౬. అఞ్ఞతరబ్రాహ్మణపబ్బజితవత్థు

బాహితపాపోతి ఇమం ధమ్మదేసనం సత్థా జేతవనే విహరన్తో అఞ్ఞతరం బ్రాహ్మణపబ్బజితం ఆరబ్భ కథేసి.

ఏకో కిర బ్రాహ్మణో బాహిరకపబ్బజ్జాయ పబ్బజిత్వా ‘‘సమణో గోతమో అత్తనో సావకే ‘పబ్బజితా’తి వదతి, అహఞ్చమ్హి పబ్బజితో, మమ్పి ఖో ఏవం వత్తుం వట్టతీ’’తి చిన్తేత్వా సత్థారం ఉపసఙ్కమిత్వా ఏతమత్థం పుచ్ఛి. సత్థా ‘‘నాహం ఏత్తకేన ‘పబ్బజితో’తి వదామి, కిలేసమలానం పన పబ్బాజితత్తా పబ్బజితో నామ హోతీ’’తి వత్వా ఇమం గాథమాహ –

౩౮౮. ‘‘బాహితపాపోతి బ్రాహ్మణో, సమచరియా సమణోతి వుచ్చతి;

పబ్బాజయమత్తనో మలం, తస్మా పబ్బజితోతి వుచ్చతీ’’తి.

తత్థ సమచరియాతి సబ్బాకుసలాని సమేత్వా చరణేన. తస్మాతి యస్మా బాహితపాపతాయ బ్రాహ్మణో, అకుసలాని సమేత్వా చరణేన సమణోతి వుచ్చతి, తస్మా యో అత్తనో రాగాదిమలం పబ్బాజయన్తో వినోదేన్తో చరతి, సోపి తేన పబ్బాజనేన పబ్బజితోతి వుచ్చతీతి అత్థో.

దేసనావసానే సో బ్రాహ్మణపబ్బజితో సోతాపత్తిఫలే పతిట్ఠహి, సమ్పత్తానమ్పి సాత్థికా ధమ్మదేసనా అహోసీతి.

అఞ్ఞతరబ్రాహ్మణపబ్బజితవత్థు ఛట్ఠం.