౫. చిత్తాథేరీగాథావణ్ణనా

కిఞ్చాపి ఖోమ్హి కిసికాతిఆదికా చిత్తాయ థేరియా గాథా. అయమ్పి పురిమబుద్ధేసు కతాధికారా తత్థ తత్థ భవే వివట్టూపనిస్సయం కుసలం ఉపచినన్తీ ఇతో చతున్నవుతికప్పే చన్దభాగాయ నదియా తీరే కిన్నరయోనియం నిబ్బత్తి. సా ఏకదివసం ఏకం పచ్చేకబుద్ధం రుక్ఖమూలే నిసిన్నం దిస్వా పసన్నమానసా నళపుప్ఫేహి పూజం కత్వా వన్దిత్వా అఞ్జలిం పగ్గహేత్వా పదక్ఖిణం కత్వా పక్కామి. సా తేన పుఞ్ఞకమ్మేన దేవమనుస్సేసు సంసరన్తీ ఇమస్మిం బుద్ధుప్పాదే రాజగహే గహపతిమహాసాలకులే నిబ్బత్తిత్వా విఞ్ఞుతం పత్వా సత్థు రాజగహప్పవేసనే పటిలద్ధసద్ధా పచ్ఛా మహాపజాపతిగోతమియా సన్తికే పబ్బజిత్వా మహల్లికాకాలే గిజ్ఝకూటపబ్బతం అభిరుహిత్వా సమణధమ్మం కరోన్తీ విపస్సనం వడ్ఢేత్వా సహ పటిసమ్భిదాహి అరహత్తం పాపుణి. తేన వుత్తం అపదానే –

‘‘చన్దభాగానదీతీరే, అహోసిం కిన్నరీ తదా;

అద్దసం విరజం బుద్ధం, సయమ్భుం అపరాజితం.

‘‘పసన్నచిత్తా సుమనా, వేదజాతా కతఞ్జలీ;

నళమాలం గహేత్వాన, సయమ్భుం అభిపూజయిం.

‘‘తేన కమ్మేన సుకతేన, చేతనాపణిధీహి చ;

జహిత్వా కిన్నరీదేహం, అగచ్ఛిం తిదసం గతిం.

‘‘ఛత్తింసదేవరాజూనం, మహేసిత్తమకారయిం;

దసన్నం చక్కవత్తీనం, మహేసిత్తమకారయిం;

సంవేజేత్వాన మే చిత్తం, పబ్బజిం అనగారియం.

‘‘కిలేసా ఝాపితా మయ్హం, భవా సబ్బే సమూహతా;

సబ్బాసవపరిక్ఖీణా, నత్థి దాని పునబ్భవో.

‘‘చతున్నవుతితో కప్పే, యం పుప్ఫమభిపూజయిం;

దుగ్గతిం నాభిజానామి, పుప్ఫపూజాయిదం ఫలం.

‘‘కిలేసా ఝాపితా మయ్హం…పే… కతం బుద్ధస్స సాసన’’న్తి.

సా పన అరహత్తం పత్వా అత్తనో పటిపత్తిం పచ్చవేక్ఖిత్వా –

౨౭. ‘‘కిఞ్చాపి ఖోమ్హి కిసికా, గిలానా బాళ్హదుబ్బలా;

దణ్డమోలుబ్భ గచ్ఛామి, పబ్బతం అభిరూహియ.

౨౮. ‘‘సఙ్ఘాటిం నిక్ఖిపిత్వాన, పత్తకఞ్చ నికుజ్జియ;

సేలే ఖమ్భేసిమత్తానం, తమోఖన్ధం పదాలియా’’తి. –

ఇమా ద్వే గాథా అభాసి.

తత్థ కిఞ్చాపి ఖోమ్హి కిసికాతి యదిపి అహం జరాజిణ్ణా అప్పమంసలోహితభావేన కిససరీరా అమ్హి. గిలానా బాళ్హదుబ్బలాతి ధాత్వాదివికారేన గిలానా, తేనేవ గేలఞ్ఞేన అతివియ దుబ్బలా. దణ్డమోలుబ్భ గచ్ఛామీతి యత్థ కత్థచి గచ్ఛన్తీ కత్తరయట్ఠిం ఆలమ్బిత్వావ గచ్ఛామి. పబ్బతం అభిరూహియాతి ఏవం భూతాపి వివేకకామతాయ గిజ్ఝకూటపబ్బతం అభిరుహిత్వా.

సఙ్ఘాటిం నిక్ఖిపిత్వానాతి సన్తరుత్తరా ఏవ హుత్వా యథాసంహతం అంసే ఠపితం సఙ్ఘాటిం హత్థపాసే ఠపేత్వా. పత్తకఞ్చ నికుజ్జియాతి మయ్హం వలఞ్జనమత్తికాపత్తం అధోముఖం కత్వా ఏకమన్తే ఠపేత్వా. సేలే ఖమ్భేసిమత్తానం, తమోఖన్ధం పదాలియాతి పబ్బతే నిసిన్నా ఇమినా దీఘేన అద్ధునా అపదాలితపుబ్బం మోహక్ఖన్ధం పదాలేత్వా, తేనేవ చ మోహక్ఖన్ధపదాలనేన అత్తానం అత్తభావం ఖమ్భేసిం, మమ సన్తానం ఆయతిం అనుప్పత్తిధమ్మతాపాదనేన విక్ఖమ్భేసిన్తి అత్థో.

చిత్తాథేరీగాథావణ్ణనా నిట్ఠితా.