౯. అపరన్తానుదిట్ఠినిద్దేసవణ్ణనా

౧౪౨. సఞ్ఞిం వదన్తీతి సఞ్ఞీవాదా. అసఞ్ఞిం వదన్తీతి అసఞ్ఞీవాదా. నేవసఞ్ఞీనాసఞ్ఞిం వదన్తీతి నేవసఞ్ఞీనాసఞ్ఞీవాదా. అథ వా సఞ్ఞీతి పవత్తో వాదో సఞ్ఞీవాదో, సో యేసం అత్థీతి తే సఞ్ఞీవాదా, తథా అసఞ్ఞీవాదా, నేవసఞ్ఞీనాసఞ్ఞీవాదా చ. ఉచ్ఛేదం వదన్తీతి ఉచ్ఛేదవాదా. దిట్ఠధమ్మోతి పచ్చక్ఖధమ్మో, తత్థ తత్థ పటిలద్ధఅత్తభావస్సేతం అధివచనం. దిట్ఠధమ్మే నిబ్బానం దిట్ఠధమ్మనిబ్బానం, ఇమస్మింయేవ అత్తభావే దుక్ఖవూపసమోతి అత్థో, తం వదన్తీతి దిట్ఠధమ్మనిబ్బానవాదా. ఇమస్మిం పనత్థే విత్థారియమానే సాట్ఠకథం సకలం బ్రహ్మజాలసుత్తం వత్తబ్బం హోతి. ఏవఞ్చ సతి అతిపపఞ్చో హోతీతి న విత్థారితో. తదత్థికేహి తం అపేక్ఖిత్వా గహేతబ్బో.

అపరన్తానుదిట్ఠినిద్దేసవణ్ణనా నిట్ఠితా.