౨౪. మహాపన్థకత్థేరవత్థు

యస్స రాగో చాతి ఇమం ధమ్మదేసనం సత్థా వేళువనే విహరన్తో మహాపన్థకం ఆరబ్భ కథేసి.

సో హాయస్మా చూళపన్థకం చతూహి మాసేహి ఏకం గాథం పగుణం కాతుం అసక్కోన్తం ‘‘త్వం సాసనే అభబ్బో, గిహిభోగాపి పరిహీనో, కిం తే ఇధ వాసేన, ఇతో నిక్ఖమా’’తి విహారా నిక్కడ్ఢిత్వా ద్వారం థకేసి. భిక్ఖూ కథం సముట్ఠాపేసుం, ‘‘ఆవుసో, మహాపన్థకత్థేరేన ఇదం నామ కతం, ఖీణాసవానమ్పి మఞ్ఞే కోధో ఉప్పజ్జతీ’’తి. సత్థా ఆగన్త్వా ‘‘కాయ నుత్థ, భిక్ఖవే, ఏతరహి కథాయ సన్నిసిన్నా’’తి పుచ్ఛిత్వా ‘‘ఇమాయ నామా’’తి వుత్తే ‘‘న, భిక్ఖవే, ఖీణాసవానం రాగాదయో కిలేసా అత్థి, మమ పుత్తేన అత్థపురేక్ఖారతాయ చేవ ధమ్మపురేక్ఖారతాయ చ కత’’న్తి వత్వా ఇమం గాథమాహ –

౪౦౭. ‘‘యస్స రాగో చ దోసో చ, మానో మక్ఖో చ పాతితో;

సాసపోరివ ఆరగ్గా, తమహం బ్రూమి బ్రాహ్మణ’’న్తి.

తత్థ ఆరగ్గాతి యస్సేతే రాగాదయో కిలేసా, అయఞ్చ పరగుణమక్ఖనలక్ఖణో మక్ఖో ఆరగ్గా సాసపో వియ పాతితో, యథా సాసపో ఆరగ్గే న సన్తిట్ఠతి, ఏవం చిత్తే న సన్తిట్ఠతి, తమహం బ్రాహ్మణం వదామీతి అత్థో.

దేసనావసానే బహూ సోతాపత్తిఫలాదీని పాపుణింసూతి.

మహాపన్థకత్థేరవత్థు చతువీసతిమం.