౧౭. సారిపుత్తత్థేరవత్థు

అక్కోధనన్తి ఇమం ధమ్మదేసనం సత్థా వేళువనే విహరన్తో సారిపుత్తత్థేరం ఆరబ్భ కథేసి.

తదా కిర థేరో పఞ్చహి భిక్ఖుసతేహి సద్ధిం పిణ్డాయ చరన్తో నాలకగామే మాతు ఘరద్వారం అగమాసి. అథ నం సా నిసీదాపేత్వా పరివిసమానా అక్కోసి – ‘‘అమ్భో, ఉచ్ఛిట్ఠఖాదక ఉచ్ఛిట్ఠకఞ్జియం అలభిత్వా పరఘరేసు ఉళుఙ్కపిట్ఠేన ఘట్టితకఞ్జియం పరిభుఞ్జితుం అసీతికోటిధనం పహాయ పబ్బజితోసి, నాసితమ్హా తయా, భుఞ్జాహి దానీ’’తి. భిక్ఖూనమ్పి భత్తం దదమానా ‘‘తుమ్హేహి మమ పుత్తో అత్తనో చూళుపట్ఠాకో కతో, ఇదాని భుఞ్జథా’’తి వదేతి. థేరో భిక్ఖం గహేత్వా విహారమేవ అగమాసి. అథాయస్మా రాహులో సత్థారం పిణ్డపాతేన ఆపుచ్ఛి. అథ నం సత్థా ఆహ – ‘‘రాహుల, కహం గమిత్థా’’తి? ‘‘అయ్యికాయ గామం, భన్తే’’తి. ‘‘కిం పన తే అయ్యికాయ ఉపజ్ఝాయో వుత్తో’’తి? ‘‘అయ్యికాయ మే, భన్తే, ఉపజ్ఝాయో అక్కుట్ఠో’’తి. ‘‘కిన్తి వత్వా’’తి? ‘‘ఇదం నామ, భన్తే’’తి. ‘‘ఉపజ్ఝాయేన పన తే కిం వుత్త’’న్తి? ‘‘న కిఞ్చి, భన్తే’’తి. తం సుత్వా భిక్ఖూ ధమ్మసభాయం కథం సముట్ఠాపేసుం, ‘‘ఆవుసో, అచ్ఛరియా వత సారిపుత్తత్థేరస్స గుణా, ఏవంనామస్స మాతరి అక్కోసన్తియా కోధమత్తమ్పి నాహోసీ’’తి. సత్థా ఆగన్త్వా ‘‘కాయ నుత్థ, భిక్ఖవే, ఏతరహి కథాయ సన్నిసిన్నా’’తి పుచ్ఛిత్వా ‘‘ఇమాయ నామా’’తి వుత్తే, ‘‘భిక్ఖవే, ఖీణాసవా నామ అక్కోధనావ హోన్తీ’’తి వత్వా ఇమం గాథమాహ –

౪౦౦. ‘‘అక్కోధనం వతవన్తం, సీలవన్తం అనుస్సదం;

దన్తం అన్తిమసారీరం, తమహం బ్రూమి బ్రాహ్మణ’’న్తి.

తత్థ వతవన్తన్తి ధుతవతేన, సమన్నాగతం చతుపారిసుద్ధిసీలేన సీలవన్తం, తణ్హాఉస్సదాభావేన అనుస్సదం , ఛళిన్ద్రియదమనేన దన్తం, కోటియం ఠితేన అత్తభావేన అన్తిమసరీరం తమహం బ్రాహ్మణం వదామీతి అత్థో.

దేసనావసానే బహూ సోతాపత్తిఫలాదీని పాపుణింసూతి.

సారిపుత్తత్థేరవత్థు సత్తరసమం.