౩౮. ధమ్మదిన్నత్థేరీవత్థు

యస్సాతి ఇమం ధమ్మదేసనం సత్థా వేళువనే విహరన్తో ధమ్మదిన్నం నామ భిక్ఖునిం ఆరబ్భ కథేసి.

ఏకదివసఞ్హి తస్సా గిహికాలే సామికో విసాఖో ఉపాసకో సత్థు సన్తికే ధమ్మం సుత్వా అనాగామిఫలం పత్వా చిన్తేసి – ‘‘మయా సబ్బం సాపతేయ్యం ధమ్మదిన్నం పటిచ్ఛాపేతుం వట్టతీ’’తి. సో తతో పుబ్బే ఆగచ్ఛన్తో ధమ్మదిన్నం వాతపానేన ఓలోకేన్తిం దిస్వా సితం కరోతి. తం దివసం పన వాతపానేన ఠితం అనోలోకేన్తోవ అగమాసి. సా ‘‘కిం ను ఖో ఇద’’న్తి చిన్తేత్వా ‘‘హోతు, భోజనకాలే జానిస్సామీ’’తి భోజనవేలాయ భత్తం ఉపనామేసి. సో అఞ్ఞేసు దివసేసు ‘‘ఏహి, ఏకతో భుఞ్జామా’’తి వదతి, తం దివసం పన తుణ్హీభూతోవ భుఞ్జి. సా ‘‘కేనచిదేవ కారణేన కుపితో భవిస్సతీ’’తి చిన్తేసి. అథ నం విసాఖో సుఖనిసిన్నవేలాయ తం పక్కోసిత్వా ‘‘ధమ్మదిన్నే ఇమస్మిం గేహే సబ్బం సాపతేయ్యం పటిచ్ఛాహీ’’తి ఆహ. సా ‘‘కుద్ధా నామ సాపతేయ్యం న పటిచ్ఛాపేన్తి, కిం ను ఖో ఏత’’న్తి చిన్తేత్వా ‘‘తుమ్హే పన, సామీ’’తి ఆహ. అహం ఇతో పట్ఠాయ న కిఞ్చి విచారేమీతి. తుమ్హేహి ఛడ్డితం ఖేళం కో పటిచ్ఛిస్సతి, ఏవం సన్తే మమ పబ్బజ్జం అనుజానాథాతి. సో ‘‘సాధు, భద్దే’’తి సమ్పటిచ్ఛిత్వా మహన్తేన సక్కారేన తం భిక్ఖునీఉపస్సయం నేత్వా పబ్బాజేసి. సా లద్ధూపసమ్పదా ధమ్మదిన్నత్థేరీ నామ అహోసి.

సా పవివేకకామతాయ భిక్ఖునీహి సద్ధిం జనపదం గన్త్వా తత్థ విహరన్తీ న చిరస్సేవ సహ పటిసమ్భిదాహి అరహత్తం పత్వా ‘‘ఇదాని మం నిస్సాయ ఞాతిజనా పుఞ్ఞాని కరిస్సన్తీ’’తి పునదేవ రాజగహం పచ్చాగఞ్ఛి. ఉపాసకో తస్సా ఆగతభావం సుత్వా ‘‘కేన ను ఖో కారణేన ఆగతా’’తి భిక్ఖునీఉపస్సయం గన్త్వా థేరిం వన్దిత్వా ఏకమన్తం నిసిన్నో ‘‘ఉక్కణ్ఠితా ను ఖోసి, అయ్యేతి వత్తుం అప్పతిరూపం, పఞ్హమేకం నం పుచ్ఛిస్సామీ’’తి చిన్తేత్వా సోతాపత్తిమగ్గే పఞ్హం పుచ్ఛి, సా తం విస్సజ్జేసి. ఉపాసకో తేనేవ ఉపాయేన సేసమగ్గేసుపి పఞ్హం పుచ్ఛిత్వా అతిక్కమ్మ పఞ్హస్స పుట్ఠకాలే తాయ ‘‘అచ్చయాసి, ఆవుసో, విసాఖా’’తి వత్వా ‘‘ఆకఙ్ఖమానో సత్థారం ఉపసఙ్కమిత్వా ఇమం పఞ్హం పుచ్ఛేయ్యాసీ’’తి వుత్తే థేరిం వన్దిత్వా ఉట్ఠాయాసనా సత్థు సన్తికం గన్త్వా తం కథాసల్లాపం సబ్బం భగవతో ఆరోచేసి. సత్థా ‘‘సుకథితం మమ ధీతాయ ధమ్మదిన్నాయ, అహమ్పేతం పఞ్హం విస్సజ్జేన్తో ఏవమేవ విస్సజ్జేయ్య’’న్తి వత్వా ధమ్మం దేసేన్తో ఇమం గాథమాహ –

౪౨౧. ‘‘యస్స పురే చ పచ్ఛా చ, మజ్ఝే చ నత్థి కిఞ్చనం;

అకిఞ్చనం అనాదానం, తమహం బ్రూమి బ్రాహ్మణ’’న్తి.

తత్థ పురేతి అతీతేసు ఖన్ధేసు. పచ్ఛాతి అనాగతేసు ఖన్ధేసు. మజ్ఝేతి పచ్చుప్పన్నేసు ఖన్ధేసు. నత్థి కిఞ్చనన్తి యస్సేతేసు ఠానేసు తణ్హాగాహసఙ్ఖాతం కిఞ్చనం నత్థి, తమహం రాగకిఞ్చనాదీహి అకిఞ్చనం కస్సచి గహణస్స అభావేన అనాదానం బ్రాహ్మణం వదామీతి అత్థో.

దేసనావసానే బహూ సోతాపత్తిఫలాదీని పాపుణింసూతి.

ధమ్మదిన్నత్థేరీవత్థు అట్ఠతింసతిమం.