౪. అనత్తలక్ఖణవత్థు

తతియగాథాయపి ఏసేవ నయో. కేవలఞ్హి ఏత్థ భగవా తేసం భిక్ఖూనం పుబ్బే అనత్తలక్ఖణే అనుయుత్తభావం ఞత్వా, ‘‘భిక్ఖవే, సబ్బేపి ఖన్ధా అవసవత్తనట్ఠేన అనత్తా ఏవా’’తి వత్వా ఇమం గాథమాహ –

౨౭౯. ‘‘సబ్బే ధమ్మా అనత్తాతి, యదా పఞ్ఞాయ పస్సతి;

అథ నిబ్బిన్దతి దుక్ఖే, ఏస మగ్గో విసుద్ధియా’’తి.

తత్థ సబ్బే ధమ్మాతి పఞ్చక్ఖన్ధా ఏవ అధిప్పేతా. అనత్తాతి ‘‘మా జీయన్తు మా మీయన్తూ’’తి వసే వత్తేతుం న సక్కాతి అవసవత్తనట్ఠేన అనత్తా అత్తసుఞ్ఞా అస్సామికా అనిస్సరాతి అత్థో. సేసం పురిమసదిసమేవాతి.

అనత్తలక్ఖణవత్థు చతుత్థం.