౨౦. ఖేమాభిక్ఖునీవత్థు

గమ్భీరపఞ్ఞన్తి ఇమం ధమ్మదేసనం సత్థా గిజ్ఝకూటే విహరన్తో ఖేమం నామ భిక్ఖునిం ఆరబ్భ కథేసి.

ఏకదివసఞ్హి పఠమయామసమనన్తరే సక్కో దేవరాజా పరిసాయ సద్ధిం ఆగన్త్వా సత్థు సన్తికే సారణీయధమ్మకథం సుణన్తో నిసీది. తస్మిం ఖణే ఖేమా భిక్ఖునీ ‘‘సత్థారం పస్సిస్సామీ’’తి ఆగన్త్వా సక్కం దిస్వా ఆకాసే ఠితావ సత్థారం వన్దిత్వా నివత్తి. సక్కో తం దిస్వా ‘‘కో ఏసా, భన్తే, ఆగచ్ఛమానా ఆకాసే ఠితావ సత్థారం వన్దిత్వా నివత్తీ’’తి పుచ్ఛి. సత్థా ‘‘ఏసా, మహారాజ, మమ ధీతా ఖేమా నామ మహాపఞ్ఞా మగ్గామగ్గకోవిదా’’తి వత్వా ఇమం గాథమాహ –

౪౦౩. ‘‘గమ్భీరపఞ్ఞం మేధావిం, మగ్గామగ్గస్స కోవిదం;

ఉత్తమత్థమనుప్పత్తం, తమహం బ్రూమి బ్రాహ్మణ’’న్తి.

తత్థ గబ్భీరపఞ్ఞన్తి గమ్భీరేసు ఖన్ధాదీసు పవత్తాయ పఞ్ఞాయ సమన్నాగతం ధమ్మోజపఞ్ఞాయ సమన్నాగతం మేధావిం ‘‘అయం దుగ్గతియా మగ్గో, అయం సుగతియా మగ్గో, అయం నిబ్బానస్స మగ్గో, అయం అమగ్గో’’తి ఏవం మగ్గే చ అమగ్గే చ ఛేకతాయ మగ్గామగ్గస్స కోవిదం అరహత్తసఙ్ఖాతం ఉత్తమత్థం అనుప్పత్తం తమహం బ్రాహ్మణం వదామీతి అత్థో.

దేసనావసానే బహూ సోతాపత్తిఫలాదీని పాపుణింసూతి.

ఖేమాభిక్ఖునివత్థు వీసతిమం.