౯. ఏకవిహారిత్థేరవత్థు

ఏకాసనన్తి ఇమం ధమ్మదేసనం సత్థా జేతవనే విహరన్తో ఏకవిహారిత్థేరం నామ ఆరబ్భ కథేసి.

సో కిర థేరో ఏకకోవ సేయ్యం కప్పేతి, ఏకకోవ నిసీదతి, ఏకకోవ చఙ్కమతి, ఏకకోవ తిట్ఠతీతి చతుపరిసన్తరే పాకటో అహోసి. అథ నం భిక్ఖూ, ‘‘భన్తే, ఏవరూపో నామాయం థేరో’’తి తథాగతస్సారోచేసుం. సత్థా ‘‘సాధు సాధూ’’తి తస్స సాధుకారం దత్వా ‘‘భిక్ఖునా నామ పవివిత్తేన భవితబ్బ’’న్తి వివేకే ఆనిసంసం కథేత్వా ఇమం గాథమాహ –

౩౦౫. ‘‘ఏకాసనం ఏకసేయ్యం, ఏకో చరమతన్దితో;

ఏకో దమయమత్తానం, వనన్తే రమితో సియా’’తి.

తత్థ ఏకాసనం ఏకసేయ్యన్తి భిక్ఖుసహస్సమజ్ఝేపి మూలకమ్మట్ఠానం అవిజహిత్వా తేనేవ మనసికారేన నిసిన్నస్స ఆసనం ఏకాసనం నామ. లోహపాసాదసదిసేపి చ పాసాదే భిక్ఖుసహస్సమజ్ఝేపి పఞ్ఞత్తే విచిత్రపచ్చత్థరణూపధానే మహారహే సయనే సతిం ఉపట్ఠపేత్వా దక్ఖిణేన పస్సేన మూలకమ్మట్ఠానమనసికారేన నిపన్నస్స భిక్ఖునో సేయ్యా ఏకసేయ్యా నామ. ఏవరూపం ఏకాసనఞ్చ ఏకసేయ్యఞ్చ భజేథాతి అత్థో. అతన్దితోతి జఙ్ఘబలం నిస్సాయ జీవితకప్పనేన అకుసీతో హుత్వా సబ్బీరియాపథేసు ఏకకోవ చరన్తోతి అత్థో. ఏకో దమయన్తి రత్తిట్ఠానాదీసు కమ్మట్ఠానం అనుయుఞ్జిత్వా మగ్గఫలాధిగమవసేన ఏకోవ హుత్వా అత్తానం దమేన్తోతి అత్థో. వనన్తే రమితో సియాతి ఏవం అత్తానం దమేన్తో ఇత్థిపురిససద్దాదీహి పవివిత్తే వనన్తేయేవ అభిరమితో భవేయ్య. న హి సక్కా ఆకిణ్ణవిహారినా ఏవం అత్తానం దమేతున్తి అత్థో.

దేసనావసానే బహూ సోతాపత్తిఫలాదీని పాపుణింసు. తతో పట్ఠాయ మహాజనో ఏకవిహారికమేవ పత్థేసీతి.

ఏకవిహారిత్థేరవత్థు నవమం.

పకిణ్ణకవగ్గవణ్ణనా నిట్ఠితా.

ఏకవీసతిమో వగ్గో.