౨౨. అఞ్ఞతరభిక్ఖువత్థు

నిధాయ దణ్డన్తి ఇమం ధమ్మదేసనం సత్థా జేతవనే విహరన్తో అఞ్ఞతరం భిక్ఖుం ఆరబ్భ కథేసి.

సో కిర సత్థు సన్తికే కమ్మట్ఠానం గహేత్వా అరఞ్ఞే వాయమన్తో అరహత్తం పత్వా ‘‘పటిలద్ధగుణం సత్థు ఆరోచేస్సామీ’’తి తతో నిక్ఖమి. అథ నం ఏకస్మిం గామే ఏకా ఇత్థీ సామికేన సద్ధిం కలహం కత్వా తస్మిం బహి నిక్ఖన్తే ‘‘కులఘరం గమిస్సామీ’’తి మగ్గం పటిపన్నా అన్తరామగ్గే దిస్వా ‘‘ఇమం థేరం నిస్సాయ గమిస్సామీ’’తి పిట్ఠితో పిట్ఠితో అనుబన్ధి. థేరో పన తం న పస్సతి. అథస్సా సామికో గేహం ఆగతో తం అదిస్వా ‘‘కులగామం గతా భవిస్సతీ’’తి అనుబన్ధన్తో తం దిస్వా ‘‘న సక్కా ఇమాయ ఏకికాయ ఇమం అటవిం పటిపజ్జితుం, కం ను ఖో నిస్సాయ గచ్ఛతీ’’తి ఓలోకేన్తో థేరం దిస్వా ‘‘అయం ఇమం గణ్హిత్వా నిక్ఖన్తో భవిస్సతీ’’తి చిన్తేత్వా థేరం సన్తజ్జేసి. అథ నం సా ఇత్థీ ‘‘నేవ మం ఏస భదన్తో పస్సతి, న ఆలపతి, మా నం కిఞ్చి అవచా’’తి ఆహ. సో ‘‘కిం పన త్వం అత్తానం గహేత్వా గచ్ఛన్తం మమ ఆచిక్ఖిస్ససి, తుయ్హమేవ అనుచ్ఛవికం ఇమస్స కరిస్సామీ’’తి ఉప్పన్నకోధో ఇత్థియా ఆఘాతేన థేరం పోథేత్వా తం ఆదాయ నివత్తి. థేరస్స సకలసరీరం సఞ్జాతగణ్డం అహోసి. అథస్స విహారం గతకాలే భిక్ఖూ సరీరం సమ్బాహన్తా గణ్డే దిస్వా ‘‘కిం ఇద’’న్తి పుచ్ఛింసు. సో తేసం తమత్థం ఆరోచేసి. అథ నం భిక్ఖూ, ‘‘ఆవుసో, తస్మిం పురిసే ఏవం పహరన్తే త్వం కిం అవచ, కిం వా తే కోధో ఉప్పన్నో’’తి. ‘‘న మే, ఆవుసో, కోధో ఉప్పజ్జీ’’తి వుత్తే సత్థు సన్తికం గన్త్వా తమత్థం ఆరోచేత్వా, ‘‘భన్తే, ఏస భిక్ఖు ‘కోధో తే ఉప్పజ్జతీ’తి వుచ్చమానో ‘న మే, ఆవుసో, కోధో ఉప్పజ్జతీ’తి అభూతం వత్వా అఞ్ఞం బ్యాకరోతీ’’తి ఆరోచేసుం. సత్థా తేసం కథం సుత్వా, ‘‘భిక్ఖవే, ఖీణాసవా నామ నిహితదణ్డా, తే పహరన్తేసుపి కోధం న కరోన్తియేవా’’తి వత్వా ఇమం గాథమాహ –

౪౦౫. ‘‘నిధాయ దణ్డం భూతేసు, తసేసు థావరేసు చ;

యో న హన్తి న ఘాతేతి, తమహం బ్రూమి బ్రాహ్మణ’’న్తి.

తత్థ నిధాయాతి నిక్ఖిపిత్వా ఓరోపేత్వా. తసేసు థావరేసు చాతి తణ్హాతాసేన తసేసు, తణ్హాఅభావేన థిరతాయ థావరేసు చ. యో న హన్తీతి యో ఏవం సబ్బసత్తేసు విగతపటిఘతాయ నిక్ఖిత్తదణ్డో నేవ కఞ్చి సయం హనతి, న అఞ్ఞే ఘాతేతి, తమహం బ్రాహ్మణం వదామీతి అత్థో.

దేసనావసానే బహూ సోతాపత్తిఫలాదీని పాపుణింసూతి.

అఞ్ఞతరభిక్ఖువత్థు బావీసతిమం.