వా విహరన్తస్స చీవరం దేన్తేనాతి. తుమ్హాకమ్పి, భన్తే, దస్సామీతి. సాధు కరిస్ససి తంయేవ తక్కేన్తస్సాతి ఆహ. అయమ్పి ఏవరూపో ఓళారికాచారో అహోసి. సప్పతిస్సేనాతి సజేట్ఠకేన, న అత్తానం జేట్ఠకం కత్వా విహరితబ్బం. సేరివిహారేనాతి సచ్ఛన్దవిహారేన నిరఙ్కుసవిహారేన.

నానూపఖజ్జాతి న అనుపఖజ్జ న అనుపవిసిత్వా. తత్థ యో ద్వీసు మహాథేరేసు ఉభతో నిసిన్నేసు తే అనాపుచ్ఛిత్వావ చీవరేన వా జాణునా వా ఘట్టేన్తో నిసీదతి, అయం అనుపఖజ్జ నిసీదతి నామ. ఏవం అకత్వా పన అత్తనో పత్తఆసనసన్తికే ఠత్వా నిసీదావుసోతి వుత్తే నిసీదితబ్బం. సచే న వదన్తి, నిసీదామి, భన్తేతి ఆపుచ్ఛిత్వా నిసీదితబ్బం ఆపుచ్ఛితకాలతో పట్ఠాయ నిసీదాతి వుత్తేపి అవుత్తేపి నిసీదితుం వట్టతియేవ. న పటిబాహిస్సామీతి ఏత్థ యో అత్తనో పత్తాసనం అతిక్కమిత్వా నవకానం పాపుణనట్ఠానే నిసీదతి, అయం నవే భిక్ఖూ ఆసనేన పటిబాహతి నామ. తస్మిఞ్హి తథా నిసిన్నే నవా భిక్ఖూ ‘‘అమ్హాకం నిసీదితుం న దేతీ’’తి ఉజ్ఝాయన్తా తిట్ఠన్తి వా ఆసనం వా పరియేసన్తా ఆహిణ్డన్తి. తస్మా అత్తనో పత్తాసనేయేవ నిసీదితబ్బం. ఏవం న పటిబాహతి నామ.

ఆభిసమాచారికమ్పి ధమ్మన్తి అభిసమాచారికం వత్తపటిపత్తిమత్తమ్పి. నాతికాలేనాతి న అతిపాతో పవిసితబ్బం, న అతిదివా పటిక్కమితబ్బం, భిక్ఖుసఙ్ఘేన సద్ధింయేవ పవిసితబ్బఞ్చ నిక్ఖమితబ్బఞ్చ. అతిపాతో పవిసిత్వా అతిదివా నిక్ఖమన్తస్స హి చేతియఙ్గణబోధియఙ్గణవత్తాదీని పరిహాయన్తి. కాలస్సేవ ముఖం ధోవిత్వా మక్కటకసుత్తాని ఛిన్దన్తేన ఉస్సావబిన్దూ నిపాతేన్తేన గామం పవిసిత్వా యాగుం పరియేసిత్వా యావ భిక్ఖాకాలా అన్తోగామేయేవ నానప్పకారం తిరచ్ఛానకథం కథేన్తేన నిసీదిత్వా భత్తకిచ్చం కత్వా దివా నిక్ఖమ్మ భిక్ఖూనం పాదధోవనవేలాయ విహారం పచ్చాగన్తబ్బం హోతి. న పురేభత్తం పచ్ఛాభత్తం కులేసు చారిత్తం ఆపజ్జితబ్బన్తి ‘‘యో పన భిక్ఖు నిమన్తితో సభత్తో సమానో సన్తం భిక్ఖుం అనాపుచ్ఛా పురేభత్తం వా పచ్ఛాభత్తం వా కులేసు చారిత్తం ఆపజ్జేయ్య, అఞ్ఞత్ర సమయా పాచిత్తియ’’న్తి (పాచి. ౨౯౯) ఇమం సిక్ఖాపదం రక్ఖన్తేన తస్స విభఙ్గే వుత్తం పురేభత్తఞ్చ పచ్ఛాభత్తఞ్చ చారిత్తం న ఆపజ్జితబ్బం. ఉద్ధతో హోతి చపలోతి ఉద్ధచ్చపకతికో చేవ హోతి చీవరమణ్డన-పత్తమణ్డన-సేనాసనమణ్డనా ఇమస్స వా పూతికాయస్స కేలాయనా మణ్డనాతి ఏవం వుత్తేన చ తరుణదారకావచాపల్యేన సమన్నాగతో.

పఞ్ఞవతా భవితబ్బన్తి చీవరకమ్మాదీసు ఇతికత్తబ్బేసు ఉపాయపఞ్ఞాయ సమన్నాగతేన భవితబ్బం. అభిధమ్మే అభివినయేతి అభిధమ్మపిటకే చేవ వినయపిటకే చ పాళివసేన చేవ అట్ఠకథావసేన చ యోగో కరణీయో. సబ్బన్తిమేన హి పరిచ్ఛేదేన అభిధమ్మే దుకతికమాతికాహి సద్ధిం ధమ్మహదయవిభఙ్గం వినా న వట్టతి. వినయే పన కమ్మాకమ్మవినిచ్ఛయేన సద్ధిం సువినిచ్ఛితాని ద్వే పాతిమోక్ఖాని వినా న వట్టతి.

ఆరుప్పాతి ఏత్తావతా అట్ఠపి సమాపత్తియో వుత్తా హోన్తి. తా పన సబ్బేన సబ్బం అసక్కోన్తేన సత్తసుపి యోగో కరణీయో, ఛసుపి…పే… పఞ్చసుపి. సబ్బన్తిమేన పరిచ్ఛేదేన ఏకం కసిణే పరికమ్మకమ్మట్ఠానం పగుణం కత్వా ఆదాయ విచరితబ్బం, ఏత్తకం వినా న వట్టతి. ఉత్తరిమనుస్సధమ్మేతి ఇమినా సబ్బేపి లోకుత్తరధమ్మే దస్సేతి. తస్మా అరహన్తేన హుత్వా విహాతబ్బం, అరహత్తం అనభిసమ్భుణన్తేన అనాగామిఫలే సకదాగామిఫలే సోతాపత్తిఫలే వా పతిట్ఠాతబ్బం. సబ్బన్తిమేన పరియాయేన ఏకం విపస్సనాముఖం యావ అరహత్తా పగుణం కత్వా ఆదాయ విచరితబ్బం. సేసం సబ్బత్థ ఉత్తానమేవ. ఇమం పన దేసనం ఆయస్మా సారిపుత్తో నేయ్యపుగ్గలస్స వసేన ఆభిసమాచారికవత్తతో పట్ఠాయ అనుపుబ్బేన అరహత్తం పాపేత్వా నిట్ఠాపేసీతి.

పపఞ్చసూదనియా మజ్ఝిమనికాయట్ఠకథాయ

గోలియానిసుత్తవణ్ణనా నిట్ఠితా.