౨౬. అఞ్ఞతరత్థేరవత్థు

యోధ దీఘన్తి ఇమం ధమ్మదేసనం సత్థా జేతవనే విహరన్తో అఞ్ఞతరత్థేరం ఆరబ్భ కథేసి.

సావత్థియం కిరేకో మిచ్ఛాదిట్ఠికో బ్రాహ్మణో సరీరగన్ధగహణభయేన ఉత్తరసాటకం అపనేత్వా ఏకమన్తే ఠపేత్వా గేహద్వారాభిముఖో నిసీది. అథేకో ఖీణాసవో భత్తకిచ్చం కత్వా విహారం గచ్ఛన్తో తం సాటకం దిస్వా ఇతో చితో చ ఓలోకేత్వా కఞ్చి అపస్సన్తో ‘‘నిస్సామికో అయ’’న్తి పంసుకూలం అధిట్ఠహిత్వా గణ్హి. అథ నం బ్రాహ్మణో దిస్వా అక్కోసన్తో ఉపసఙ్కమిత్వా ‘‘ముణ్డక, సమణ, మమ సాటకం గణ్హసీ’’తి ఆహ. తవేసో, బ్రాహ్మణాతి. ఆమ, సమణాతి. ‘‘మయా కఞ్చి అపస్సన్తేన పంసుకూలసఞ్ఞాయ గహితో, గణ్హ న’’న్తి తస్స దత్వా విహారం గన్త్వా భిక్ఖూనం తమత్థం ఆరోచేసి. అథస్స వచనం సుత్వా భిక్ఖూ తేన సద్ధిం కేళిం కరోన్తా ‘‘కిం ను ఖో, ఆవుసో, సాటకో దీఘో రస్సో థూలో సణ్హో’’తి. ఆవుసో, దీఘో వా హోతు రస్సో వా థూలో వా సణ్హో వా, నత్థి మయ్హం తస్మిం ఆలయో, పంసుకూలసఞ్ఞాయ నం గణ్హిన్తి. తం సుత్వా భిక్ఖూ తథాగతస్స ఆరోచేసుం – ‘‘ఏస, భన్తే, భిక్ఖు అభూతం వత్వా అఞ్ఞం బ్యాకరోతీ’’తి. సత్థా ‘‘భూతం, భిక్ఖవే, ఏస కథేతి, ఖీణాసవా నామ పరేసం సన్తకం న గణ్హన్తీ’’తి వత్వా ఇమం గాథమాహ –

౪౦౯. ‘‘యోధ దీఘం వ రస్సం వా, అణుం థూలం సుభాసుభం;

లోకే అదిన్నం నాదియతి, తమహం బ్రూమి బ్రాహ్మణ’’న్తి.

తస్సత్థో – సాటకాభరణాదీసు దీఘం వా రస్సం వా మణిముత్తాదీసు అణుం వా థూలం వా మహగ్ఘఅప్పగ్ఘవసేన సుభం వా అసుభం వా యో పుగ్గలో ఇమస్మిం లోకే పరపరిగ్గహితం నాదియతి, తమహం బ్రాహ్మణం వదామీతి అత్థో.

దేసనావసానే బహూ సోతాపత్తిఫలాదీని పాపుణింసూతి.

అఞ్ఞతరత్థేరవత్థు ఛబ్బీసతిమం.