౧౮. ఉప్పలవణ్ణాథేరీవత్థు

వారి పోక్ఖరపత్తేవాతి ఇమం ధమ్మదేసనం సత్థా జేతవనే విహరన్తో ఉప్పలవణ్ణథేరిం ఆరబ్భ కథేసి. వత్థు ‘‘మధువా మఞ్ఞతి బాలో’’తి గాథావణ్ణనాయ (ధ. ప. ౬౯) విత్థారితమేవ. వుత్తఞ్హి తత్థ (ధ. ప. అట్ఠ. ౧.౬౯) –

అపరేన సమయేన మహాజనో ధమ్మసభాయం కథం సముట్ఠాపేసి ‘‘ఖీణాసవాపి మఞ్ఞే కామసుఖం సాదియన్తి, కామం సేవన్తి, కిం న సేవిస్సన్తి. న హేతే కోళాపరుక్ఖా, న చ వమ్మికా, అల్లమంససరీరావ, తస్మా ఏతేపి కామసుఖం సాదియన్తీ’’తి. సత్థా ఆగన్త్వా ‘‘కాయ నుత్థ, భిక్ఖవే, ఏతరహి కథాయ సన్నిసిన్నా’’తి పుచ్ఛిత్వా ‘‘ఇమాయ నామా’’తి వుత్తే ‘‘న, భిక్ఖవే, ఖీణాసవా కామసుఖం సాదియన్తి, న కామం సేవన్తి. యథా హి పదుమపత్తే పతితం ఉదకబిన్దు న లిమ్పతి న సణ్ఠాతి, వినివత్తిత్వా పన పతతేవ. యథా చ ఆరగ్గే సాసపో న ఉపలిమ్పతి న సణ్ఠాతి, వినివత్తిత్వా పతతేవ, ఏవం ఖీణాసవస్స చిత్తే దువిధోపి కామో న లిమ్పతి న సణ్ఠాతీ’’తి అనుసన్ధిం ఘటేత్వా ధమ్మం దేసేన్తో ఇమం గాథమాహ –

౪౦౧. ‘‘వారి పోక్ఖరపత్తేవ, ఆరగ్గేరివ సాసపో;

యో న లిమ్పతి కామేసు, తమహం బ్రూమి బ్రాహ్మణ’’న్తి.

తత్థ యో న లిమ్పతీతి ఏవమేవం యో అబ్భన్తరే దువిధేపి కామే న ఉపలిమ్పతి, తస్మిం కామే న సణ్ఠాతి, తమహం బ్రాహ్మణం వదామీతి అత్థో.

దేసనావసానే బహూ సోతాపత్తిఫలాదీని పాపుణింసూతి.

ఉప్పలవణ్ణాథేరీవత్థు అట్ఠారసమం.