౧౯. అఞ్ఞతరబ్రాహ్మణవత్థు

యో దుక్ఖస్సాతి ఇమం ధమ్మదేసనం సత్థా జేతవనే విహరన్తో అఞ్ఞతరం బ్రాహ్మణం ఆరబ్భ కథేసి.

తస్స కిరేకో దాసో అపఞ్ఞత్తే సిక్ఖాపదే పలాయిత్వా పబ్బజిత్వా అరహత్తం పాపుణి. బ్రాహ్మణో తం ఓలోకేన్తో అదిస్వా ఏకదివసం సత్థారా సద్ధిం పిణ్డాయ పవిసన్తం ద్వారన్తరే దిస్వా చీవరం దళ్హం అగ్గహేసి. సత్థా నివత్తిత్వా ‘‘కిం ఇదం, బ్రాహ్మణా’’తి పుచ్ఛి. దాసో మే, భో గోతమాతి. పన్నభారో ఏస, బ్రాహ్మణాతి. ‘‘పన్నభారో’’తి చ వుత్తే బ్రాహ్మణో ‘‘అరహా’’తి సల్లక్ఖేసి. తస్మా పునపి తేన ‘‘ఏవం, భో గోతమా’’తి వుత్తే సత్థా ‘‘ఆమ, బ్రాహ్మణ, పన్నభారో’’తి వత్వా ఇమం గాథమాహ –

౪౦౨. ‘‘యో దుక్ఖస్స పజానాతి, ఇధేవ ఖయమత్తనో;

పన్నభారం విసంయుత్తం, తమహం బ్రూమి బ్రాహ్మణ’’న్తి.

తత్థ దుక్ఖస్సాతి ఖన్ధదుక్ఖస్స. పన్నభారన్తి ఓహితఖన్ధభారం చతూహి యోగేహి సబ్బకిలేసేహి వా విసంయుత్తం తమహం బ్రాహ్మణం వదామీతి అత్థో. దేసనావసానే సో బ్రాహ్మణో సోతాపత్తిఫలే పతిట్ఠహి, సమ్పత్తానమ్పి సాత్థికా ధమ్మదేసనా అహోసీతి.

అఞ్ఞతరబ్రాహ్మణవత్థు ఏకూనవీసతిమం.